Matayo

23 Føri goti Yesu pongʉeri birobiro kʉ ná ndrŭ ma, ndi unakpa ma na dho ɨ: 2 “Nga ndi ná kpa ma, Bbafarisayo ma na di Musa dhó kiti djó. 3 Føri dzá lo dho, krʉ kpa po ni dho ná lo aninji nji ndirigoti anirrnga ri dho, ro kpadhó nyi i nzɨ ni dyø dhonalo kpa nzɨ adi ndima po ná lo ró njí ro nji ri. 4 Kpa li o ná no li ndrŭ kudjo, ro kpa nganga i nzɨ ri ronga ro lø ndima thó-kpa kpali na maddi ri. 5 Kpa nji ná lo krʉ kpa nji ndiro ndrŭ nja ndima d’e. Føri dho, kpa ndri ndi ndini ná lo di nǎ ná kpʉ nanga ndri ndirigoti kpa ri thó ndima ronga b’odha dho, føri goti kpa ro ndima ró rù tsodjo dadá. 6 Ngasdjó nyo dhi saa na, kpa adi riji ndima di bbo pli kʉ heshima dhi ri ná ngana ndirigoti sinagogi lu kpa adi riji ndima di anziro* kʉ ná kiti djolu. 7 Føri goti kpa jiri ndrŭ di ndima ronga zʉ soko lu ndirigoti ndrŭ di ndima nzi Rabi.* 8 Ro, nzɨ ni bbari ro ndrŭ nzi ni Rabi dhonalo nidhó Mwalimu kʉ ddikpa ndirigoti ni krʉ kʉ le-djoi. 9 Føri kina, nzɨ ni nzi ddikpa le ro maddi baba i dz’ djó dhonalo nidhi Baba kʉ ddikpa dhé ra nǎ. 10 Nzɨ ni bbari ndrŭ nzi ni ro, chutso ddá ná kpa maddi, dhonalo ni dho chutso ddá ná ke kʉ Kristo. 11 Ro, ni kana bbo pli kʉ ná ke dho ringani ndi é nidhó njí dhi ke. 12 Ngbe ndi ngbé ná ke le si thʉthʉ ndirigoti thʉ ndi thʉ ná ke le si ngbengbe.

13 “Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni ra nǎ Pidhinga dhi dzaitso i ndrŭ ró. Ni nganga ma tsu ri lu nzɨ ddi ndirigoti ngbà jiri ndima tsu ná ndrŭ ronga tso ma ni chocho ddi. 14* ——

15 Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni bbi jʉdda djolu ma, dz’ djolu ma ndiro ni liri ddikpa ke leni d’e, ro b’lo ke leni nari goti ni rili ke é Gehena* nǎ si ra ná ke aro ina ni djolu.

16 Njedha ni dho chutso ddá ná nga nyǒ kʉ ná kpa! dhonalo ni ripo, ‘Njati ddikpa ke tsoni hekalu ró dho na ró, føri nga kʉ bbò lo ri, ro njati ddikpa ke tsoni hekalu nǎ kʉ ná or ró dho na ró, fø ke dho ringani ndi njí ndi tsoni djo ná lo ró njí njí.’ 17 Rɨchu ná kpa ndirigoti nga nyǒ kʉ ná kpa! Bbo pli na mana kʉ nari ká kʉ or inga or adi tse dho ná hekalu? 18 Føri kina ni adi ripo, ‘Njati ddikpa ke tsoni mazabahu ró dho na ró, føri nga kʉ bbò lo ri, ro njati ddikpa ke tsoni ri djó le adi bbʉ ná bbʉdha ró dho na ró, fø ke dho ringani ndi njí ndi tsoni djo ná lo ró njí njí.’ 19 Nga nyǒ kʉ ná kpa! Bbo pli na mana kʉ nari ká kʉ bbʉdha inga bbʉdha adi tse dho ná mazabahu? 20 Føri dzá lo dho, njati ddikpa ke tsoni mazabahu ró dho na ró, fø ke tsoni mazabahu ma, ri djó kʉ ná ritsi ró dho na maddi; 21 føri goti, njati ddikpa ke tsoni hekalu ró dho na ró, fø ke tsoni hekalu ma, ri nǎ di ná ke ró dho na maddi; 22 ndirigoti njati ddikpa ke tsoni ra ró dho na ró, fø ke tsoni Mungu dhó pi dhi kiti ma, ri djó di ná ke ró dho na maddi.

23 “Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni adi munanaa dhi tsó ma, dili dhi tsó ma, bizali dhi tsó ma na nanga le ndo 10 nari lai ro bbʉ ddikpa. Ro, ni sheria nǎ bbo na mana kʉ ná lo i bbabba, føri kʉ chølo ma, zølo ma, chi le tøni nari ma na. Ri e ngani ni di fø ritsi bbʉ nzá ni bba nja ri bba ro. 24 Chutso ddá ná nzɨ nyǒ nganja ná kpa! Ni rɨrɨ dhi ucha i roro, ro ni ngamia i chocho.

25 “Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni kopo ma, sani ma na ró arugu nga i ʉʉ, ro ri nanga i lili tamaa* ma, nzɨ le le ronga tso cho nari ma na na. 26 Nzɨ nyǒ nganja ná ke Farisayo, aʉ kopo ma, sani ma na nanga i vi ndiro i ri ró arugu nga ma tse ddi d’e.

27 “Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni kʉ sawø kʉ ná kabuli bbai, ri ró arugu nga njani d’ad’ani nari bbai, ro ri nanga i lili ndrŭ ró kpà ma, krʉ kʉ ná nzá tsetse ná ritsi ma na na. 28 Føri bbai, arugu ro ni njani ndrŭ dho chølo dhi kpa bbai, ro ni nanga lili aro kudjo dyʉ* le kʉ nari ma, nzɨ le yadha dyø nari ma na na.

29 Njedha ni dho nga ndi ná kpa ma, Bbafarisayo ma na, aro kudjo dyʉ* ni kʉ ro! dhonalo ni bbanabi dhó kabuli chi ndirigoti ni chølo dhi ndrŭ dhó kabuli* ronga thɨ. 30 Ndirigoti ni ripo, ‘Njati ko ée ko bbui dhó saa na ró, ko nzá ka ko gbae ko tso ro bbanabi chengʉe ná ndrŭ na ri.’ 31 Fø lo na ni ni bbø ni niro nari kʉ, ni kʉ bbanabi chengʉe ná kpa ddui. 32 Føri dho, aniliri ni bbui ngangʉe tso ná fø lo tso kaka.

33 “Su kpari, idhalolo nǎ gø, ni ká ka ni nyi ni djo le si lod’i ni rá Gehena* na nari tso ngbaribbai? 34 Ri kʉ føri dzá lo dho i ma bbanabi ma, nyodyu dhi kpa ma, longaddi ná kpa ma na chó ni dhi ngana ri. Kpa kana nja kpa ni si cheche, nja kpa ni si tɨ tsú badjo ndirigoti nja kpa ni si dhɨ nidhó sinagogi lú ndirigoti ni si kpa nza i vile nǎ ro, chá vile na, 35 ndiro krʉ ndrŭ cherie i dz’ djó ná chølo dhi ndrŭ dhó ju é ni djó d’e. Chølo dhi ke Abeli dzá ju djó ro kpø Barakia ddù Zekaria dzá ju djo, takatifu kʉ ná nga ma, mazabahu ma na kana ni hwingʉe ndi ro. 36 Bbʉbbʉ dhé ma ripo ni dho, fø lo krʉ le kasi d’i i gø djo.

37 “Yerusalemu, Yerusalemu, bbanabi adi che ná bba ndirigoti cho le cho ndi dhi ngana ná ndrŭ adi bú dju na ná bba, ma ká jingʉeri thɨ ina ma njú nidzá nzø tso ø adi ndi kalʉ tso njú ndi hú tsena nari bbai! Ro, ni nzá ungʉe føri ro ri. 38 Aninjari! Nidhi dza le bbabba ni djó. 39 Dhonalo ma ripo ni dho, kpadjonga djó ro nzɨ ni ma ki ro nja ri, kpø ni ra ripo ɨ ná nga djo, ‘Yova* ró dho na si nari kʉ le ronga leni ná ke.’”