Marko

12 Føri goti ke ngangʉe lotidha tso kpa dho loroji chulu: “Ddikpa ke zʉngʉe divai mbi ndirigoti ke d’engʉe ri ronga tso lubba na, ke bbɨngʉe divai nanga le di zz ná nga ndirigoti ke chingʉe nga le di b’o nǎ ná bbo ngbeni ná dza, føri goti ke ma rrngʉeni nza bbɨ ná kpa na ndima di fø nza gʉ o ná ritsi nanga ndondo ndirigoti ke rangʉe d’i ngø na. 2 Divai tso njudha dhi saa si ro, ke chongʉe ndidhó njí dhi ke nza bbɨ ná kpa dhi ngana ndiro ke kó divai kpa ro ndi dho kpa tso d’e. 3 Ro, kpa løngʉe ke, kpa njingʉe ke ndirigoti kpa ngʉngʉe ke nga dhó ritsi ro. 4 Ke chongʉe njí dhi nja ke ki kpa dhi ngana, ná fø ke djǒ nanga kpa dhɨngʉe dhɨ ndirigoti kpa bengʉe ke pá. 5 Føri goti ke chongʉe nja ke ki, ná fø ke kpa hwingʉe hwi. Føri goti ke chongʉe bí kʉ ná nja kpa ki, ná fø kpa kana nja kpa, kpa njingʉe nji ndirigoti nja kpa, kpa chengʉe che. 6 Føri goti mangʉe nari ngʉe kedhi dduna, bbo ke jingʉe ná ke. Ya mwisho, ke chongʉe fø ke kpa dhi ngana ɨ ndi riddi ro: ‘Kpa ka ndima bbʉ heshima ngbà madhi dduna dho.’ 7 Ro, nza bbɨ ná fø kpa ngʉ riti ndima kana, ‘I ri i kʉ mali si che dho ná ke. Anisi ko hwi ke hwi ndiro mali si che ko dho d’e.’ 8 Føro kpa løngʉe ke, kpa hwingʉe ke ndirigoti kpa drrngʉe ke drr divai dhi nza nǎ ro. 9 Nde, divai ba nganga ká si rinji ngbǎ? Ke si kʉ si ndirigoti ke si nza bbɨ ná fø kpa cheche ndirigoti ke si divai dhi nza bbʉ d’i kpa dhona. 10 Ni ká d’erie ndi ndini ná i lo ro zø nzá? Ri ndini: ‘Bu dza chi ná kpa bungʉe ná dju i vengʉe ngʉ dza kób’ɨ djó bbò dju.* 11 Fø lo si Yova* dhó ro ndirigoti ri kʉ ké ka ndi ké le nanga ná lo ko nyǒ djó.’”

12 Nga ndi ná kpa ma, bbakuhani djó bbobbonga ma na jingʉeri ndima lø ke lø, dhonalo kpa famungʉeri nari kʉ ke ngʉ loti ndima djo fø loroji chulu. Ro, kpa ngʉ birobiro kʉ ná ndrŭ do nji nari dho, kpa bbangʉe ke bba ndirigoti kpa rangʉe ra.

13 Luti kpa chongʉe nja Bbafarisayo ma, Herodi unakpa ma na ke dhi ngana ndiro ndima lø ke, ke tso nǎ lo chulu d’e. 14 Kpa si ro, kpa pongʉeri ke ni: “Mwalimu, ko churi chu ni adi bbʉbbʉ kʉ ná lo po ndirigoti ni nzɨ rine ni tso uni ndrŭ na ri dhonalo kʉ, ni nzɨ ndrŭ nja ndrŭ nyǒ djó nga ró ri, ro ni ddi Mungu djo nari kʉ bbʉbbʉ kʉ ná lo. Nde, Kaisari dhó palata le wø nari tso ká uni u inga nzá? 15 Ko ká ka ko wø ri wø inga nzá?” Yesu d’ingʉe kpa kʉ aro kùdjo dyʉ* nari utso ro, ke pongʉeri: “Ni ká ma mbu addudho? Anibbʉ dinari* ro ddikpa ma nja di.” 16 Føro kpa singʉe ri na ddikpa ke dhona ndirigoti ke dhungʉeri kpa tso: “I ri ká kʉ ie ró ji ndirigoti ri djó kʉ ná i lo ká ie ndi?” Kpa ngʉngʉe logoti: “Kaisari.” 17 Føro Yesu pongʉeri: “Anibbʉ Kaisari dzá ritsi Kaisari dho, ndirigoti Mungu dzá ritsi Mungu dho.” Føro kpa nanga kengʉeni ke kedzá lo dho.

18 Føro, nzá urie gadha ná kpa, Bbasadukayo singʉe ke dhi ngana ndirigoti kpa dhungʉeri ke tso: 19 “Mwalimu, Musa ndingʉeri ko dho nari kʉ, njati ddikpa ke dhi djona dhe nga dzá nzø ro ndirigoti kebbá le i má shi ró, fø ke dho ringani ndi kø ndidhi djona bba ná fø le ndiro ndi liri ndidhi djona nǎ gø rá anzi d’e.’ 20 Ddikpa kpetsi kpa ngʉe ndima bbá ro 7. Føro ya kwanza ke køngʉe dhɨ, ro ke dhengʉe nga dzá nzø ro. 21 Føro ya pili ke køngʉe fø le, ná fø ke maddi dhengʉe nga dzá nzø ro. Ndirigoti ya tatu ke ró maddi ri njingʉeni fø. 22 Saba kʉ ná fø kpa krʉ nzá bbangʉe nzø ro ri. Ndirigoti mwisho, isɨle gʉ ma dhengʉe dhe ddi. 23 Nde, ga ndrŭ ve di ga ná dyi, fø kpa kana ká fø le si che ie dho? Dhonalo 7 kʉ ná fø kpa krʉ køngʉe le kø.” 24 Yesu ngʉngʉe logoti kpa dho: “Ri ká kʉ nga føri dho i ni shani ri? Dhonalo ni chu ndi ndini ná lo ma nzá ddi ndirigoti Mungu dzá kpakpanga ma nzá ddi? 25 Dhonalo gadha dhi saa na, kpetsi kpa ma, isɨ ndrŭ ma na si ndima ro kø nzɨ dhonalo kpa sie malaiká bbai ra nǎ. 26 Che cheni ná ndrŭ dhó gadha djo Mungu pongʉe ni dho ná i lo ro ká ni d’erie zø nzá Musa dzá buku nǎ, kpelé dhi kúkú djo tilo ná lo nǎ: ‘Ma kʉ Abrahamu dzá Mungu, Isaka dzá Mungu ndirigoti Yakobo dzá Mungu’? 27 Ke kʉ shi di ná ndrŭ dhi Mungu, nga che cheni ná ndrŭ dhi Mungu ri. Ni shani bbo.”

28 Chøchø ngʉe føga ná nga ndi ná ddikpa ke rrngʉe kpa ddani ndima kana nari rr. Ke njangʉe Yesu ngʉ logoti kpa dho bblo nari ro, ke dhungʉeri Yesu tso: “Ya kwanza* kʉ yadha kana nari ká kʉ ngbá ri?” 29 Yesu ngʉngʉe logoti: “Ya kwanza yadha kʉ: ‘Arr di, Ee Israeli, Yova* kodhi Mungu kʉ ddikpa dhé kʉ ná Yova,* 30 ndirigoti ringani ni ji Yova* nidzá Mungu ni thí nǎ ro krʉ, nidhó nafsi* na krʉ, nidzá ngaddidha na krʉ, ndirigoti nidzá kpakpanga na krʉ.’ 31 Ya pili ri kʉ, ‘Ringani ni ji ni lai ni nganga ni ji nari bbai.’ Fø yadha djolu da ná yadha ro nga kʉ ri.” 32 Nga ngʉ adi ndi ná fø ke pongʉeri: “Mwalimu, ni po bblo pli kʉ ná lo, ri tso gbani gba bbʉbbʉlo na. ‘Ke kʉ Ddikpa dhé ndirigoti ke bbai kʉ ná nja d’i ke ki ro nga kʉ ri.’ 33 Ndirigoti ke le ji le thí nǎ ro krʉ, ledhó nyodyu na krʉ, ledhó kpakpanga na krʉ, ndirigoti le lai le ji le nganga bbai, ná føri dada bɨ le bɨ ná bbʉdha krʉ ma, nja bbʉdha ma na djolu.” 34 Yesu njangʉe ke ngʉ logoti nyodyu na nari ro, ke pongʉeri ke dho: “Ni nga kʉ da Mungu dhó Pidhinga ró ro ri.” Fønga djó ro nzá ddikpa le ma bangʉe klø ki ro ddi nja ndi dhunga ro ke tso d’e ri.

35 Ro, hekalu nǎ Yesu ngʉ longaddi ro, ke pongʉeri: “Nde, nga ndi ná kpa ká adi ripo Kristo kʉ Daudi dhi dduna addudho? 36 Roho dda chutso ndi dho ro Daudi pongʉeri, ‘Yova* pongʉeri madzá Bboke dho: “Adi ma thó thá djó ri laidjo kpø ma nidhó mbubai li ni kó tsena ná nga djo.”’ 37 Nde, rie Daudi nganga i nzi ke ndidzá Bboke ri ró, føro ká ke kʉ Daudi dhi dduna ngbaribbai?”

Birobiro kʉ ná ndrŭ ngʉ ke rr hwè na. 38 Longa ke ngʉ ddi ro ke pongʉeri ki: “Anib’o ni ronga nga ndi ná kpa ró, ndima ró dadá robe na ndima bbí ro, kpa jiri ndrŭ di ndima ronga zʉ soko lu, 39 sinagogi lu kpa adi riji ndima di anziro* kʉ ná kiti djolu ndirigoti ngasdjó nyo dhi saa na, kpa adi riji ndima di bbo pli kʉ heshima dhi ri ná ngana. 40 Che bbá kpetsi kpa cheni ná isɨ ndrŭ dhó ritsi kpa sø krʉ, kpa dadá kʉ ná sala nji ndrŭ nja ndima d’e.* Kpa djo le si lod’i che bbo.”

41 Føri goti ke dingʉe bbʉdha ndrŭ ngʉ adi li na ná no nji ndirigoti ke ngʉ ngbaribbai ma ndrŭ mbø djó fø no na nari nja. Mali dhi bí kʉ ná kpa ngʉ mbøkpa djó no na bíbí. 42 Føro dhe bbá ke dhe ná njedha kʉ ná ddikpa le singʉe ndirigoti le djongʉe sese pli dhó valer kʉ ná rere mbøkpa* djú aro ri na. 43 Føro ke nzingʉe ndi unakpa ro, ke pongʉeri kpa dho: “Bbʉbbʉ dhé ma ripo ni dho, dhe bbá ke dhe ná njedha kʉ ná afø le li bbʉdha dhi no nǎ ná mbø dada nja ndrŭ krʉ li nari djolu. 44 Dhonalo nja ndrŭ krʉ bbʉ nari ndrŭ bbʉ ndima dhó nì kʉ nari kana ro. Ro, nì mai ndi kʉ njedha ro, fø le bbʉ ndidhó e nari krʉ, shi le di d’e ka ndi b’oe le ronga nari le bbʉ krʉ.”