Roma

8 Føri dho, ddi tso gbani Kristo Yesu na ná ndrŭ djó nzá lo ro d’ini ri. 2 Roho chulu singʉe ná shinga bbʉ ná yadha klo ni, Kristo Yesu dyø ná ke, chenga dhi yadha ma, dhe dhi ri ma na tsena ro klo. 3 Musa dhó Yadha ro nga kʉ kpakpanga na ndi kló ni d’e ri, dhonalo ndrŭ kʉ sʉsʉ ndirigoti chenga dhi ndrŭ. Ro, Mungu i ka ndi kloe ni ngbà, ke cho ndidhi Dduna nganga chenga dhi ndrŭ ndí bbai kʉ ná le ndí na ndi kʉ ro, nja ke tu chenga d’e nari chulu. Føri na Mungu d’ingʉe lo chenga djo le ndí chulu. 4 Føri dho, Yadha nzi ná chølo ka ndi njieni ko chulu dhonalo ko ngarr roho dho, ro nga chenga dhi le ndí dho ri. 5 Le ndí dho ngarr ná ndrŭ adi ngaddi le ndí dhi ritsi djo, ro roho dho ngarr ná ndrŭ adi ndima thí li roho dhi ritsi djo. 6 Le ndí djo le le thí li nari adi le mba dhe djo, ro roho djo le le thí li nari adi le mba shinga ma, ngoi ma na dhi ngana. 7 Le ndí djo le ledhó ngaddidha li nari adi rili le ngʉ Mungu dhó mbuba, dhonalo le ndí nzɨ adi ndi ro djø Mungu dhó Yadha dho ri; bbʉbbʉ dhé ri dho nzɨ ri ro ka ri. 8 Le ndí na ndima tso gba ná ndrŭ nzá ka ndima njí Mungu nyǒ tho ná lo ro ri.

9 Ro, le-djoi ni nzá gba ni tso le ndí na ri. Rie bbʉbbʉ Mungu dhó roho di ni nǎ ri ró, ni tso gbani gba roho na. Njati ddikpa ke djó é Kristo dhó roho nga ró, føri nga kʉ Kristo dzá ke ri. 10 Njati rie ngbà ni tso gbani Kristo na ri ró, roho adi rili ni di shi chølo djotsina rie dhe ma le ndí dhe chenga djotsina ri ró. 11 Mungu dhó roho ngbengʉe Yesu che cheni ná ndrŭ kana ro. Føri dho, njati rie nì fø roho kʉ ni nǎ ri ró, ga gangʉe Kristo Yesu ná fø Ke si ni ndí che cheni ná føri ngʉ shi, ni nǎ kʉ ná ndidzá roho chulu.

12 Føri dho le-djoi, ko dho nzá ringani ko rrnga le ndí dho ri. 13 Njati ni di ngarr ni ndí dho ró, bbʉbbʉ dhé ni si cheni che. Ro, njati ni bbari roho dzá kpakpanga kó ni tsotso ni hwi le ndí dzá njí ró, ni si di shi. 14 Mungu dhó roho chutsoddá dho ná ndrŭ e bbʉbbʉ dhé Mungu ddui. 15 Ni nzá bangʉe nokpá rili ni ngʉ ná roho inga do tá ni na ná roho ri, ro føri rɨngana ni bangʉe Mungu dzá nzø rili ni ngʉ ná roho; ná fø roho rili ko pori ko chu bbobbo ri na: “Aba,* Baba!” 16 Mungu dhó roho adi rili ko uri u nari kʉ, ko kʉ Mungu ddui. 17 Njati ko é Mungu dzá nzø ró, føri na mana kʉ ko kʉ Mungu dhó wɨ ritsi si che dho ná nzø maddi ndirigoti ko si wɨ ritsi ba ddinga Kristo na. Ro, ya kwanza ringani ko nzani ddinga ndiro ko si kadha ma ba ddinga i d’e.

18 Kpadjo ma ba ná nzadha krʉ ro nzɨ ma nja addu maddi ri, ma di ri ddi gosi ná saa na si dhoni ko chulu ná kadha na ró. 19 No noni ná ritsi krʉ Mungu ddui si dhoni nari b’o bbò ù na. 20 Dhonalo no noni ná ritsi lingʉeni nga na mana kʉ ná maisha tsena, ro nga ri ji ná lo dho ri, ro ri tsena li ri ná ke ji ná lo dho ngab’odha djotsina. 21 Ke chungʉeri chu no noni ná ritsi ka ndi sie kloni ngbà ngasa ná ritsi dhó no tsena ro ndirigoti ndima ba kadha ndima é Mungu dzá klo kloni ná nzø d’e. 22 Dhonalo ko churi chu kpø kpadjonga djo no noni ná ritsi krʉ dzz njedha dho ddinga ndirigoti ri nzani ddinga. 23 Ro, kpadjo ko ba ná roho kʉ gosi ná saa djo ko si ba ná ritsi dzi ro dhé. Ko dzzdzz ko thí nǎ, Mungu dzá nzø ko si nzini nari ko b’o bbò ù na ro. Fø saa na ko si kloni klo ko ndí nǎ ro, le ødha dhi be chulu. 24 Gødha ko bangʉe ná saa na i ko bangʉe fø ngab’odha. Nja njani ná ngab’odha nga e bbʉbbʉ kʉ ná ri ri. Dhonalo rie nì ddikpa ke ddikpa ritsi njanja ri ró, ká ke ka ndi é ngab’odha na fø ritsi djo ddi? 25 Ro, njati ko é ngab’odha na nzá ko d’e nja ná ritsi djo ró, ko adi ri b’o bbò ù na ndirigoti ngatsovedha na.

26 Føri kina, roho takatifu ma ka ndi kó ko tsotso ddi sʉsʉ kʉ ri ko di ko mbu ná saa na. Njaro ko churi chu kodhó lo uri ko njí sala, ro ko ká ka ko nzinga addu djo nari i nzá ko churi. Rie nza ko nzani ro, ko chu ko ka ko po ná lo nzá ri* ró, roho ka ndi ddoni ddo Mungu ró kodhi lo dho. 27 Ko thí nǎ kʉ ná lo nanga adi ne ná ke chu roho ká ji ndi po addu nari chu dhonalo roho adi ddoni takatifu kʉ ná ndrŭ dhi lo dho gba gbani Mungu ji ná lo na ná lo djotsina.

28 Ko churi chu nari kʉ, Mungu adi rili ndidzá njí krʉ rrni ddinga jiji ndi ná ndrŭ dhi bblonga dho, føri i kʉ ndi kpe ná lo ró ro ke nzingʉe ná ndrŭ. 29 Ya kwanza ke lingʉe ndidhó nganjadha fø ndrŭ djo i vi, ndirigoti ke vʉngʉeri anzinga djó ro dhé nari kʉ, kpa dho ringani ndima ngʉ ndidhi Dduna nganga bbai. Fø chu nǎ kedhi Dduna ka ndi ngʉe ya kwanza gøni ke djoi bí kʉ ná kpa kana ná ke. 30 Føri goti ke nzingʉe vʉ ndi vʉ ná kpa, ná fø kpa ke nzingʉe chølo dhi kpa. Mwisho, ke bbʉngʉe kadha chølo dhi ri ndi nzingʉe ná fø kpa dho.

31 Nde, ko ká ka ko po ngbá lo fø lo djo? Njati Mungu é ko laidjó ró, ká ie ka ndi tøni ko tso ro? 32 Ke nzá chongʉe ndi tso ro ndidhi Dduna ndi bbʉ nari ró maddi ri, ro ke bbʉngʉe ke ko krʉ dhi lo dho. Nde, føro ká ke ka ndi bbʉ kodhó lo u ná nja ritsi krʉ ko dho ndi nǎ ji na nzá? 33 Nde, Mungu vʉ ná fø kpa ká ie ka ndi bbø? Dhonalo Mungu nganga i nzi kpa chølo dhi kpa. 34 Nde, ie i ká ka ndi d’ilo kpa djo? Ddikpa le ma nzá ddi. Dhonalo kpadhi lo dho Kristo Yesu dhengʉe ndirigoti ke gangʉe ga che cheni ná ndrŭ kana ro. Føri goti njʉ ke kʉ Mungu thó thá djó ri laidjó kodhi lo dho ndi ddoni ro.

35 Nde, addu i ká ka ndi tu ko Kristo kʉ na ko dho ná jidha ró ro? Ri ká kʉ kpakpalo, inga d’od’o, inga nza ndrŭ le nzá nari, inga ù, inga ngaronga, inga hatari, inga sà? 36 Ndi ndini ná lo pori: “Ni djotsina ko hwini, hwi ndrŭ rine ndima hwi ko nari tso ró dyina blii. Ndrŭ ko nja che le ra che ná chembø bbai.” 37 Ro, fø lo krʉ kana ko adi si bbo pli kʉ ná chu nǎ fø lo djolu, jiji ko ná ke dhó kpakpanga chulu. 38 Føri dho, ma uri u nari kʉ, Mungu kʉ na ko dho ná jidha ró ro ka ndi tu ko ná ritsi ro nga kʉ ddikpa maddi ri, dhe ma nzɨ ddi, shinga ma nzɨ ddi, malaiká ma nzɨ ddi, guvernema ma nzɨ ddi, kpadjo kʉ ná ritsi ma nzɨ ddi, gosi ná ritsi ma nzɨ ddi, kpakpanga kpari ma nzɨ ddi, 39 arø ra ná nga ma nzɨ ddi, atsi tsu ná nga ma nzɨ ddi, no noni ná nja ddikpa ritsi ma nzɨ ddi. Bbʉbbʉ dhé, Mungu dho ko dho kodhi Bboke Kristo Yesu chulu ná jidha ró ro ka ndi tu ko ná ritsi ro nga kʉ ddikpa maddi ri.