Yohani
10 “Bbʉbbʉ dhé ma ripo ni dho, njati ddikpa ke tsu chembø dhó kala na ri ró dzaitso lú nzá, ro ke tini d’i chu lu ró, føri kʉ gbʉ ndirigoti nga si dhʉ ná ke. 2 Ro, dzaitso lu tsu ná ke i kʉ chembø ba nganga. 3 Dzaitso ronga b’o ná ke adi dzaitso pʉ ke dho ndirigoti chembø adi ke chu rrrr. Ke adi ndidhó chembø nzǐ ndima ró dho ró ndirigoti ke adi ri pʉ bbaidjo. 4 B’lo ke pʉ ri bbaidjo ró, ke adi da ri nji ndirigoti ri adi ra ke una dhonalo ri chu, ke chu nyi chu. 5 Chembø ro nzɨ si ra nzá nyi ndima chu ná ke ulu ri, ro ri si ke nyinyi, dhonalo ri nzá chu nzá nyi chuni ná kpa chu nyi ri.” 6 Yesu bbʉngʉe fø loroji kpa dho, ro kpa nzá famungʉe ke po ná lo ro ri.
7 Føri dho, Yesu pongʉeri ki kpa dho: “Bbʉbbʉ dhé ma ripo ni dho, ma kʉ chembø dhó dzaitso. 8 Ma rɨngana singʉe nari krʉ kʉ gbʉdhi kpa ndirigoti ngadhʉdha dho singʉe ná kpa, ro chembø nzá rrngʉe nga ro kpa dho ri. 9 Ma i kʉ dzaitso; ddikpa ke tsu ma lu ró, fø ke si gødha ba. Fø ke si tsu ndirigoti ke si vʉ, føri goti ke si dde tsó dde ná nga ba. 10 Gbʉ adi si chembø d’udha ma, ri chedha ma, ri sadha ma na dho dhé. Ro, ma singʉe ndiro ri ba shinga ndirigoti ri ba ri bbo d’e. 11 Ma kʉ miya ró rø ná bblo kʉ ná ke. Miya ró rø ná bblo kʉ ná ke adi ndidzá shinga* bbʉ chembø djotsina. 12 Ro, mbø ró fø njí nji ná ke, nga ndi kʉ miya ró rø ná ke nganga ndirigoti nga ndi kʉ miya ba ro, ná fø ke nja tsó nǎ tsɨ si nari ro, ke bba chembø bba ndirigoti ke nyinga nyi—føro tsó nǎ tsɨ lø nja chembø lø ndirigoti nja ri nanga ri plipli— 13 ke njiri fø dhonalo kʉ, ke njínji nja ndi ba ndi kobe d’e, ro ke thí ro nga kʉ chembø djó ri. 14 Ro, ma kʉ miya ró rø ná bblo kʉ ná ke. Ma chu madhó chembø chu ndirigoti madhó chembø chu ma chu, 15 ddiddi Baba chu ma chu ndirigoti ma chu ke chu nari bbai. Føri kina, ma madzá shinga* bbʉ chembø djotsina.
16 “Godhé, madhó kʉ nja chembø maddi, nga ndima kʉ i kala nǎ ro. Fø ri maddi ringani ma tsu i ri kana, ri si ma chu rr ndirigoti ri si ngʉ ddikpa miya, ddikpa ke rø ndima ró ro. 17 Ri kʉ føri dzá lo dho i Baba ji ma ri, dhonalo ma madzá shinga* bbʉ nja ma si ri ki ba vi d’e. 18 Ddikpa ke ma nzá ddi ka ndi dhʉ ri ro madhó ro ri, ro ma ri bbʉ ma ji ná lo dho. Ma kʉ bbonga na ma bbʉ ri ndirigoti ma kʉ bbonga na ma ba ri ki vi. Føri kʉ madzá Baba bbʉ ma dho ná yadha.”
19 Fø lo djotsina Wayaudi nanga ki ndongʉeni vi. 20 Kpa kana bí kʉ ná kpa ngʉ ripo: “Ke nǎ kʉ gó ndirigoti ke rɨchu. Ni ká ke rr addudho?” 21 Ro, nja kpa ngʉ ripo: “I ri nga kʉ gó kʉ nǎ ná ke ka ndi ti ná lo ri. Gó ká ka ndi we nzɨ nyǒ nganja ná ke nyǒ tso maddi?”
22 Fø saa na, ndrŭ ngʉ hekalu le chingʉe nari dhi fete nji Yerusalemu nǎ. Ri ngʉe grì dhi saa na, 23 ndirigoti Yesu ngʉ bbí hekalu nǎ Sulemani chingʉe ná tødha kalu. 24 Føro Wayaudi d’engʉe ke ronga tso ndirigoti kpa ngangʉe ri dhudha tso ke tso: “Ni ká ka ni liri ko* nanga rɨni thɨcha? Rie Kristo ni kʉ ri ró, ad’rari ko dho pʉlʉpʉlʉ.” 25 Yesu ngʉngʉe logoti kpa dho: “Ma d’rae føri d’ra ni dho, ro ni nzá ue ri ro ri. Madzá Baba ró dho na ma nji ná njí lo dzá bbʉbbʉnga dhǒ ma djo.” 26 Ro, ni nzɨ ri ro uri dhonalo ni nga kʉ madhó chembø ri. 27 Madhó chembø adi ma chu rrrr, ma chu ri chu ndirigoti ri adi ra ma ulu. 28 Ma cho ró nŭnŭ di ná shinga bbʉ ri dho ndirigoti ri ro nzɨ si sani karnø maddi ri. Føri goti ddikpa le ma nzɨ ddi si ri ro dhʉ ma thó thi ro ri. 29 Madzá Baba bbʉ madhó ná ritsi dada nja ritsi krʉ djolu, ndirigoti ddikpa le ma nzá ddi ka ndi dhʉ ri ro Baba thó thi ro ri. 30 Ma ma, Baba na ko kʉ ddikpa.*
31 Føro Wayaudi søngʉe dju ki ndima bú na ke d’e. 32 Føro Yesu pongʉeri: “Ma dho Baba dhó ro si ná bí kʉ ná bblo njí ni dho. Nde, ni ká riji ni bú ma dju na fø njí kana ngbá ri djó?” 33 Wayaudi ngʉngʉe logoti ke dho: “Ko nzɨ ni bú dju na bblolo djó ri, ro ri kʉ ni dhu Mungu nari djó; dhonalo nì mai ni kʉ ndrŭ ro, ni ni nji mungu.” 34 Yesu ngʉngʉe logoti kpa dho: “Nidhó Yadha nǎ ká ri ndini ɨ nzá, ‘Ma pongʉeri: “Ni kʉ mungu kpari”’?* 35 Ko churi chu nari kʉ ndi ndini ná lo ro nzá ka ndi má pá ri. Nde, njati rie lod’ini djo Mungu dzá lo nǎ ná ndrŭ i Mungu nzi “mungu kpari ri ró, 36 ni ká riddi ri kʉ bblo ni pori, “Ni dhu Mungu,” ma ripo ma kʉ Mungu dhi Dduna ná føri chulu, ngbà mai Baba i lingʉeri ma tsetse ndirigoti ke i chongʉe ma dz’ djo ro? 37 Njati rie nzɨ ma madzá Baba dzá njí nji ri ró, nzɨ ni u ma. 38 Ro, ri ma nji ro ni u ma nzá ma ró, aniu ma nji ná njí, ndiro ni churi nari kʉ, Baba tso gbani ddi ma na ndirigoti ma tso gbani ddi Baba na ndirigoti ni rá anzi ri ni chu nari na.” 39 Føro kpa jingʉeri ki ndima lø ke, ro ke nyingʉe nga nyi kpa dhó ro.
40 Føro ke ki dangʉe Yordani dzá chá dzɨ nga laidjo, føri kʉ anziro Yohani ngʉ batiso bbʉ ná nga ndirigoti ke dingʉe følu. 41 Bí kʉ ná ndrŭ singʉe ke dhi ngana ndirigoti ndrŭ ngangʉe ɨ ndima ripo nari tso: “Yohani nzá njingʉe ddù ro ddikpa maddi ri, ro Yohani pongʉe i ke djo nari krʉ ngʉe bbʉbbʉlo.” 42 Føga bí kʉ ná ndrŭ ungʉe ke u.