Matayo

13 Fø dyi Yesu tungʉeni abba ro ndirigoti ke rangʉe di jʉdda tso ro. 2 Føro birobiro kʉ ná ndrŭ kpari gbangʉe ndima tso ke kuso ná saa na, ke djingʉe bbú na ndirigoti ke dingʉe ri na, ndirigoti fø ndrŭ krʉ ngʉ tøni dda tso ró. 3 Føro ke ngangʉe bí kʉ ná lo ndi ddi kpa dho loroji chulu nari tso. Ke pongʉeri: “Ngazʉ ná ke rangʉe ngazʉ. 4 Nyo ke ngʉ zʉ ro, nja nyo-kpa d’røngʉeni chu tso ro lu ndirigoti rè singʉe ro, rè chongʉe fø ri chó. 5 Nja ri d’røngʉeni dju djo, nga dz’ ndí-tso kʉ bbo ná ngana. Ndirigoti ri ngangʉe tse dhonalo føga nga dz’ ndí-tso ngʉe bbo ri. 6 Ro, dyi kangʉe ná saa na, dyi bɨngʉe ri bɨ ndirigoti ri dyungʉe dyu dhonalo ri tɨtɨ ro nga ngʉe ri. 7 Føri goti nja ri d’røngʉeni kpelé kana, føro kpelé dhi ná saa na, ri chingʉe ri chi. 8 Godhé, nja nyo-kpa d’røngʉeni bblo kʉ ná dz’ djo, ndirigoti ddikpa ri ongʉe ndi kpa 100 ina, nja ri ongʉe ndi kpa 60 ina ndirigoti nja ri ongʉe ndi kpa 30 ina. 9 Nì bɨ kʉ ná le rr fø lo rr.”

10 Føro ke unakpa singʉe ke dhi ngana ndirigoti kpa dhungʉeri ke tso: “Ká addudho ni loti kpa dho loroji chulu?” 11 Ke ngʉngʉe logoti kpa dho: “Ni dho ritso uni u ni famu ra nǎ Pidhinga dzá takatifu siri, ro nga kpa ri. 12 Dhonalo nì dhó ritsi kʉ ná ke dho le si ritsi ki ndrindri ndirigoti kedhó ritsi sie bbo pli; ro nga dhó ritsi kʉ ná ke dhó ro le si nì kʉ kedhó nari ma dzidzi ddi. 13 Ri kʉ føri dho i ma loti kpa dho loroji chulu ri, dhonalo kpa nyǒ i kʉ nì, ro ri nzɨ nga ro nja ri; kpa bɨ ma kʉ ddi, ro ri nzɨ nga ro rr ri ndirigoti kpa nzɨ lo ro famu ri. 14 Føri chulu nabi Isaya pongʉe ná i lo njini kpa djo: ‘Bbʉbbʉ dhé, ni si ngarr, ro ni rr ná lo nanga i nzɨ si rrni ni dho ri; bbʉbbʉ dhé, ni si nganja, ro ni nja ná lo i nzɨ ni si famu ri. 15 Dhonalo i ndrŭ tsɨ thí ronga ro nzɨ lo lø ri, kpa dya ndima bɨ tso dya, kpa b’i ndima nyǒ tso b’i ndiro nzɨ ndima njanga ró, nzɨ ndima bɨ rrnga ró, nzɨ ndima thí lo famu, ndirigoti nzɨ ndima ngʉ ma dhi ngana nja nzɨ ma ndima gø ró.’

16 “Ro, hwè na kʉ nari kʉ ni nyǒ dhonalo ri nganja nja, ndirigoti ni bɨ dhonalo ri ngarr rr. 17 Dhonalo, bbʉbbʉ dhé ma ripo ni dho, bí kʉ ná bbanabi ma, chølo dhi ndrŭ ma na nengʉeri ndima nja ni nja ná fø lo, ro kpa nzá njangʉe ri ro ri ndirigoti ndima rr ni rr ná fø lo, ro kpa nzá rrngʉe ri ro ri.

18 “Kpadjo anirr ngae zʉ ná ke dhó loroji na mana. 19 Njati ddikpa ke rr Pidhinga dzá lo ndirigoti ke famu ri na mana nzá ró, che kʉ ná ke si ndirigoti ndi tu ke thí nǎ le zʉe ná lo; føri i kʉ chu tso ro d’ee ná nyo-kpa. 20 Ndirigoti dju djo d’ee ná nyo-kpa kʉ, lo ndi rr ro, u lo thei hwè na ná ke. 21 Ro, ri tɨtɨ e ke nǎ nga nari dho, ke ro tøni sese saa kana dhé, ro mbudha ma, ndrŭ le nzá lo djotsina nari ma na banga ná saa na, ke thí bʉni thei. 22 Kpelé kana d’ee ná nyo-kpa kʉ Mungu dzá lo rr ná ke, ro, i dz’* djó d’od’o ma, mali le sha na ná kpakpanga ma na ra sisi ke rr e ná fø lo djolu, ná føri dho ri nzá o ndi kpa ri. 23 Bblo kʉ ná dz’ djo d’ee ná nyo-kpa kʉ, lo ndi rr nari goti, ngbà famu lo ná ke ndirigoti ke nga ndi kpa odha tso, ddi ri 100 ina, nja ri 60 ina ndirigoti nja ri 30 ina.”

24 Føri goti ke bbʉngʉe nja loroji ki kpa dho, ke pongʉeri: “Ra nǎ Pidhinga le ka le ddi bblo kʉ ná nyo-kpa zʉngʉe ndibbá nza gʉ ná ke na. 25 Føro ddo ndrŭ ddo ro, kedhó mbuba singʉe che kʉ ná tsokpa zʉ kedhó ngano kalu ndirigoti mbuba rangʉe ra ndi dho. 26 Ngano ngangʉe ndirigoti ri ongʉe ndi kpa ná saa na, che kʉ ná tsó maddi pʉngʉe ndi ri kalu. 27 Føro njí dhi kpa singʉe ndima dhi Bboke dhi ngana ndirigoti kpa dhungʉeri ke tso: “Bboke, ni ká zʉe bblo kʉ ná nyo-kpa nidhó nza gʉ nzá? Nde, føro che kʉ ná tsó ká si ngbaga ro? 28 Ke pongʉeri, ‘Ri kʉ mbuba kʉ ná ddikpa ke i nji fø lo ri.’ Føro njí dhi kpa dhungʉeri, ‘Ni ká jiri ko rá fø tsó hwahwa?’ 29 Ke pongʉeri, ‘Nzɨ, dhonalo njaro che kʉ ná fø tsó ni hwa nari ró, ni ka ni rá ngano hwa. 30 Anibbari ri krʉ dhi ddinga kpø nyo tso njudha dhi saa si ná nga djo. Ndirigoti ma si kʉ ripo nyo tso nju ná kpa ni: “Ya kwanza, aninju che kʉ ná tsó tso i vi, ndirigoti anichi ri tso le bɨ ri kazz na d’e, føri goti i anive ngano tso nju ndiri ni li madhó depo na d’e.’”

31 Føri goti ke bbʉngʉe nja loroji ki kpa dho, ke pongʉeri: “Ra nǎ Pidhinga kʉ ddiddi haradali dhi tsu-kpa ddikpa ke dzì nari ke ra zʉ ndidhó nza gʉ nari bbai.” 32 Ri kʉ tsu-kpa krʉ kana sese pli kʉ ná ri. Ro, ri ve dhi ró, ri adi dada í nǎ tsó krʉ djolu. Ri adi ngʉ tsú ndirigoti rakpa ró rè adi ndima dhó dza chi ri ró lerr kalu.

33 Ke bbʉngʉe nja i loroji ki kpa dho: “Ra nǎ Pidhinga kʉ ddiddi ddikpa isɨle dzì thì* nari le te gbo ina le ddi bbobbo* ná farine na, kpø fø dzi lú ra pɨpɨ ná nga djo nari bbai.”

34 Fø lo krʉ Yesu tingʉe ndrŭ dho loroji chulu. Bbʉbbʉ dhé, ke nzɨ ngʉ lo ro ti ndrŭ dho ngadhi loroji ro ri, 35 ndiro nabi chulu pongʉeni ná i lo njini d’e: “Ma si loti kpa dho loroji chulu, ma si anziro nga djó ro rungʉeni ná lo d’ra kpa dho.”

36 Birobiro kʉ ná ndrŭ ra nari goti, ke tsungʉe adza. Føro ke unakpa singʉe ke dhi ngana ndirigoti kpa pongʉeri ke ni: “Atu nza gʉ che kʉ ná tsó dhi loroji nanga ko dho di.” 37 Ke ngʉngʉe kpadhó logoti: “Bblo kʉ ná nyo-kpa zʉe ná føri kʉ ndrŭ Ddù, 38 nza kʉ dz’. Bblo kʉ ná nyo-kpa kʉ Pidhinga ddui, ndirigoti che kʉ ná tsó kʉ che kʉ ná ke ddui, 39 Che kʉ ná fø tsó zʉe ná ke kʉ Diabolo, nyo tso njudha dhi saa kʉ i dz’* djó lo tso si d’ø ná saa ndirigoti nyo tso nju ná kpa kʉ malaiká. 40 Che kʉ ná tsó le adi sø ndirigoti le bɨ ri bɨ nari bbai, i dz’* djó lo tso si d’ø ná saa na maddi ri si kʉ njini fø. 41 Ndrŭ Ddù si ndidzá malaiká cho ndirigoti kpa si nja ndrŭ thí bʉ ná ndrŭ ma, nzɨ yadha dyø ná ndrŭ ma na krʉ tso d’ød’ø kedhó Pidhinga tsena ro. 42 Kpa si kʉ fø ndrŭ bu bbo rø ná kazz na. Følu i ndrŭ ka ve di dzzdzz ndirigoti ndima kudjo kǎ. 43 Fø saa na chølo dhi ndrŭ si kakǎ dyi bbai ndima dhi Baba dhó Pidhinga nǎ. Nì bɨ kʉ ná le rr fø lo rr.

44 “Ra nǎ Pidhinga kʉ ddiddi ddikpa nza nǎ runi ná mali bbai; ddikpa ke ba ri ndirigoti ke ru ri ki vi. Føro ke kʉ na ná hwè dzá lo dho, ke ra ro, ke dzi ndidhó ritsi nanga krʉ ndirigoti ke dzi fø nza.

45 “Ra nǎ Pidhinga kʉ ddiddi bbo d’ani ná rǎ-kpa ne ná turusa nji ná ke bbai. 46 Bbo ró dzi kʉ ná rǎ-kpa ke ba nari goti, ke ra lele ro, ke dzi ndidhó ritsi nanga krʉ ndirigoti ke dzi fø rǎ-kpa.

47 “Godhé, ra nǎ Pidhinga kʉ ddiddi dda nǎ le djo bbè-mbi nari bbai ndirigoti ri gba njonjo kʉ ná bbè tso ndi nǎ. 48 B’lo bbè li pɨ ri na nari goti, bbè pɨ ná kpa drr ri dda tso ro, føri goti kpa di gʉna ro, kpa vʉ bblo kʉ ná bbè d’yó* na ndirigoti kpa bu nga kʉ bblo ná bbè bu. 49 Føri i kʉ i dz’* djó lo tso si d’ø ná saa na si ngaba ná lo. Malaiká si ndá chelo nji ná ndrŭ ma kana nga ndo chølo dhi ndrŭ na, 50 ndirigoti kpa si kʉ fø ndrŭ bu bbo rø ná kazz na. Følu i ndrŭ ka ve di dzzdzz ndirigoti ndima kudjo kǎ.

51 “Ni ká famu fø lo krʉ na mana ngbà?” Føro kpa ngʉngʉe logoti: “Ngbào.” 52 Føri goti ke pongʉeri kpa dho: “Ra nǎ Pidhinga djo le ddi lo ddikpa mwalimu dho nari goti, ke kʉ ddiddi ddikpa dza dhi bboke bbai, wø mali ma, drrdrr mali ma na ndi pʉ ndidhó depo nǎ ro ro.”

53 Fø loroji bbʉdha tso Yesu dya nari goti, ke rangʉe ra føga ro. 54 Ndima bbá eneo na Yesu ngʉ nari goti, ke ngangʉe longaddidha tso ndrŭ dho, ndrŭ dhó sinagogi nǎ. Ndrŭ nanga kengʉeni bbo ndirigoti ndrŭ ngʉ ridhu: “I ke ká ba fø nyodyu ma, ddù njidha dhi kpakpanga ma na ngbaga ro? 55 I ri ká kʉ nga mbawa na adi ritsi thɨ ná cha ke ddù ri? Kedzá mama ró dho ká kʉ nga Maria ri? Ndirigoti ke djoi ká kʉ nga Yakobo ma, Yosefu ma, Simoni ma,Yuda ma na ri? 56 Ndirigoti ke vei ká kʉ nga krʉ iga ko kana ri? Nde, fø lo krʉ ká ke ba ngbaga ro?” 57 Føri dho, ndrŭ gʉngʉe ke ndima u nari gʉ. Føro Yesu pongʉeri kpa ni: “Nabi dho ndrŭ adi heshima bbʉ krʉ nga lu, ro ke ma bbá eneo ma, ke ma bbá adza ndrŭ ma na dhé nzɨ adi heshima bbʉ ke dho ri.” 58 Føri dzá lo dho, ke nzá njingʉe ddù ro bí fø eneo nǎ ri dhonalo ndrŭ ro nga ngʉe udha na ri.