Filipi

3 Le-djoi, lo tso dyadha dho, anira anzi Bboke nǎ ni hwè nji nari na. B’lo ma poe ná lo nanga ki ma ndi ni dho nari nga kʉ kpakpa ma dho ri, ro føri kʉ nidhi bblonga dho.

2 Anib’o ni ronga tsɨ bbai njini ná ndrŭ ró, anib’o ni ronga che kʉ ná lo nji ná ndrŭ ró, anib’o ni ronga krr le le krr nari djo tøni ná ndrŭ ró. 3 Ko i kʉ bbʉbbʉ krr ndima ná kpa, dhonalo kʉ ko takatifu njí nji Mungu dho kedzá roho chulu, ko ko má Kristo Yesu nǎ ndirigoti ko nzɨ adi ko thí li ko ndí djo ri. 4 Ro, ma ka ma lie ma thí ma ndí djo dho ná lo dada krʉ ndrŭ dhó ri djolu.

Njati ddikpa ke di riddi ndi ka ndi li ndi thí ndi ndí djo dho ná lo ro kʉ thé ró, ma ka ma njiri fø dho ná lo kʉ bí: 5 ma le krrngʉe ddo 8 djó. Ma kʉ Israeli nǎ ke, Benjame dzá bbu nǎ ke, ma kʉ Muebrania Bbaebrania gø ndi ro. Ma ngʉe Mufarisayo nari dho ma ngʉ adi Yadha dyø kaka ná ngatsi. 6 Ma ngʉ adi ritsi nji klø na nari dho, ma ngʉ adi kutaniko nzánza. Yadha ró d’yʉ ndi ná chølo le dyø nari kana, ma dhongʉe ma nzá djo le ka le ti chelo ro ná ke. 7 Ro, faida ngʉe ma dho anziro ná ritsi ma be pá kpadjo Kristo djotsina. 8 Krʉ kʉ ná ritsi ma be pá Kristo djotsina, le ddi ri Bboke Kristo Yesu djo ma chu ná bbo pli na mana kʉ ná lo na ró. Ke djotsina ma bba krʉ kʉ ná ritsi pá ndirigoti ma adi rinja chù djó hø bbai ndiro ma ba Kristo d’e. 9 Ri nga kʉ Yadha ró d’yʉ ndi ná chølo ma dyø nari dho i ma kʉ chølo dhi ke ri. Ro, ri kʉ Kristo nǎ ma kʉ na ná udha djotsina. Fø chølo si Mungu dhó ro ndirigoti ri d’yʉ ndi udha ró. 10 Ma ji nari kʉ ma chu Kristo ma, kedhó gadha dhi kpakpanga ma na ndirigoti ma ba ke bangʉe ná nzadha ro. Føri kina, ma kʉ tayari ma dhedhe ke dhengʉe nari bbai, 11 ndiro ngbà ri ka ró, ma si ga ya kwanza si ga ná ndrŭ kana d’e.

12 Ma nzá d’e fø lekobe ro ba ri ndirigoti ma nzá d’e ngʉ kaka ná ke ri. Ro, ma ma dho ka ná lo nji krʉ ndiro ma njí Kristo vʉ* ma dho ná njí nganga d’e. 13 Le-djoi, ma nzɨ riddi ma lø fø ritsi b’lo ri, ro u ma u nari kʉ i lo: Ma goti kʉ ná ritsi nga ma vivi ndirigoti ma ma nanga dda ma njí kʉ ná ritsi dhi ngana. 14 Ma ma dho ka ná lo nji krʉ ndiro ma tso si Kristo Yesu chulu Mungu nzi ma dho ná lo djo d’e, føri kʉ ma rá ra na nari. 15 Ko kana dhidhi ná ndrŭ krʉ dho ringani ndima é fø nganjadha na. Ro njati nidhó nganjadha é njonjo føri ró ro ró, Mungu si bblo kʉ ná nganjadha dho ni dho. 16 Njati rie ngbá ngatsi ma ko nji maendeleo ri ró, akora anzi dhé føri bbai ko bbi nari na.

17 Le-djoi, ni krʉ dho ringani ni mburi ni dyø ma ndirigoti ni dyø ko bba ni dho ná loroji dyø ná ndrŭ. 18 B’lo ma pongʉe ni dho anziro bí ina ná lo ki ma po ni dho kpadjo dzz ma dzz ro. Bí kʉ ná ndrŭ ridho ndima dhó nyi chulu nari kʉ, ndima kʉ Yesu ma, kedhó nzadha dhi tsú* ma na dhó mbubai. 19 Kpadhó mwisho kʉ ndima si sadha ba; kpadhi Mungu kʉ kpa ò,* kpa ndima ngbé do ka ndi pá le djo ná ritsi dho ndirigoti kpa ndima dhó ngaddidha li dz’ dzá ritsi djo dhé. 20 Kodhó nga kʉ ra nǎ ndirigoti ko kodhi gødha ba b’o bbò ù na ra nǎ ro, føri kʉ Bboke Yesu Kristo. 21 Ke si ko ndí pá kʉ ná i ri thika ø, nja ri ngʉ kadha na ndi ndí bbai d’e. Føri ke si nji ndidhó bbo kʉ ná kpakpanga chulu, ná fø kpakpanga na i ke adi krʉ kʉ ná ritsi li ndidzá bbonga tsena.