Marko

3 Føri goti Yesu ki tsungʉe ddikpa sinagogi na ndirigoti fø dzá ngʉe dyu thó dyu* ná ddikpa ke. 2 Føri dho, kpa ngʉ ke nja chøø ndiro ndima nja ke ká ka ndi gø fø ke gø Sabato ddo dyina nari, ndiro ndima bbø ke d’e. 3 Ke pongʉeri d’yu thó d’yu* ná fø ke dho: “Adani, asi ndrŭ kana kati na.” 4 Føri goti Yesu dhungʉeri kpa tso: “Ri tso ká uni u le njí bblolo inga chelo, le gø shinga* inga le hwi ndrŭ Sabato ddo dyina?” Ro, kpa gongʉe ddi. 5 Yesu njangʉe ndi ronga tso d’e ná ndrŭ thø na, ndirigoti ke bangʉe njedha bbo kpa thí dyu kpakpa nari dho. Ndirigoti ke pongʉeri fø ke dho: “Adda ni thó nanga.” Føro ke dda ndi thó nanga ro, ke thó gøngʉe thei. 6 Bbafarisayo vʉngʉe bbaidjo ndirigoti føro thei kpa njungʉe ndima tso Herodi unakpa ma na ndiro ndima ba Yesu ndima hwi ná chu d’e.

7 Ro, Yesu ma, ndi unakpa ma na rangʉe dda tso ro ndirigoti bí kʉ ná ndrŭ kpari rangʉe ke ulu Galilea ma, Yudea ma na nǎ ro. 8 Føri goti Yerusalemu ma, Idumea ma, Yordani tsotso lu kʉ ná ndrŭ ma, ndirigoti Tiro ma, Sidoni ma na nǎ ro maddi bí kʉ ná ndrŭ kpari singʉe ke dhi ngana, ndrŭ rrngʉe ke ngʉ nji ná bí kʉ ná lo nari dho. 9 Ndirigoti ke pongʉeri ndi unakpa li sese kʉ ná ddikpa bbú ndi dho ndiro nzɨ birobiro kʉ ná ndrŭ ndi nanga b’ʉ ró. 10 Ke gøngʉe bí kʉ ná ndrŭ nari dho, che bbo kʉ ná dhe kʉ ró ná ndrŭ ngʉ ndima tso nju ke ro lu ndiro ndima lø ke ronga d’e. 11 Ke ndima nja ná saa na, gó ma krʉ ngʉ adi koni ke nji ndirigoti ri ngʉ adi ndima nanga jø: “Ni kʉ Mungu Ddù.” 12 Ro, bí ina ke ngʉ adi rija ri dho li ndi li ndi dyu ro nari kʉ, nzɨ ri d’ra ndi ká kʉ ie nari.

13 Yesu djingʉe ddikpa ngøtsɨ djo ndirigoti ke nzingʉe ji ndi ji ná ndrŭ ndirigoti fø ndrŭ singʉe ke dhi ngana. 14 Fø goti ke vʉngʉe 12 kʉ ná kpa, ná fø kpa ró dho ke nzingʉe cho le cho ná kpa. Fø kpa ke vʉngʉe kpa di ndi goti mba d’e ndirigoti ke ka ndi sie kpa cho kpa rá lod’ra d’e, 15 ndirigoti kpa é bbonga na ndima pʉ gó d’e.

16 Ndirigoti 12 ke vʉngʉe ná fø kpa kana ngʉe Simoni, Petro maddi ke lingʉe ndi ró dho ro. 17 Yakobo Zebedayo ddù ndirigoti Yakobo dhi djona Yohani (fø kpa ró dho ke dhongʉe Boanerge, ná føri na mana kʉ “Vo ddui”), 18 Andrea, Filipo, Bartolomayo, Matayo, Tomas, Yakobo Alfayo ddù, Tadayo, Simoni Mukananayo,* 19 ndirigoti Yuda Iskariote, luti ndi dzingʉe Yesu nanga ro.

Luti ke tsungʉe ddikpa dza na, 20 ndirigoti birobiro kʉ ná ndrŭ gbangʉe ndima tso ki dhé, nari dho nga kpa nyo ná nga kpali ma nga ddi ngʉe ri. 21 Ro, ke ma bbá ndrŭ rr fø lo ro, ndrŭ singʉe ndiro ndima lø ke d’e dhonalo ndrŭ ngʉ ripo: “Ke djǒ ngbʉni ngbʉ.” 22 Godhé, Yerusalemu nǎ ro thʉngʉe ná nga ndi ná kpa ngʉ ripo: “Ke nǎ kʉ Belzebuli* ndirigoti ke gó di gó djó bbonga dhó kpakpanga na.” 23 Føri dho, ke nzingʉe kpa ndi dhi ngana ndirigoti ke tingʉe lo kpa dho loroji chulu ɨ ndi ripo ro: “Shetani ká ka ndi di Shetani ngbaribbai? 24 Njati ddikpa pidhinga nanga ndoni ndó ró, fø pidhinga nzá ka ndi tøni ri. 25 Ndirigoti ddikpa dza nanga ndoni ndó ró, fø dza nzá ka ndi tøni ri. 26 Føri bbai, Shetani di là nji ndi tso ró ró, føro ke nanga ndoni ndo ndirigoti ke nzá ka ndi tøni ri, ro føri kʉ d’ø ke tso d’ø ri. 27 Bbʉbbʉ dhé, ie ro ma nzá ddi ka ndi tsu kpakpa kʉ ná ddikpa ke bbá dza na ndirigoti ndi d’u kebbá dza nǎ ritsi nzá ndi chi ke chi i vi ró ri. Ke njiri fø ró dhé ke ka ndi sø kebbá dza nǎ no. 28 Bbʉbbʉ dhé ma ripo ni dho, ndrŭ nji ná krʉ kʉ ná chenga zø si njini nji, rie ngbá chenga ma kpa nji inga ngbà di ná dhú ma kpa dhu ri ró. 29 Ro, roho takatifu dhu ná ke dhó chenga zø ro nzɨ njini ri, ro kedhó chenga di cho ró nŭnŭ.” 30 Fø lo ke pongʉe dho nari kʉ, kpa ngʉ ripo ɨ: “Ke nǎ kʉ gó.”

31 Føro kedzá mama ma, ke djoi ma na singʉe ndirigoti kpa ngʉ tøni bbaidjó ro, kpa chongʉe ddikpa ke ndi rá ke nzi d’e. 32 Ke ro lu birobiro kʉ ná ndrŭ kpari dingʉe ndirigoti ndrŭ singʉe rid’ra ke dho: “Anja! Nidzá mama ma, ni djoi ma na kʉ bbaidjó ndirigoti kpa ni ne.” 33 Ro, ke ngʉngʉe logoti kpa dho: “Madzá mama ma, ma djoi ma na ká kʉ ie ma?” 34 Føro ke njangʉe ndi ro lu gbrú di ná ndrŭ kpari ro, ke pongʉeri: “Aninja, madzá mama ma, ma djoi ma na kʉ ena! 35 Ddikpa ke di Mungu ji ná lo nji ró, føri i kʉ madhi djona ma, madhi vena ma, madzá mama ma na.”