Matayo

2 Yudea nǎ Betelehemu na Yesu gøni Herodi* ngʉ pinyo ná saa na nari goti, dyødyø djo chu lo* ná kpa singʉe Dyi si ná nga laidjó ro Yerusalemu na. 2 Kpa dhungʉeri: “Wayaudi bbá pi gøni ná ke ká kʉ ngbaga? Dhonalo ko njae kedhó dyødyø Dyi si ná nga laidjó ro ndirigoti ko si nja ko koni ke nji d’e.” 3 Pi Herodi ma, Yerusalemu nǎ ndrŭ krʉ ma na rrngʉe fø lo ná saa na, ndrŭ djǒ nanga ngbʉngʉeni bbo. 4 B’lo ndi gba bbakuhani djó bbobbonga ma, nga ndi ná kpa ma na tso nari goti, ke dhungʉe Kristo* ká ka ndi gøeni ngbaga nari kpa tso. 5 Kpa pongʉeri: “Yudea nǎ Betelehemu na, dhonalo nabi ndingʉeri ɨ: 6 ‘Nde, ni Betelehemu Yudea dhi ngø nǎ ni kʉ ro, ni ro nga kʉ pá Yudea nǎ bbobbonga nyǒ djó ri dhonalo Israeli nǎ ndrŭ tsɨ ronga si b’o ná ke si si ni nǎ ro.’”

7 Føro Herodi nzingʉe dyødyø djo chu lo ná kpa nzá nga nja ndrŭ chu ro ndirigoti ke dhungʉe fø dyødyø ká dhoe ndi ngbá saa na nari kpa tso. 8 Føro ke chongʉe kpa Betelehemu na ndirigoti ke pongʉeri: “Anira ni ne fø ngba li ni li ni dyu ro ndirigoti ni ba ngba b’lo ró, ni ngʉ ri d’ra ma dho ndiro ma ro ma rá koni ngba nji ddi d’e.” 9 B’lo kpa rr pi po ná fø lo nari goti, kpa rangʉe ra, ndirigoti anja! Dyi si ná nga laidjó ro kpa njangʉe ná dyødyø ngʉ ra kpa njí ndirigoti ri rangʉe tøni ngba kʉ ná nga djotsina. 10 Dyødyø ndima nja ro, kpa nanga jingʉeni bbo. 11 Adzá kpa tsu ro, kpa njangʉe jadda ngba ma, ndidzá mama Maria ma na, føro kpa kongʉeni ndima d’eti djo ndirigoti kpa bbʉngʉe madha ngba dho. Føri goti kpa klongʉe ndima si na ná ritsi tso ndirigoti kpa bbʉngʉe kado ngba dho, føri ngʉe or ma, ubani* ma, manemane* ma na. 12 Nì mai ri kʉ fø ro, Mungu jangʉeri kpa dho nyo nǎ nzɨ kpa ngʉ Herodi dhi ngalu. Føri dzá lo dho kpa ngʉngʉe ndima bbá ngø na d’i chu lu.

13 B’lo kpa ra nari goti, anja! Yova* dzá malaika dhongʉe ndi Yosefu dho nyo nǎ ndirigoti ke pongʉeri: “Adani, adzi jadda ngba ma, ndidzá mama ma na ndirigoti aninyinga Misri na. Anidi følu kpø ma si ripo ni ngʉ ná nga djo dhonalo Herodi rine ndi hwi ngba hwi.” 14 Føro Yosefu dangʉeni ndirigoti ke dzingʉe ngba ma, ngba dzá mama ma na fø kuna thei ndirigoti kpa nyingʉe nga Misri na. 15 Ke dingʉe følu kpø Herodi dhe ná nga djo. Fø lo njingʉeni ndiro Yova* pongʉe ndidzá nabi chulu ná ɨ lo njini d’e: “Ma nzingʉe madhi dduna Misri nǎ ro.”

16 Herodi rangʉe ri utso d’i nari kʉ, dyødyø djo chu lo ná kpa sha ndi sha, ná føri dho ke nanga kangʉeni bbo pli. Ke chongʉe ndrŭ ndima ché Betelehemu ma, ri kuso lu kʉ ná bba ma na nǎ kpetsi nzø krʉ, cho aro djó ro agʉ, dyødyø djo chu lo ná kpa d’rangʉe fø lo ndi dho ná saa ró ro. 17 Føro nabi Yeremia pongʉe ná i lo njingʉeni: 18 “Ddikpa lechu rrni Rama nǎ ro, nari kʉ dzz ma, bbo le ju bbɨ nari ma na. Ri kʉ Raheli ndidzá nzø dzz ri, le nzɨ ribba ndi iso ro pɨni ri, dhonalo kpa cheni che.”

19 B’lo Herodi dhe nari goti, anja! Yova* dzá malaika dhongʉe ndi Yosefu dho nyo nǎ Misri nǎ ke ngʉe ro 20 ndirigoti ke pongʉeri: “Adani, adzi jadda ngba ma, ndidzá mama ma na ndirigoti aningʉ Israeli nǎ ngø na, dhonalo ngba dzá shinga* e ne ná ndrŭ cheni b’lo.” 21 Føro ke dangʉeni ro, ke dzingʉe jadda ngba ma, ngba dzá mama ma na ndirigoti kpa ngʉngʉe Israeli na. 22 Ro, ke rrngʉeri Arkelao ngʉ pinyo Yudea nǎ ndidzá Baba Herodi rɨngana nari ro, fø bba gʉ ke ngʉ nari do njingʉe ke nji. Føri kina, ke dho Mungu jangʉe lo nyo nǎ nari dho, ke rangʉe Galilea na. 23 Føro ke rangʉe di Nazareti le nzi ná ngø na, ndiro bbanabi chulu pongʉeni ná i lo njini d’e: “Ke le si nzi Nazareti nǎ ke.”*