Matayo

22 Føri goti Yesu tingʉelo ki kpa dho loroji chulu ro, ke pongʉeri: 2 “Ra nǎ Pidhinga le ka le ddi, ddikpa pi njingʉe ndoa dhi fete ndidhi dduna dho nari na. 3 Ke chongʉe ndidhó njí dhi kpa, kpa rá ndoa dho le nzi ná ndrŭ nzi, ro ndrŭ pongʉeri ndima nzɨ si ri. 4 Føro ke cho njí dhi nja kpa ki ro, ke pori kpa dho, ‘Anipori ndoa dho ma nzi ná ndrŭ dho: “Nyo ma rɨ b’lo; ma rɨ tsíkpá zǎ ma, dhù dhi zǎ ma ji nari ma na, ndirigoti krʉ ritsi kʉ tayari ró, anisi ni nyó ndoa dhi fete.”’ 5 Fø lo ma løngʉe kpa thí ronga ro nzá ddi. Ddi ke rangʉe ndidhó nza gʉ ndirigoti nja ke rangʉe ndidzá turusa nji; 6 nja kpa løngʉe kedhó njí dhi kpa, kpa nzangʉe kpa nza ndirigoti kpa chengʉe kpa che.

7 “Pi lu fø lo kangʉeni bbo ndirigoti ke chongʉe ndidhó bbasødda ndiro kpa ché ndrŭ che ná fø kpa ndirigoti kpa bɨ fø kpa bbá vile d’e. 8 Føri goti, ke pongʉeri ndidhó njí dhi kpa dho: ‘Ndoa dhi nyo kʉ tayari, ro ri dho le nzi ná kpa i nzá ka ri dho ri. 9 Føri dho, anira vile ró ro, arugu le mba ná chu lu ndirigoti aninzi b’lo na ni nju ná ndrŭ thei ndoa dhi fete dho.’ 10 Føro njí dhi kpa vʉngʉe chu na ndirigoti kpa gbangʉe krʉ na ndima nju ná ndrŭ tso, rie che inga bblo kʉ ná ndrŭ ma ró. Ndirigoti ndoa dhi fete dza na* ndrŭ lingʉe pɨ.

11 “Pi tsungʉe ndi nja fete dho le nzi ná ndrŭ d’e ro, ke njangʉe nzá tho fete dhi rù ná ddikpa ke. 12 Pi dhungʉeri ke tso, ‘Ma lai ke, ni ká tsu i dzá ngbǎ nga ró ndoa dhi rù ro?’ Ke gongʉe ddì. 13 Føri goti pi pongʉeri ndidhó njí dhi kpa dho, ‘Anichi ke kù tso ma, ke kó tso ma na ndirigoti anibu ke bbaidjo tɨtɨnga na. Følu i ke ve di dzzdzz ndirigoti ndi kudjo kǎ.’

14 “Dhonalo nzi nzini ná ndrŭ kʉ bí, ro vʉ le vʉ ná ndrŭ i kʉ sese.”

15 Føro Bbafarisayo rangʉe loti ndima kana, ndiro ndima pɨ ke, ke ti ná lo chulu d’e. 16 Føri dho, kpa chongʉe ndima unakpa ma, Herodi unakpa ma na ndima rá ripo ɨ: “Mwalimu, ko churi chu ni adi bbʉbbʉ kʉ ná lo po ndirigoti ni ddi Mungu djo nari kʉ bbʉbbʉ kʉ ná lo, ni nzɨ rine ni tso uni ndrŭ na ri ndirigoti ni nzɨ ndrŭ nja ndrŭ nyǒ djó nga ró ri. 17 Ad’ra i lo djo ni ddi ná lo ko dho di: “Kaisari dhó palata le wø nari tso ká uni u* inga nzá?” 18 Ro, Yesu chungʉeri chu kpa kʉ che kʉ ná kpa nari dho, ke ngʉngʉe kpadhó logoti: “Ni aro kudjo dyʉ kʉ ná kpa,* ni ká ma mbu addudho? 19 Anidho palata wødha dhi mbøkpa di ma nja.” Føro kpa bbʉngʉe dinari* ddikpa ke dhona. 20 Ro, ke dhungʉeri kpa tso: “I ri ká kʉ ie ró ji ndirigoti ri djó kʉ ná i lo ká ie ndi?” 21 Kpa ngʉngʉe logoti: “Kaisari.” Føro ke pongʉeri: “Anibbʉ Kaisari dzá ritsi Kaisari dho, ndirigoti Mungu dzá ritsi Mungu dho.” 22 Fø lo kpa rr ro, kpa nanga kengʉeni bbo ndirigoti kpa bbangʉe ke bba ro, kpa rangʉe ra.

23 Fø dyi nzá urie gadha ná kpa, Bbasadukayo singʉe ke dhi ngana ndirigoti kpa dhungʉeri ke tso: 24 “Mwalimu, Musa pongʉeri: ‘Njati ddikpa ke dhe nga dzá nzø ro ró, kedhi djona dho ringani ndi kø ke bba ná fø le ndiro ndi liri ndidhi djona nǎ gø rá anzi d’e.’ 25 Kpadjo, ko kana ngʉe ná kpetsi kpa ngʉe ndima bbá ro 7. Føro ya kwanza ke køngʉe dhɨ, ro ke dhengʉe nga dzá nzø ro ndirigoti ke bbangʉe ndibbá le ndidhi djona dho. 26 Fø lo nganga i njingʉeni ya pili ke ró ndirigoti ya tatu ke ró, kpø ya saba ke djo. 27 Ndirigoti mwisho, isɨle gʉ ma dhengʉe dhe ddi. 28 Nde, ga ndrŭ ve di ga ná dyi, 7 kʉ ná fø kpa kana ká fø le si che ie dho? Dhonalo kpa krʉ køngʉe le kø.”

29 Yesu ngʉngʉe logoti kpa dho: “Ni vivi, dhonalo ni chu ndi ndini ná lo ma nzá ddi ndirigoti Mungu dzá kpakpanga ma nzá ddi. 30 Dhonalo gadha dhi saa na, kpetsi kpa ma, isɨ ndrŭ ma na si ndima ro kø nzɨ dhonalo kpa sie malaiká bbai ra nǎ. 31 Che cheni ná ndrŭ dhó gadha djo Mungu pongʉe ni dho ná i lo ro ká ni d’erie zø nzá? 32 ‘Ma kʉ Abrahamu dzá Mungu, Isaka dzá Mungu ndirigoti Yakobo dzá Mungu.’ Ke kʉ shi di ná ndrŭ dhi Mungu, nga che cheni ná ndrŭ dhi Mungu ri.” 33 Fø lo ndima rr ro, birobiro kʉ ná ndrŭ nanga kengʉeni bbo kedhó longaddidha dzá lo dho.

34 Bbasadukayo tso Yesu go nari Bbafarisayo rr ro, kpa singʉe ke dhi ngana birobiro. 35 Kpa kana bbo chungʉe Yadha ná ddikpa ke dhungʉeri ɨ Yesu tso ndiri na ndi mbu ke d’e: 36 “Mwalimu, Yadha kana bbo pli kʉ nari ká kʉ ngbá ri?” 37 Ke pongʉeri: “‘Ringani ni ji Yova* nidzá Mungu ni thí nǎ ro krʉ, nidhó nafsi* na krʉ ndirigoti nidzá ngaddidha na krʉ.’ 38 Føri kʉ bbo pli ndirigoti ya kwanza kʉ ná yadha. 39 Ri bbai di ná ya pili ri kʉ: ‘Ringani ni ji ni lai ni nganga ni ji nari bbai.’ 40 Aro kʉ ná fø yadha ró i, krʉ kʉ ná nja Yadha ma, Bbanabi ma na dyʉ ndima.”

41 Føro, b’lo Bbafarisayo nju ndima tso nari goti, Yesu dhungʉeri kpa tso ɨ: 42 “Ni ká riddi ngbǎ Kristo djo, ke ká kʉ ie ddù?” Kpa ngʉngʉe logoti “Daudi Ddù.” 43 Ke dhungʉeri kpa tso: “Nde, roho dda chutso ndi dho ro ká Daudi nzingʉe ke ndidzá Bboke addudho, i ndi pongʉeri ro: 44 ‘Yova* pongʉeri madzá Bboke dho: “Adi ma thó thá djó ri laidjo kpø ma nidhó mbubai li ni kó tsena ná nga djo?”’ 45 Nde, rie Daudi i nzi ke ndidzá Bboke ri ró, føro ká ke kʉ Daudi dhi dduna ngbaribbai?” 46 Ddikpa le ma nzá ddi bangʉe fø lo goti ndi ngʉ ná lo ro ri ndirigoti fø dyinga djó ro nzá ddikpa le ma mbungʉeri ndi dhunga ki ro ddi ke tso ri.