Yohani
21 Føri kina Yesu dhongʉe ndi, ndi unakpa dho Tiberia dhi jʉdda tso ro. Ke dhongʉe ndi i ri bbai. 2 Simoni Petro ma, Tomas ma (Zʉ* ndrŭ ngʉ adi ndi nzǐ ro), Galilea nǎ Kana nǎ Natanaeli ma, Zebedayo ddui ma, ke una aro kʉ ná nja kpa ma na krʉ ngʉe ddinga. 3 Simoni Petro pongʉeri kpa dho: “Ma ra bbè pɨ.” Kpa pongʉeri: “Ko ra ddinga ni na.” Føro kpa rangʉe ro kpa djingʉe bbú na, ro fø kuna nzá kpa longʉe bbè ro ddikpa maddi ri.
4 Ro, nganyo tso ngʉ bbʉ ná saa na, Yesu tøngʉeni dda tso ro. Ro, ke unakpa nzá d’ingʉe ri kʉ Yesu nari utso ro ri. 5 Yesu dhungʉeri kpa tso: “Madzá nzø, ni nyo ná ritsi* ro ká kʉ ddi?” Kpa ngʉngʉe logoti: “Nga!” 6 Ke pongʉeri kpa dho: “Anibu bbè-mbi bbú dzá thá djó nga laidjo ndirigoti ni ba ddikpa ritsi ro ngodhé.” Føro kpa bungʉe bbè-mbi ro, ri ro nzá drrngʉeni kpa dho ri dhonalo bbè ngʉe li ndi li ri nǎ ro. 7 Føro Yesu unakpa kana bbo Yesu jingʉe ná ke pongʉeri Petro dho: “Ri kʉ Bboke.” Ri kʉ Bboke nari Simoni Petro rr ro, ke thongʉe ndi ró arugu rù thei ndi ro dhonalo ke ngʉ di ngaro,* ndirigoti ke tingʉeni dda na. 8 Ro, ke una nja kpa singʉe sese kʉ ná ddikpa bbú nǎ, pɨ nǎ bbè li ná bbè-mbi ndima drr ro, dhonalo kpa nga ngʉe da dda tso ró ro ri, kpa ngʉe ná nga nǎ ro dda tso ronga ngʉe chøchø metre 90 dhé.*
9 Dda tso ro kpa si ro, kpa njangʉe makala na le vʉ ná kazz ndirigoti ri djó ngʉe bbè ma, ndidhi mukati ma na. 10 Yesu pongʉeri kpa dho: “Anibbʉ kpadjo ni lø ná bbè ro di.” 11 Føro Simoni Petro djingʉe bbù na ndirigoti ke drrngʉe pɨ nǎ bbobbo bbè li ná fø bbè-mbi gʉna, ri nǎ bbè ngʉe 153. Nì mai bbè ngʉe bí ri nǎ ro, ri nanga ro nzá thangʉeni ri. 12 Yesu pongʉeri kpa dho: “Anisi bbʉtsonga dhi nyo nyo.” Ro, ke unakpa kana ddikpa ke ma nzá ddi bangʉe kpakpanga ro ndi dhuri ro ɨ ri: “Ni ká kʉ ie?” dhonalo kpa chungʉeri chu ri kʉ Bboke. 13 Yesu si ro, ke dzingʉe mukati ndirigoti ke bbʉngʉe ri kpa dhona; bbè na ma ke njingʉeri fø ddi. 14 Føri ngʉe ga ndi ga nari goti Yesu ndi dhǒ ya tatu kpa dho ri.
15 B’lo kpa nyo bbʉtsonga dhi nyo nari goti Yesu dhungʉeri Simoni Petro tso: “Simoni, Yohani ddù, ni ká ji ma i ritsi djolu ngbà?” Ke ngʉngʉe logoti: “Bbʉbbʉ dhé, Bboke ni churi chu ma jirie ni ji.” Føri goti ke pongʉeri: “Arø madzá chembø kalʉ kpari ró.” 16 Yesu dhungʉeri ki ke tso ri si na aro ina d’e: “Simoni, Yohani ddù, ni ká ji ma ngbà?” Ke ngʉngʉe logoti: “Bbʉbbʉ dhé, Bboke ni churi chu ma jirie ni ji.” Føri goti ke pongʉeri: “Ab’o madzá rere chembø ronga.” 17 Yesu dhungʉeri ki ke tso ri si na gbo ina d’e: “Simoni, Yohani ddù, ni ká ji ma ngbà?” Petro thí bangʉe njedha ke dhuri ndi tso gbo ina ɨ nari dho: “Ni ká ji ma ngbà?” Føro ke ngʉngʉe logoti: “Bboke ni chu krʉ kʉ ná lo chu, ndirigoti ni churi chu ma jirie ni ji.” Føri goti Yesu pongʉeri: “Angu madzá rere chembø.” 18 Bbʉbbʉ dhé, ma ripo ni dho, go ni ngʉe jadda ro, ni ngʉ adi rù thó ni ro ni niro ndirigoti ni ngʉ adi ra ni ji ná ngana. Ro, ngó ni si ngʉ ró, ni si ni thó dda d’i ke thó rù ni ro d’e ndirigoti ke di ra ni na nzá ni ji ná ngana.” 19 Fø lo ke pongʉe ndiri na ndi dhǒ ngbà di ná dhe chulu ma Petro ka ndi bbʉe madha Mungu dho nari d’e. Føri goti ke pongʉeri ki: “Ara anzi ma ni dyø nari na.”
20 Petro lengʉe ndi thí aluti ro, ke njangʉe bbo Yesu jingʉe ná ke ndima una ndi si ro, fø ke nganga i langʉe ndi Yesu badjo ngasdjó nyo dhi saa na ndirigoti ke dhungʉeri ɨ: “Bboke, ni nanga si dzi nari ká kʉ ie?” 21 Fø ke Petro nja ro ke dhungʉeri Yesu tso: “Nde Bboke, i ke dhó lo ka si di ngbǎ?” 22 Yesu ngʉngʉe logoti: “Njati ma jiri ke di kpø ma si ná nga djo ma ró, føri ká kʉ nidhó lo? Ro ni, ara anzi ma ni dyø nari na.” 23 Føro ri gangʉe le-djoi kalu nari kʉ, Yesu una fø ke ro nzɨ dhe ri, ro Yesu nzá pongʉeri ke dhe nzɨ ri, ro ke pongʉeri: “Njati ma jiri ke di kpø ma si ná nga djo ma ró, føri ká kʉ nidhó lo?”
24 Yesu una fø ke nganga i tilo fø lo djo ndirigoti ke nganga i ndi lo fø lo djo, føri kina ko churi chu ke d’ra nari kʉ bbʉbbʉ kʉ ná lo.
25 Bbʉbbʉ dhé, Yesu nji ná bí kʉ ná nja lo kpari ma kʉ ddi, nari le ndie krʉ ddiddi ro ró, ma d’yari, ri le ndi nǎ ná kú nanga le ku ná buku kpari ro nzá ka ndi kae dz’ nganga djo maddi ri.