Matayo

19 Fø lo tidha tso Yesu d’ya ro ke rangʉe Galilea nǎ ro Yudea nǎ thʉ* nǎ kʉ ná eneo na, Yordani dhi dda dzá chá dzɨ nga laidjo. 2 Birobiro kʉ ná ndrŭ kpari maddi rangʉe ke ulu, ndirigoti ke gøngʉe kpa krʉ.

3 Føri goti, Bbafarisayo singʉe Yesu dhi ngana ndima mbu ke d’e. Kpa dhungʉeri ke tso: “Ri tso ká uni u ddikpa kpetsi ke dho ndi kló ndoa nanga ndibbá le na ngbá lo djó ma che?” 4 Ke ngʉngʉe logoti: “Ni ká zøri nzá, kpa no ná ke nongʉe ndrŭ anziro dhé kpetsi ke ndirigoti isɨle, 5 ndirigoti ke pongʉeri, ‘Ri kʉ føri dzá lo dho i kpetsi ke si ndidzá baba ma bba, ndidzá mama na ndirigoti ndi chini ndibbá le na; føri goti kpa aro si ngʉ ddikpa le ndí nari ri?’ 6 Føro nga kpa ki kʉ aro vi ri, ro ddikpa le ndí. Føri dzá lo dho, b’lo tso Mungu gba nari nanga ro nzɨ ddikpa le ma ndo ddi.” 7 Kpa dhungʉeri ke tso: “Nde, føro ká Musa jangʉeri addudho, le bbʉ isɨle le di nari dhǒ ná barua le dhona ndirigoti le kló ndoa nanga klo le na?” 8 Ke ngʉngʉe logoti kpa dho: “Ri kʉ ni djǒ dyu kpakpa nari dho i Musa ungʉe ri tso ni kló ndoa nanga klo nibbá dhɨ na ri. Ro, anziro nga ri ngʉe fø ri. 9 Ro, ma ripo ni dho, njati ddikpa ke kló ndoa nanga ndibbá le na, ro rie nga uasherati* djó dhé ndirigoti ke kø d’i le ró, fø ke nji uzinifu.”*

10 Ke unakpa pongʉeri: “Rie føbø kpetsi ke ma dhó lo bɨni isɨle na ri ró, ri kʉ bblo nzɨ le chi ndoa pá.” 11 Ro, ke ngʉngʉe logoti kpa dho: “Ri nga kʉ krʉ kʉ ná kpetsi kpa i adi fø lo u ri, ro ri kʉ fø kpakpanga* bbʉni dho ná kpa dhé. 12 Dhonalo nja ndrŭ gøni gø toashi,* nja ndrŭ ndrŭ ngʉ toashi* ndirigoti nja ndrŭ ngʉ ndima toashi* ndima ro ra nǎ Pidhinga djotsina. Føri dho, ngbà jiri ndi u fø lo ná ke uri u.”

13 Føri goti, ndrŭ ngʉ si jadda nzø na ke dhi ngana, nja ke li ndi thó nzø djo ndirigoti ke nji sala nzø dhi lo dho d’e, ro ke unakpa ngʉ nzø tso gʉgʉ. 14 Ro, Yesu pongʉeri: “Anibbari nzø si ma dhi ngana, nzɨ ni mburi ni cho kpa tso dhonalo ra nǎ Pidhinga kʉ ddiddi kpa bbai kʉ ná ndrŭ dho.” 15 Føro ke lingʉe ndi thó nzø djo ndirigoti ke rangʉe ra føga ro.

16 Føro ddikpa ke singʉe Yesu dhi ngana ndirigoti ke dhungʉeri: “Mwalimu, ma dho ká ringani ma njí bblo kʉ ná ngbá lo ndiro ma ba cho ró nŭnŭ di ná shinga d’e?” 17 Yesu ngʉngʉe logoti ke dho: “Ni ká ngadhu ma tso bblo kʉ ná lo djo addudho? Bblo kʉ ná ke kʉ ddikpa dhé. Ro, njati ni jiri ni ba shinga ró, ara anzi Yadha dho ni ngarr nari na.” 18 Ke dhungʉeri: “Ká ngbá Yadha?” Yesu pongʉeri: “Ni dho nzá ringani ni hwi ndrŭ ri, ni dho nzá ringani ni njí uzinifu* ri, ni dho nzá ringani ni njí gbʉ ri, ni dho nzá ringani ni d’ya kali dhi lo tso ni lai djo ri, 19 abbʉ heshima nidzá baba ma dho, nidzá mama na, ndirigoti ringani ni ji ni lai ni nganga bbai.” 20 Fø jadda kpetsi ke pongʉeri: “Ma adi ngarr nì dhé fø yadha krʉ dho. Nde, madhó ro ká ngbá lo tso ki vʉni?” 21 Yesu pongʉeri ke dho: “Njati ni jiri ni é nzá tso ro vʉni* ná ke ró, ara ni dzí nidhó ritsi nanga, ná ndiri ni ndó njedha dhi ndrŭ dho, føro ni si kʉ mali ba ra nǎ ndirigoti asi ni ngʉ ma unake.” 22 Fø lo ndi rr ro, fø jadda kpetsi ke rangʉe føga ro njedha na ndi kʉ ro dhonalo kedhó ritsi ngʉe bí. 23 Føro Yesu pongʉeri ndi unakpa dho: “Bbʉbbʉ dhé ma ripo ni dho, ri sie kpakpa mali dhi ke dho ndi tsu ra nǎ Pidhinga na. 24 Godhé ma ripo ni dho, mali dhi ke tsu Mungu dhó Pidhinga na nari kʉ kpakpa pli ngamia da shendani nyoi lú nari djolu.”

25 Fø lo ke unakpa rr ro, kpa nanga kengʉeni bbo ndirigoti kpa dhungʉeri: “Nde, afø ro ká ie ka ndi ve gø?” 26 Yesu nja kpa nyǒ nanga chøø ro ke pongʉeri: “Ndrŭ dho nzɨ fø lo ka ri, ro Mungu dho krʉ kʉ ná lo adi kaka.”

27 Føro Petro pongʉeri: “Anja! Ko bba kodhó ritsi krʉ ndirigoti ko ra ni ulu. Nde, ko ká si addu ba?” 28 Yesu pongʉeri kpa dho: “Bbʉbbʉ dhé ma ripo ni dho, ritsi ki le si no wø ndirigoti ndrŭ Ddù si kʉ di ndidhó kadha dhi pi dhi kiti djo ná saa na, ma ni dyøngʉe ro, ni si kʉ di 12 kʉ ná pi dhi kiti djo ndirigoti ni si kʉ lod’i Israeli nǎ 12 kʉ ná bbu djo. 29 Ndirigoti ddikpa ke i bbá ndidhó dza kpari inga ndi djoi inga ndi vei inga ndidzá baba inga ndidzá mama inga ndidzá nzø inga ndidhó nza kpari ma ró dho djotsina ró, ke si fø ritsi ki ba 100 ina ndirigoti ke si cho ró nŭnŭ di ná shinga ba.

30 “Ro, ya kwanza kʉ ná bí kʉ ná ndrŭ si ngʉ ya mwisho, ndirigoti ya mwisho kʉ ná ndrŭ i si ngʉ ya kwanza.