Ya kwanza Petro ndi ná barua
2 Anipʉ ndá le chelo krʉ nji nari ma, kali ma, aro kudjo dyʉ le kʉ nari ma, dda ma, krʉ kʉ ná chelo le ti nari ma na ni ró ro. 2 Ringani Mungu dzá tsetse ná lo d’yu di ni hwi, go gøni ná nzø bà d’yu adi hwi nari bbai, ndiro ni dhidhi ndirigoti ni ba gødha ri chulu d’e. 3 Ri ka ndi é fø rie ngbà ni chu* Bboke dzá bblonga ri ró.
4 Ni ndrini shi di ná dju na le ddi ná ke kuso bu ndrŭ bungʉe ndi ro, ro Mungu vʉngʉe fø dju ri na mana kʉ bbo ndi nyǒ djó nari dho. 5 Shi di ná dju bbai, ni na maddi le kiroho nǎ dza chi kuhani dzá njí dho takatifu ndi kʉ ro, ndiro ni bbʉ ngbà tso Mungu ka ndi u ná bbʉdha ke dho roho takatifu ni tsotso kó nari kana Yesu Kristo chulu d’e. 6 Dhonalo ndi ndini ná lo pori: Anja! Ma li vʉ ma vʉ ná dju Sioni nǎ, føri kʉ dza dherr le li na dza kób’ɨ djó ná bbo na mana kʉ ná dju ndirigoti ddikpa ke li ndidhó udha fø dju djo ró, fø ke thí ro nzɨ si bʉni ri.*
7 Ni dho ri na mana kʉ bbo, ni kʉ u uri ná kpa nari dho, ro nzá uri ná kpa dho: “Bu dza chi ná kpa bungʉe ná dju i vengʉe ngʉ dza kób’ɨ djó bbò dju,”* 8 “le kób’ɨ ná dju ndirigoti njedha si bbʉ kpa dho ná dju.” Kpa klani kla dhonalo kpa nzɨ ngarr Mungu dzá lo dho ri. Ri kʉ føri dzá lo dho i le lingʉe kpa ri. 9 Ro, ni kʉ “vʉ le vʉ ná ndrŭ, pi dza nǎ bbakuhani, takatifu kʉ ná ndrŭ tsɨ, ndi dho dhé ke tu ná ndrŭ, ndiro ni d’ra kedzá bblonga krʉ ngalu d’e,” føri kʉ tɨtɨnga nǎ ro nzi ni ndidzá bbo pli kʉ ná kadha na ná ke. 10 Anziro nga ni ngʉe Mungu dzá ndrŭ ri, ro kpadjo ni ngʉ Mungu dzá ndrŭ, anziro nzá zølo dhongʉeni ni dho ri, ro kpadjo zølo dhoni ni dho.
11 Ji dhi ndrŭ, ma rija ni dho, ni kʉ lʉ ndirigoti sese saa dho di ná ndrŭ bbai nari dho, anib’o ni ronga ni* tso ró lɨ nji ná le ndí dzá ù ró. 12 Aninji kpakpanga nidhó nyi é bblo ndrŭ tsɨ kana ndiro rie chelo tso ma ndrŭ d’ya ni djo ri ró, ndrŭ nja nidhi bblo njí ndirigoti ndrŭ bbʉ madha Mungu dho ndrŭ nanga ke si kʉ ne ná dyi d’e.
13 Bboke dzá lo dho, anidjøni bbobbonga na kʉ ná ndrŭ krʉ dho:* rie pi ró, bbo kʉ ná ke bbai, 14 rie bbaguverner ró, anidjøni kpa dho pi cho ndima bbʉ chadha chelo nji ná ndrŭ dho; ndirigoti ndima bbʉ madha bblolo nji ná ndrŭ dho d’e ná kpa bbai. 15 Mungu ji nari kʉ ni gó ngadhi nyod’yu ro loti ná ndrŭ dhó nga na mana kʉ ná lo tso bblolo ni nji nari chulu. 16 Aniliri nì é klo kloni ná ndrŭ, ro nì kloni nari chulu nzɨ nì di nidhó chelo djó nga tso tsitsi,* ro aninji njí ri na Mungu dzá nokpa adi rinji nari bbai. 17 Anibbʉ heshima ndrŭ krʉ dho, aniji le-djoi krʉ,* aninji Mungu do, anibbʉ heshima pi dho.
18 Ringani njí dhi kpa djøni ndima dhó bbobbonga dho nì ndima heshima bbʉ kpa dho ringani nari bbai ro, nga bblo thí kʉ ndirigoti nzá dhó lo ronga d’yu kpakpa ná kpa dho dhé ri, ro kpakpa dhó lo ronga d’yu ná kpa dho maddi. 19 Njati ddikpa ke di kpakpalo* ma, nga kʉ chø ná chu nǎ le ndi nzá nari ma na tso ve ndiro ndi é bblo kʉ ná zamiri na Mungu nyǒ njí d’e ró, føri kʉ bblo. 20 Dhonalo njati ni di chenga ni nji nari djó le dhɨ ni nari tso ve ró, føri dzá bblonga ká kʉ addu? Ro, njati ni di bblolo djó ni nzani nari tso ve ró, føri kʉ u tso uni ná lo Mungu nyǒ njí.
21 Bbʉbbʉ dhé, ri kʉ føri dho i ni nzingʉeni ri, dhonalo Kristo maddi nzangʉeni nza ni djotsina nari chulu ke bbangʉe loroji ni dho, ndiro ni dyø ndi kowu krʉ kʉ ná lo kana d’e. 22 Ke nzá njingʉe chenga ro ri ndirigoti kali ro nzá bangʉeni ke tso na ri. 23 Dhu ndrŭ ngʉ ke dhu ná saa na, ke nzá ngʉngʉe dhú goti ro dhú na ri. Ndirigoti nza ndrŭ ngʉ ke nzá ná saa na, ke nzá changʉe ndrŭ ro ndi tso nǎ lo na ri, ro ke bbangʉe ndi chø kʉ ná chu nǎ adi lod’i ná ke thó thi na. 24 Ke d’ungʉe kodhi chenga ndi ndí nganga nǎ tsú badjo le tɨngʉe ndi ná saa na, ndiro ko kloni klo chenga nǎ ro ndirigoti ko di shi chølo njidha dho d’e. Ndirigoti “ke ró kilonda chulu ni gøngʉe gø.” 25 Ni ngʉe ddiddi kla klani chu nǎ ro ná chembø bbai, ro kpadjo ni ngʉngʉ ni ró adi rø ndirigoti nidhi shinga* djó nga adi nja ná ke dhi ngana.