Matayo

7 “Anibba nja ndrŭ djo ni lod’i nari tso ndiro nzɨ lo si d’ini ni djo ró, 2 dhonalo ni lod’i ndrŭ djo nari bbai i le si lod’i ni djo, ni ritsi ddi ndrŭ dho nǎ ná no nǎ i le si ritsi ddi ni dho. 3 Ká addudho ni adjoni nyǒ nǎ kʉ ná kokoi nja, nzá ni d’e ni nyǒ nǎ kʉ ná tsú nja ro? 4 Inga ni ká ka ni pori adjoni dho ngbaribbai, ‘Abbari ma tu ni nyǒ nǎ kʉ ná kokoi,’ ni nyǒ nǎ i kʉ bbò tsú ro? 5 Aro kudjo dyʉ kʉ ná ke!* Atu ni nyǒ nǎ tsú i vi, føro ni nganja prépré ndiro ni tu adjoni nyǒ nǎ kʉ ná kokoi d’e.

6 “Nzɨ bbʉ takatifu ritsi tsɨ dho ndiro nzɨ ri le ndi nanga ndi ka ni ró. Ndirigoti nzɨ bu ra-kpa djø kó tsena ndiro nzɨ ri tsi ri nanga ró.

7 “Anidi ri kóko ndirigoti le si ri bbʉbbʉ ni dho, anidi ri nene ndirigoti ni si ri baba, anidi dzaitso d’od’o ndirigoti le si ri tso pʉpʉ ni dho, 8 dhonalo ritsi kó ná le adi ri baba, ritsi ne ná le adi si ri ro si ndirigoti dzaitso d’o ná le dho le si ri tso pʉpʉ. 9 Bbʉbbʉ dhé, ni kana ie ká ka ndi bbʉ dju ndidzá ngba dhona, njati ngba kó mukati ndi tso ró? 10 Inga ndi bbʉ su ngba dhona njati ngba kó bbè ndi tso ró? 11 Nì mai ni kʉ che ro, ni adi bblo ritsi bbʉ nidhi nzø dho. Nde, nidhi ra nǎ Baba ká ka ndi bbʉ bblo ritsi gʉ ngbabø ndi tso ri kó ná ndrŭ dho?

12 “Føri dho, ni ji ndrŭ njí ni dho ná lo krʉ ringani ni maddi njí ndrŭ dho føri nganga bbai; dhonalo føri i kʉ Yadha ma, Bbanabi ma na po ná lo na mana.

13 “Anitsu sese nanga kʉ ná dzaitso lu, dhonalo bbo nanga kʉ ná dzaitso ndirigoti pʉlʉpʉlʉ nanga kʉ ná chu ndrŭ mba sadha dhi ngana, ndirigoti ri lu tsu ná ndrŭ kʉ bí ndima kʉ ro. 14 Ro, shinga dhi ngana le mba ná dzaitso nanga kʉ sese ndirigoti ri nǎ le mba ná chu nanga kʉ ndøndø ndirigoti ri ba ná ndrŭ nga kʉ bí ri.

15 “Anirø ni ró kali dhi bbanabi ró, chembø bbai ndima si ni dhi ngana ro, ro kpa nǎ kpa kʉ tso nǎ tsɨ bbai. 16 Kpa nyi ni si chu kpadhó njí ró. Mizabibu dhi tsu-kpa ro nzɨ le adi kle kpelé dhi tsú djó ro ri ndirigoti figi dhi tsu-kpa ro nzɨ le adi kle lu djó ro ri. 17 Føri bbai, bblo kʉ ná tsú djo bblo kʉ ná tsu-kpa dhé adi o ndirigoti che kʉ ná tsú djo che kʉ ná tsu-kpa dhé adi o. 18 Bblo kʉ ná tsú djo nzá che kʉ ná tsu-kpa ro ka ndi o ri ndirigoti che kʉ ná tsú djo nzá bblo kʉ ná tsu-kpa ro ka ndi o ri. 19 Nzɨ djo bblo tsu-kpa o ná tsú krʉ le adi krrkrr ndirigoti le adi ri bu kazz na. 20 Bbʉbbʉ dhé, ni si fø kpa nyi chu ndima dhi njí ró.

21 “Ri nga kʉ ma ni ripo, ‘Bboke, Bboke,’ ná ndrŭ krʉ i si tsu ra nǎ Pidhinga na ri, ro ri kʉ madzá ra nǎ Baba ji ná lo nji ná ke dhé si tsu ri. 22 Bí kʉ ná ndrŭ si ripo fø dyi: ‘Bboke, Bboke, ko ká ngʉ lod’ra ni ró dho na nzɨ? Ko ká ngʉ gó di ni ró dho na nzɨ? Ko ká ngʉ ddù kpari nji ni ró dho na nzɨ?’ 23 Ro, ma si ripo kpa dho: ‘Ma nzá chu ni nyi ro karrnø maddi ri! Anituni ma nyǒ djó ro, ni che kʉ ná lo nji ná ndrŭ.’

24 “Føri dho ma ripo ni dho, njati ddikpa ke rr i lo ndirigoti ke njinjí ri na ró, ke kʉ nyodyu dhi ke bbai, dju djó ndi d’ø ndidhó dza dherr ro. 25 Føri goti dji ko bbo, dda chu ndirigoti nga vʉ bbo, ro dza ro nzá koni ri dhonalo ri dherr le d’ø dju djó. 26 Føri ró ro njonjo njati ddikpa ke rr ma po ná i lo nzá ndirigoti ke njinjí ri na nzá ró, ke kʉ rrchu ná ke bbai sø djó ndi d’ø ndidhó dza dherr ro. 27 Føri goti dji ko bbo, nari goti dda chu ndirigoti nga vʉ ro dza glʉni glʉ.”

28 Yesu dyangʉe ndidhó lo tso ro, ndrŭ nanga kengʉeni bbo ngbaribbai ma ke ngʉ longaddi nari dho. 29 Dhonalo ke ngʉ longaddi bbonga na kʉ ná ke bbai, ro nga, nga ndi ná kpa bbai ri.