Matayo

6 “Anirø ni ró ndiro nzɨ ni nji bblolo ndrŭ nyǒ njí ndiro ndrŭ nja ni d’e ró. Njati ni njiri fø ró, nidhi ra nǎ Baba si ni kobe bbʉ dho ná lo ro nga sie ri. 2 Føri dho, rie njedha dhi ndrŭ tsotso ni kó* ri ró, nzɨ mi ngøga aro kudjo dyʉ kʉ ná ndrŭ* adi rinji sinagogi ma, chu ma na lu ndiro ndrŭ má ndima ma d’e nari bbai. Bbʉbbʉ dhé, ma ripo ni dho, fø kpa ba ndima kobe kaka ná ngatsi b’lo. 3 Ro, njati rie njedha dhi ndrŭ tsotso ni kó ri ró, nzɨ bbari ni thó gru djó ri chu ni thó thá djó ri nji ná lo, 4 ndiro ni bbʉ nidzá bbʉdha nzá nja ndrŭ chu ro d’e. Føro nidzá Baba ruruni ná nga nǎ ro adi lo nja ná ke si ni kobe bbʉbbʉ.

5 “Føri kina, rie sala ni nji ró, nzɨ ni njini aro kudjo dyʉ kʉ ná ndrŭ* adi njini nari bbai, dhonalo kpa adi riji ndima tøni sinagogi ma, bbobbo chu ma na tso ro lu nganzidha dho ndiro ndrŭ nja ndima d’e. Bbʉbbʉ dhé, ma ripo ni dho fø kpa ba ndima kobe kaka ná ngatsi b’lo. 6 Ro, rie sala ni nji ró, atsu ddiro nidhó chumba na ndirigoti b’lo ni i dzaitso nari goti, anzinga nidzá Baba ruruni ná ngana di ná ke tso. Ndirigoti nidzá Baba, ruruni ná lo adi nja ná ke si ni kobe bbʉbbʉ. 7 Njati rie sala ni nji ri ró, nzɨ ni di ngʉ ddikpa lo djolu bí ina ndrŭ tsɨ adi rinji nari bbai, dhonalo kpa adi riddi ndima dhó sala ka ndi rrni rr bí ndima loti nari dho. 8 Føri dzá lo dho, nzɨ ni njini fø ndrŭ bbai, dhonalo nidhi Baba chu nidhó lo u ná ritsi chu nzá ni d’e ri nzinzi maddi ro.

9 “Ni dho ringani ni nzinga ɨ:

“‘Kodhi ra nǎ Baba, aliri ni ró dho tsetse.* 10 Aliri nidzá Pidhinga si. Abbari ni ji ná lo njini i dz’ djo, ra nǎ ri njini nari bbai. 11 Abbʉ kodhó njʉnga dhi nyo ko dho. 12 Anji ko nǎ ddeni zø, kodhó ddeni kʉ nǎ ná ndrŭ zø ko adi nji nari bbai. 13 Ndirigoti nzɨ bbari ko tsu mbudha na, ro aklo* ko che kʉ ná ke dhó ro.’

14 “Dhonalo njati ni di nja ndrŭ dhó chelo zø njinji ró, nidhi ra nǎ Baba maddi si ni zø njinji; 15 ro, ni di ndrŭ dhó chelo zø nji nzá ró, nidhi Baba ma nzɨ ddi si nidhó chelo zø ro nji ri.

16 Rie nyo ni chi ró, nzɨ ni ngʉ ni nyǒ djó nga njedha na aro kudjo dyʉ kʉ ná ndrŭ* adi rinji nari bbai, dhonalo kpa adi ndima nyǒ djó nga sa* ndiro ndrŭ chu ndima nyo chi nari d’e. Bbʉbbʉ dhé, ma ripo ni dho fø kpa ba ndima kobe kaka ná ngatsi b’lo. 17 Ro ni, njati rie nyo ni chi ró, anid’ri ché ni djǒ ro ndirigoti aniʉ ni nyǒ djó nga ʉ, 18 ndiro nzɨ ndrŭ ni nyo chi nari utso d’i, ro nidhi Baba ruruni ná ngana kʉ ná ke dhé. Føro nidhi Baba ruruni ná nga nǎ ro adi lo nja ná ke si ni kobe bbʉbbʉ.

19 “Anibba i dz’ djo ni mali tso nju ni dho nari tso, ucha ma, dz’cha ma na adi ri d’a ná ngana ndirigoti gbʉ adi tsu ndima d’u ri ná ngana. 20 Føri rɨngana, aninju mali tso ni dho ra na, nzɨ ucha ma, dz’cha ma na ri d’a ná ngana ndirigoti nzɨ gbʉ tsu ndima d’u ri d’e ná ngana. 21 Dhonalo ni thí e nidhó mali kʉ ná ngana.

22 “Le ndí dzá kadha kʉ le nyǒ. Njati ni nyǒ é ddikpa ritsi djó* ró, ni ndí krʉ sie kadha nǎ. 23 Ro, ni nyǒ é ddá* ró, ni ndí krʉ sie tɨtɨnga nǎ. Njati ni nǎ kʉ ná kadha é tɨtɨnga ró, fø tɨtɨnga kʉ bbo pli.

24 “Ddikpa le ro ma nga ddi ka ndi é aro kʉ ná bbobbokpa dhó noke ri; dhonalo ke si ddi ke ndrondro ndirigoti ndi ji nja ke ji inga ke si chini ddi ke na ndirigoti ndi be nja ke pá. Ni dho nzá ri ro ka ndi ka ni é nokpá Mungu dho ndirigoti mali dho ri.

25 “Føri dzá lo dho ma ripo ni dho: Nzɨ ni bba rid’o ni nanga nidhi shinga* dzá lo dho, ni di ridhu ni tso, ko ká si addu nyo? Inga ko ká si addu jø? Inga ko ndí ronga ká ko si tho addu na? Dhonalo nidhi shinga* dada nyo djolu ndirigoti ni ndí dada rù djolu. 26 Aninja ra-kpa ró rè, ri nzɨ adi nyo ro zʉ inga nyo tso ro nju inga ri tso gbá depo na ri, føro mai nidhi ra nǎ Baba adi ri ngungu dhé. Nde, ni na mana ká dada nzá rè djolu? 27 Ni kana ie i ká ka ndi ndrí ndidzá ddo ro sese* ma ndi ribba rid’o ndi nanga nari na? 28 Føri kina, rù dhi lo ká ni nanga d’o addudho? Aninja ngbaribbai ma nza gʉ maua adi dhi nari, ri nzɨ adi njí ro nji ri ndirigoti ri nzɨ adi rù ro maddi ro ndima ro ri; 29 ro, ma ripo ni dho, nì mai Sulemani dhó mali ngʉe bbo ro, ke ngʉ njø ná rù ro nzá d’angʉeni fø maua kana ddikpa ri bbai maddi ri. 30 Njati rie føri bbai Mungu adi njʉ kʉ ndirigoti bbʉ le si bu kazz na ná nza gʉ tsó ronga thɨ ri ró, ni sese dhó udha kʉ ná ndrŭ, ni ronga gʉ ká ke ka ndi thó fønga djolu nzá? 31 Føri dzá lo dho, nzɨ ni bba rid’o ni nanga ni di ripo: ‘Ko ká nyo addu?’ inga ‘Ko ká jø addu?’ inga ‘Ko ká tho addu?’ 32 Dhonalo, føri krʉ kʉ bbò ù na ndrŭ tsɨ adi ne ná ritsɨ. Nidhi ra nǎ Baba chu nidhó lo u fø ritsi krʉ nari chu.

33 “Føri dzá lo dho, anidi Pidhinga ma, Mungu dhó chølo ma na i ne vi ndirigoti nja fø ritsi krʉ si ndrini ndri ni dho. 34 Føri dho, nzɨ ni bba rid’o ni nanga bbʉnga dhi lo dho, dhonalo bbʉnga sie ndidhi d’od’o na. Krʉ kʉ na ddo dhi d’od’o kaka fø dyi nga dho.