Matayo

25 “Ra nǎ Pidhinga le ka le ddi kumi kʉ ná bbabikira søngʉe ndima dhó tala ndirigoti kpa rangʉe nju ndoa ba na nari na. 2 Kpa kana 5 kʉ nari ngʉe, rrchu ná ndrŭ ndirigoti 5 kʉ ná ri ngʉe nyodyu dhi ndrŭ. 3 Ro, rrchu ná ndrŭ dzingʉe ndima dhó tala ndirigoti ndrŭ nzá dzingʉe tala na ndima si ndri ná ché ro ri. 4 Nyodyu dhi ndrŭ ddongʉe ché ndima dhó chupa na ndirigoti kpa dzingʉe ndima dhó tala. 5 Ndoa ba ngʉ si lele nzɨ nari dho, ndrŭ nyǒ ddo løngʉe ndirigoti ndrŭ ddongʉe ddo ndima dho. 6 Ku djaina ndrŭ rrngʉe ddikpa lechu: ‘Ndoa ba si b’lo! Animo ke.’ 7 Føro bbabikira krʉ dangʉeni ndirigoti ndrŭ tayarishangʉe ndima dhó tala. 8 Rrchu ná ndrŭ pongʉeri nyodyu dhi ndrŭ dho: ‘Anibbʉ nidhó ché ro ko dho sese dhonalo kodhó tala kʉ chøchø ndi dhedhe ró.’ 9 Nyodyu dhi ndrŭ ngʉngʉe logoti ndirigoti ndrŭ pongʉeri: ‘Njaro nzá ri ka ndi ka ko dho ni ma na ri, ró anira ri nanga dzi ná ndrŭ dhi ngana ndiro ni dzi ri dzí d’e.’ 10 Go ndrŭ rangʉe ché dzi ná saa na, ndoa ba singʉe si. Ndirigoti tayari ngʉe ná bbabikira ma tsungʉe ke ma na ndoa dhi fete dhi dza na ndirigoti kpa ingʉe dzaitso i. 11 Luti nja bbabikira singʉe ná saa na ndrŭ ngʉ ripo, ‘Bboke, Bboke apʉ dzaitso ko dho!’ 12 Ke ngʉngʉe logoti ndrŭ dho: ‘Bbʉbbʉ dhé ma ripo ni dho, ma nzá chu ni nyi ro ri.’

13 “Føri dho, anidi krr dhonalo ni nzá chu ddo ma, saa ma na ro maddi ri.

14 “Dhonalo ri kʉ ddiddi d’i ngø na jingʉeri ndi rá ná ke nzingʉe ndidhó njí dhi kpa ndirigoti ke bbʉngʉe ndidhó mali kpa dhona nari bbai. 15 Ddi ke dhona ke bbʉngʉe talata* 5, ddi ke dhona 2, ddi ke dhona 1 ndirigoti kpa krʉ dhona ke bbʉngʉe ri kpa dho ka ná ngatsi, føri goti ke rangʉe d’i ngø na. 16 Føro thei 5 dhona le bbʉngʉe ri ná ke rangʉe turusa nji ri na ndirigoti ke bangʉe nja ri ki 5. 17 Ndirigoti 2 dhona le bbʉngʉe ri ná ke maddi bangʉe nja ri ki 2. 18 Ro, 1 dhé le bbʉngʉe ri* dhona ná njí dhi ke rangʉe ro, ke bbɨngʉe bbù ndirigoti ke rungʉe ri bbù na.

19 “Ddo bí goti, njí dhi kpa dhó bboke ngʉngʉe ro, ke dhungʉe addu ma kpa nji ndidhó mbø na nari kpa tso. 20 Føro 5 dhona le bbʉngʉe talata ná ke singʉe ro, ke singʉe nja talata ki na 5 ndirigoti ke pongʉeri, ‘Bboke ni bbʉe talata ma dhona 5, ro anja ma ba nja ri ki 5 i.’ 21 Kedzá bboke pongʉeri ke dho: ‘Ni njiri bblo, ni kʉ bblo ndirigoti chi tøni ná njí dhi ke, ni dho ni chi sese kʉ ná ritsi nǎ, ma si ni li bí kʉ ná ritsi djo. Atsu nidzá bboke dzá hwè na.’ 22 Føri goti 2 dhona le bbʉngʉe talata ná ke singʉe ndirigoti ke pongʉeri: ‘Bboke ni bbʉe talata ma dhona 2, ro anja ma ba nja ri ki 2 i.’ 23 Kedzá bboke pongʉeri ke dho: ‘Ni njiri bblo, ni kʉ bblo ndirigoti chi tøni ná njí dhi ke, ni dho ni chi sese kʉ ná ritsi nǎ, ma si ni li bí kʉ ná ritsi djo. Atsu nidzá bboke dzá hwè na.’

24 “Ya mwisho, ddikpa dhona le bbʉe talata ná ke singʉe ro ke pongʉeri: ‘Bboke ma churie nidhó lo ronga dyurie kpakpa nari chu, ni adi nyo tso njú nzá ni zʉ nyo ná nga nǎ ro ndirigoti ni adi nyo tsɨ tso gbá nzá ni le nyo ronga ná nga nǎ ro. 25 Føri dzá lo dho ma do løe ro ma rae ndirigoti ma rue nidzá talata dz’ na. Ako nidzá ritsi ena.’ 26 Kedhó bboke ngʉngʉe logoti ke dho: ‘Ni kʉ che kʉ ná njí dhi ke ndirigoti ni kʉ tss, ni churi nari kʉ ma adi nyo tso njú nzá ma zʉ ri ná nga nǎ ro ndirigoti ma adi nyo tso gbá nzá ma le ri ronga ná nga nǎ ro, ri ká nga fø ri? 27 Nde, føro ni lié madhó mbø* bake na ndiro ma ngʉ ná dyi ma sie ri ro b’lo ri ki ndrini ro d’e.

28 “‘Føri dho, anidzi kedhó talata ndirigoti anibbʉ ri 10 talata kʉ dhó ná ke dho. 29 Nì dhó ri kʉ ná ke dho le si ri ki ndrindri ndiro ke dhó ri é bbo pli d’e, ro nga dhó ri kʉ ná ke dhó ro le si nì kʉ ke dhó nari gʉ ma dzidzi ddi. 30 Anibu pá kʉ ná njí dhi fø ke bbaidjo tɨtɨnga na. Følu i ke ve di dzzdzz ndirigoti ndi kudjo kǎ.’

31 “Ndrŭ Ddù si si kadha nǎ, ndidhó malaiká krʉ ma na ná saa na, ke si di ndidhó kadha dhi pi dhi kiti djo. 32 Krʉ kʉ ná ndrŭ tsɨ si ndima tso nju ke nji, ndirigoti ke si ndrŭ kana nga ndo, ddiddi mia ró rø ná ke adi chembø ma kana nga ndo ndrr na nari bbai. 33 Ke si chembø li ndi thó thá djó ri laidjo ndirigoti ndrr li ndi thó gru djó ri laidjo.

34 “Føri goti Pi si ripo ndi thó thá djó ri laidjó kʉ ná ndrŭ dho: ‘Le ronga madzá baba le ná ndrŭ, anisi ndiro ni tsu ngø dherr le lingʉe ná nga djó ro le thɨngʉe ni dho ná Pidhinga na d’e. 35 Dhonalo ù ngʉ ma hwi ro, ni bbʉngʉe nyo ma nyo, dda dyu ngʉ ma hwi ro, ni bbʉngʉe dda ma jø, lʉ ma ngʉe ro, ni kongʉe ma bblo; 36 ngaro* ma ngʉe ro, ni bbʉngʉe rù ma ro, dhe ngʉ ma nji ro, ni b’ongʉe ma ronga b’o. Prizo nǎ ma ngʉe ro, ni singʉe ma be.’ 37 Føro chølo dhi ndrŭ si logoti ngʉ i lo na: ‘Bboke, ko ká njangʉe ni ù ni hwi ro ngbá saa na, ro i ko vengʉe nyo bbʉ ni nyó ri, inga dda dyu ni hwi ro ngbá saa na, ro i ko vengʉe dda bbʉ ni jø ri? 38 Ko ká njangʉe ni lʉ ni kʉ ro ngbá saa na, ro i ko vengʉe ni ko bblo ri, inga ngaro ni kʉ ro ngbá saa na, ro i ko vengʉe rù bbʉ ni ro ri? 39 Ko ká njangʉe ni dhe ni nji ro, inga prizo nǎ ni kʉ ro ngbá saa na, ro i ko vengʉe si ni be ri?’ 40 Pi si logoti ngʉ kpa dho, ‘Bbʉbbʉ dhé ma ripo ni dho, ma djoi kana rere pli kʉ ná i kpa kana ddikpa ke dho ni njingʉe ná føri i kʉ ma dho ni njingʉe nari.’

41 “Føri goti ke si ripo ndi thó gru djó ri laidjó kʉ ná ndrŭ ni: ‘Anituni ma kuso ro, ni wa wani ná ndrŭ ndirigoti anira Diabolo ma, kedhó malaiká ma na dho le thɨngʉe ná cho ró nŭnŭnga dhi kazz na. 42 Dhonalo ù ngʉ ma hwi ná saa na, ni nzá bbʉngʉe nyo ro ma nyó ri, ndirigoti dda dyu ngʉ ma hwi ná saa na, ni nzá bbʉngʉe dda ro ma jø ri. 43 Lʉ ma singʉe ná saa na, ni nzá kongʉe ma ro ri, ngaro ma ngʉe ná saa na, ni nzá bbʉngʉe rù ro ma ro ri, dhe ngʉ ma nji ndirigoti prizo nǎ ma ngʉe ná saa na, ni nzá b’ongʉe ma ronga ro ri.’ 44 Føro fø kpa maddi si logoti ngʉ: ‘Bboke, ko ká njangʉe ni ù ni hwi ro inga dda dyu ni hwi ro inga lʉ ni kʉ ro inga ngaro ni kʉ ro inga dhe ni nji ro inga prizo nǎ ni kʉ ro ngbá saa na, ro i ko vengʉe ni tsotso ko nzá ri?’ 45 Føro ke si logoti ngʉ kpa dho: ‘Bbʉbbʉ dhé ma ripo ni dho, nzá ni njingʉe rere pli kʉ ná i kpa kana ddikpa ke dho, ná føri ngʉe nzá ni nji ma dho nari.’ 46 Ndirigoti fø kpa si cheni theinga dho,* ro chølo dhi ndrŭ si cho ró nŭnŭ di ná shinga ba.”