Roma

1 Paulo, Yesu Kristo dzá noke, ke le nzingʉe ndi é cho le cho ná ke ndirigoti ke le tungʉe d’i ndi d’ra Mungu dzá hwè lo-i d’e. 2 Fø lo djo Mungu tsongʉeni drrdrrnga djó ro ndidzá bbanabi chulu ndi ndini ná takatifu kʉ ná lo nǎ, 3 ndidhi Dduna djotsina, le ndí chulu ndi singʉe Daudi nǎ gø nǎ ro ro; 4 ro, kpakpanga chulu, ke nzingʉeni Mungu dhi Dduna takatifu kʉ ná roho chulu, che cheni ná ndrŭ kana ro ndi ga nari na, bbʉbbʉ dhé føri kʉ Yesu Kristo, kodhi Bboke. 5 Ke chulu ko ba nzá tso ka ndi koe le djo ná zølo ndirigoti cho le cho ná kpa le kʉ nari, ndiro krʉ kʉ ná ndrŭ tsɨ u ke ndirigoti ndrŭ rrnga ke dho ke ró madha dhi dho djotsina d’e. 6 Fø ndrŭ tsɨ kana ro ni ma nzini ddi ndiro ni ché Yesu Kristo dho d’e— 7 i lo ndini Roma nǎ ji Mungu ji ná ndrŭ krʉ dho, nja ndima é takatifu d’e le nzi ndima ro:

Aniba kodhi Baba Mungu ndirigoti Bboke Yesu Kristo dhó ro si ná nzá tso ka ndi koe le djo ná zølo ma, ngoi ma na.

8 Krʉ lo njí, ma mbai po madzá Mungu dho Yesu Kristo chulu nidhi lo djotsina, dhonalo nidhi udha dhi lo ga dz’ djolu gble. 9 Ma adi njínji Mungu dho ma thí nǎ ro krʉ kedhi dduna djo kʉ ná hwè lo-i ma d’ra nari chulu, ndirigoti Mungu churi chu nari kʉ, ma nzá bba ni ró dho ma ti madzá sala nǎ nari tso ro ri. 10 Fø sala nǎ ma adi rinzi ri kaka ma si ni dhi ngana, njati rie ngbà Mungu jiri ró. 11 Dhonalo ma jiri bbo ma si ni nyi nja, ndiro ma bbʉ kiroho nǎ kado ni dho, nja ni tøni kpri d’e. 12 Inga føri ró ro njonjo, ndiro ko li ko kpakpa ko kana nja ke ddiro dhó udha chulu, nidhi ri ma, madhó ri ma na d’e.

13 Ro le-djoi, nzá nga ma ji ni vi ná lo kʉ, ma jiri bí ina ma si ni dhi ngana ndiro ma d’ra ná hwè lo-i ó ndi kpa ni kana nja ndrŭ tsɨ kana ri ndi kpa ó nari bbai d’e. Ro, kpø kpadjonga djo ma tso choni cho. 14 Ma nǎ kʉ ddeni, føri kʉ Bbagiriki ma, d’i ngø nǎ ndrŭ* ma, nyod’yu dhi ndrŭ ma, nga kʉ nyod’yu na ná ndrŭ ma na dhi ddeni. 15 Føri dho, ma kʉ ù na bbo ma d’ra hwè lo-i ni dho maddi, Roma nǎ ni kʉ ro. 16 Ma djo nzɨ do ro adi pá hwè lo-i djotsina ri, dhonalo føri kʉ Mungu adi nì kʉ udha na ná ndrŭ krʉ gø chulu ná kpakpanga, Wayaudi i vi, føri goti i Bbagiriki. 17 Dhonalo føri chulu, Mungu dhó chølo adi dhoni udha chulu ndirigoti udha dzá lo dho, ddiddi ri ndini ná i ri bbai: “Ro, chølo dhi ke si di shi udha djotsina.”

18 Bbʉbbʉ dhé, Mungu dzá thø dhoni nzɨ Mungu do nji ná ndrŭ krʉ djo ndirigoti nzɨ chølo nji ná ndrŭ djo, bbʉbbʉlo tso ndima cho nga kʉ chø ná chu nǎ ro. 19 Dhonalo ngbà ka ndi chuni Mungu djo ná lo adi dhoni kpa kana pʉlʉpʉlʉ dho nari kʉ, ke adi ridho kpa dho pʉlʉpʉlʉ. 20 Dhonalo Mungu dhó nzɨ adi njani ná ledha,* bbʉbbʉ dhé, kedhó nzá tso ro d’ø ná kpakpanga ma, ke kʉ Mungu nari ma na njani pʉlʉpʉlʉ ngø ke no ná nga djó ro, dhonalo ri njani ke no ná ritsi chulu, ná føri dho kpa ka ndima soni ndima djó dho ná lo ro nga kʉ ri. 21 Ngbà mai kpa chungʉe Mungu ro, kpa nzá bbʉngʉe madha ke dho ndima dhi Mungu bbai ri ndirigoti kpa nzá pongʉe mbai ma ke dho ddi ri. Føri rɨngana, kpa ngʉngʉe rr ndima dhó ngaddidha kana ndirigoti kpa thí nzɨ ngʉ lo nanga ne ri nari dho, ri ngʉe tɨtɨnga nǎ. 22 Nì mai kpa ndima nji nyod’yu kʉ ri ro, kpa kʉ rr. 23 Nzá ka ndi dhe ná Mungu dho kpa bbʉe madha nari rɨngana, kpa madha bbʉ ché ka ndima cheni ná ndrŭ ró ji dho ndirigoti rè ma, tho kó kʉ ná zǎ ma, ndima badjo djó ddá ná zǎ ma na ró ji dho.

24 Ri kʉ føri dho i Mungu bba kpa kpa thí nǎ nzá tsetse ná tamaa dhó kpakpanga tsena ri, ná føri dho kpa nji ndima ndí na nari kʉ do ka ndi pá le djo ná ritsi. 25 Mungu dzá bbʉbbʉlo thika kpa wø kali na. Føri goti kpa Mungu no ná ritsi má ndirigoti kpa njínji ri dho ngano ná Ke rɨngana, ná fø ke i ringani le má cho ró nŭnŭnga dho. Amina. 26 Ri kʉ føri dho i Mungu bbari kpa nǎ nzɨ tso choni ná ngono* dhi ù nyó pi kpa djo ri. Dhonalo isɨ ndrŭ bba nó le no ndrŭ ro ringaeni ndima ddo kpetsi kpa na ná føri bba, ro ndrŭ ngono* nji nzá tso uni nari bbai. 27 Føri bbai, kpetsi kpa maddi bba nó le no ndrŭ ro ringaeni ndima ddo* isɨ ndrŭ na ná føri bba, ro kpa thí rørø ndima kana ndima lai kpetsi kpa d’yu dho ndirigoti kpa dopadha dhi lo nji ndima kana kpetsi ro. Ro, kpa si malipizi* ba kaka ná ngatsi ndima nji ná fø chelo djotsina.

28 Kpa gʉ Mungu nyi ndima chu nari gʉ* nari dho, Mungu bba kpa bba kpa rá anzi nga na mana kʉ ná ngaddidha na, ná føri dzá lo dho kpa nzá ringaeni le njí ná lo nji. 29 Fø di ná ndrŭ nanga lingʉe li nga kʉ chø ná lo krʉ ma, che pli kʉ ná lo ma, tamaa* ma, ndá le chelo nji nari ma, dda le nji nari ma, ndrŭ le hwi nari ma, le kana le gʉni nari ma, kali ma, che le njie ri ndrŭ ró ná ngaddidha ma, ndrŭ lo le ti nari ma, 30 chelo le ti ndrŭ djo nari ma, Mungu le ndro nari ma, dhú le dhu nari ma, nodha le nji nari ma, ngbe le le ngbé nari ma, che kʉ ná lo le kpe* nari ma, nzɨ le ngarr ledhó gø dhi ndrŭ dho nari ma, 31 nzɨ le lo famu nari ma, nzɨ le le tsoeni djo ná lo nji nari ma, bbʉbbʉ kʉ ná jidha ro kʉ le nǎ nga nari ma, ndirigoti nga zølo ro kʉ le nǎ nari ma na na. 32 Kpa churi bblo pli nari kʉ, Mungu pori fø di ná lo nji ná ndrŭ ringani le cheche; ro i fø lo njidha na kpa ra anzi nari kina, kpa hwè ba fø di ná lo nji ná ndrŭ dhi lo dho.