Roma

16 Ma rija ni kó kodhi vena Foibe bblo Kenkrea dhi kutaniko nǎ njínji ná le ndi kʉ ro. 2 Kirikiri aniko le ngbà tho Bboke dzá takatifu ndrŭ ronga nari bbai. Anibbʉ ledhó lo u ná ritsi krʉ le dho, dhonalo le soni bí kʉ ná ndrŭ djó, føri i kʉ ma mai.

3 Anizʉ Prisila ma, Akila ma na ronga ma dho, ddinga ko njinjí ndima na Kristo Yesu dho ro. 4 Fø ndrŭ tsetse dhe ró nja ndima gø madhó shinga* d’e. Nga ma kpali ri, ro nga kʉ Wayaudi ná ndrŭ dhó kutaniko kpari maddi mbai po kpa dho. 5 Anizʉ kpa bbá dza nǎ njuni ná kutaniko ronga maddi. Anizʉ bbo ma ji ná ke Epaineto ronga, ya kwanza ungʉe Kristo Asia nǎ ná ndrŭ kana ddi ke ndi kʉ ro. 6 Anizʉ Maria ronga, bbo ndi njingʉe njí ni dho ro. 7 Anizʉ Androniko ma, Yunia ma na ronga; føri kʉ kodhi ndrŭ ro ndirigoti kpa ma na le sʉngʉe ko prizo na ddinga. Fø kpa, cho le cho ná kpa chu bblo ndirigoti kpa ngʉngʉe Kristo unakpa ma njí hwi.

8 Anibbʉ madzá zʉdha Apliato dho, føri kʉ bbo ma ji Bboke nǎ ná ke. 9 Anizʉ Urbano ronga, føri kʉ ddinga na ko njinjí Kristo dho ná ke, ndirigoti bbo ma ji ná ke Staki ronga maddi. 10 Anizʉ Apele ronga, føri kʉ Kristo dzá u tso uni ná njí dhi ke. Anizʉ Aristobulo bbá dza nǎ ndrŭ ronga maddi. 11 Anizʉ kodhó familia nǎ le Herodio ronga. Anizʉ Narkiso bbá dza nǎ ndrŭ ronga maddi, føri kʉ Bboke una ndrŭ. 12 Anizʉ Trifona ma, Trifosa ma na ronga, føri kʉ kpakpanga na njínji kodhi Bboke dho ná isɨ ndrŭ. Anizʉ bbo ko ji ná le Persis ronga, føri kʉ kpakpanga na njínji Bboke dho ná le. 13 Anizʉ vʉ vʉni Bboke nǎ ná ke Rufu ma, ndidzá mama ma na ronga, fø le ngʉe madzá mama bbai ma dho. 14 Anizʉ Asikrito ma, Filego ma, Herme ma, Patroba ma, Herma ma, kpa ma kʉ na ná nja le-djoi ma na ronga krʉ. 15 Anizʉ Filologo ma, Yulia ma, Nerei ma, le-ve ma na ronga, ndirigoti Olipa ma, Mungu dzá nja ndrŭ ronga ma na maddi, kpa kuso ndima kʉ ro. 16 Anizʉ ni ronga ni kana wá ni ronga wa ro. Kristo dzá kutaniko krʉ zʉ ni ronga.

17 Kpadjo, ma rija ni dho le-djoi, anib’o ni ronga ndóndo li ndrŭ kana ndirigoti bʉ ndima lai ndrŭ dhó udha bʉ ná ndrŭ ró; nzá tso gbani ni dho le ddingʉe ná lo na ná lo ndima nji ro. Anidi da kpa ró ro. 18 Dhonalo fø kpa nga kʉ Kristo dhó nokpá ri; ro kpa kʉ ndima nganga na ù* dhi nokpá. Kpa ndrŭ sha ndima tso nǎ sʉsʉ djø ná lo na ndirigoti shasha dhi lo na. 19 Ro, krʉ kʉ ná ndrŭ chu ni ngarr nì nari chu ndirigoti ma kʉ hwè na bbo fø lo dho. Ma jiri ni é nyod’yu na ndirigoti ni di bblolo nji; føri kina ni é nga nǎ kosa ro ndirigoti ni di chelo tso nyinyi. 20 Karrnga goti, ngoi adi bbʉ ná Mungu si Shetani nanga d’ri ni kó tsena. Kodhi Bboke Yesu dzá nzá tso ka ndi koe le djo ná zølo é ni na.

21 Ma lai njí dhi ke Timoteo cho ndidhó zʉdha ni dho ndirigoti kodhó familia nǎ ndrŭ Lukio ma, Yasoni ma, Sosipatro ma na maddi zʉ ni ronga.

22 Ma, Tetio i lo ma ndi ro, ma maddi zʉ ni ronga Bboke nǎ.

23 Ma di bbá ná ke Gayo ma, kebbá adi njuni ná kutaniko ma na krʉ zʉ ni ronga. I bba gʉ mbø ronga adi b’o* ná ke Erasto ma, ndidhi djona Kwato ma na maddi zʉ ni ronga. 24* ——

25 Mungu ka ndi bbʉ kpakpanga ni dho ma d’ra ná i hwè lo-i ma, Yesu Kristo djo d’rani ni dho ná lo ma na chulu. Fø lo drrdrrnga djó ro rungʉeni ná takatifu kʉ ná lo nyǒ ke ko dho. 26 Kpadjo ri dhoni ndirigoti ri d’rani ndrŭ dho bbanabi ndingʉe ná lo chulu. Kodhi theinga dho di ná Mungu jari le d’ra fø lo ndrŭ tsɨ dho ndiro kpa rrnga udha dho d’e. 27 Nyod’yu dhi ddikpa dhé kʉ ná Mungu máni Yesu Kristo chulu cho ró nŭnŭnga dho. Amina.