Ya kwanza Petro ndi ná barua
1 I barua si ma Petro, cho Yesu cho ná ke dhó ro ndirigoti ri ma ndí pli nanga plini Ponto ma, Galatia ma, Kapadokia ma, Asia ma, Bitinia ma na lú ná ndrŭ dho. Bbʉbbʉ dhé, nì kʉ d’i ngø nǎ di sese saa kana ná ndrŭ bbai, vʉ le vʉ nì 2 Mungu, Baba dhó gosi ná lochudha dhi kpakpanga ró ro ro. Ke lingʉeri nì tsetse roho chulu ndiro nì rrnga ndirigoti ndi yi Yesu Kristo dzá ju nì djo d’e:
Aniba nzá tso ka ndi koe le djo ná zølo ma, ngoi ma na bbo pli.
3 Kodhi Mungu ndirigoti kodhi Bboke Yesu Kristo dzá Baba ba madha, dhonalo kedzá bbo pli kʉ ná zølo chulu ke lingʉeri ko ki gøni wø shi di ná ngab’odha dho, Yesu Kristo ga che cheni ná ndrŭ kana ro nari chulu; 4 ndiro ko ba nzá ka ndi sani, nga ró muchafu kʉ ndirigoti nzá ka ndi d’yu ná wɨ ritsi d’e. Fø ritsi le li ra nǎ ni dho, 5 ni ronga Mungu b’o ndidhó kpakpanga chulu nidhó udha djotsina, tayari kʉ ndi dhoni ngatso d’ø ná saa na ná gødha dho. 6 Føri dho nì kʉ hwè na bbo, nì mai ringani nì ro nzani njonjo kʉ ná kpakpalo dho sese saa kana ro. 7 Or le mbu kazz na nari goti, ri ka ndi sani sa maddi, ro nidhi udha tsu mbudha na nari goti, ri e mana na bbo, ri ka ndi liri ni ba madha ma, kadha ma, heshima ma na Yesu Kristo si dhoni ná saa na. 8 Nzá mai nì d’erie ke ro nja ro, nì ji ke ji. Nzɨ mai nì ke nja njʉ ro, nì adi udha dhǒ ke nǎ ndirigoti nì adi hwè ba bbo ke dzá lo dho, ná fø hwè kʉ nzá nanga ro ka ndi tuni ná ngatsi ndirigoti bbo pli, 9 dhonalo nì si gødha ba nidhi udha djotsina.
10 Fø gødha djo bbanabi nengʉe lo nanga klø na ndirigoti li ndima li ndima d’yu ro, ni dho le lingʉe ná nzá tso ka ndi koe le djo ná zølo djo ndima ngʉ lod’ra ná saa na. 11 Anziro dhé, Mungu dzá roho takatifu d’rangʉeri kpa dho nari kʉ, Kristo sie nzani nza nari goti ke sie madha ba. Føri dzá lo dho i kpa ngʉ rine ndima chu Kristo ká ngbá lo sie ba ndirigoti ri ká sie njini ngbá saa na ma nari. 12 Ri d’rangʉeni kpa dho nari kʉ kpa nzɨ ngʉ lod’ra ndima dho ri, ro ni dho; ndirigoti kpa d’rangʉe nari kʉ ra nǎ ro si ná roho takatifu chulu d’rangʉe hwè dhi lo-i ni dho ná kpa d’rangʉe ná lo. Ndirigoti malaiká maddi adi riji bbo ndima chu lo fø lo djo.
13 Føri dho, anidi tayari njí njidha dho; anib’o nidhó akili ronga bblo; anili nidhó ngab’odha Yesu Kristo si dhoni ná saa na le si bbʉ nì dho ná nzá tso ka ndi koe le djo ná zølo djo. 14 Nì ngarr ná nzø bbai, anibba drrdrr nzá ni d’engʉe lochu ro ni ngʉ nji ná lo ulu ni mbeni nari tso, 15 ro, nzinzi ni ná ke kʉ takatifu nari bbai, ni nganga dho maddi ringani ni ngʉ takatifu nidhó nyi krʉ kana, 16 dhonalo ri ndini: “Ni dho ringani ni é takatifu, dhonalo ma kʉ takatifu.”
17 Rie nzɨ ndi ndrŭ nanga krø ro adi lod’i nja le ddiro djo ke nji ná lo ró ro ná Baba tsó ni nganzi ri ró, anibbari ni nji ná lo dhori ni Mungu do nji nì, sese saa dho ni ro kʉ i dz’ djó nari kana. 18 Dhonalo ni churi chu, ni nzá le klongʉe ni bbui bbangʉe ni dho ná nga na mana kʉ ná maisha nǎ ro sa ka ndi sani ná ritsi na ri, ná føri i kʉ feza inga or. 19 Ro, ni le klongʉe Kristo ró bbo ró dzi kʉ ná ju na, ná fø ju ngʉe nga ró tsù* ndirigoti nga ró muchafu ro kʉ ná chembø dzá ngba ró ju bbai. 20 Bbʉbbʉ dhé, ke le vʉngʉe drrdrrnga djó ró, dz’ dherr le li nari njí, ro ke le ve ra dho nidhi bblonga dho ngatso d’ø ná saa na. 21 Ke chulu ni u ga gángʉe ke ndirigoti kadha bbʉngʉe ke dho ná Mungu, ndiro nidhi udha ma, ngab’odha ma na é Mungu nǎ d’e.
22 Kpadjo nì liri nì* tsetse bbʉbbʉlo dho nì ngarr nari chulu; ná føri liri nì jini nì kana nga nì kʉ aro kudjo dyʉ ro nari bbai; anijini bbo pli nì kana, nì thí nǎ ro krʉ. 23 Nì ki gøngʉeni wø, nga sa ka ndi sani ná nyo kpa* chulu ri, ro nzá ka ndi sani ná ri chulu; føri i kʉ shi kʉ ndirigoti theinga dho di ná Mungu dzá lo. 24 Dhonalo “ndrŭ krʉ kʉ ddiddi tsó bbai, ndirigoti ndrŭ ró d’a kʉ nza gʉ maua bbai; tsó adi d’yud’yu ndirigoti ri djó maua adi d’røni d’rø, 25 ro Yova* dzá lo adi di theinga dho.” Ndirigoti fø “lo” kʉ ni dho d’rangʉeni ná hwè lo-i.