Roma

15 Ko kana kpakpa kʉ ná ndrŭ dho ringani ndima ddinga nga kʉ kpakpa ná ndrŭ dhó uzaifu djo. Ri nzá ngani ko di ko ji ná lo dhé nji ri. 2 Ko kana nja le ddiro dho ringani ndi di rine ndi njí ndi lai ji ná lo ndirigoti ndi njí bblolo ndiri na ndi li ke kpakpa d’e. 3 Kristo nganga ma nzɨ ddi ngʉ ndi ji ná lo nji ri, ro ndi ndini ná lo pori ɨ: “Dhu ni dhu ná ndrŭ dhó dhú ngʉ chi ma djo.” 4 Drrdrr ndingʉeni ná lo krʉ ndingʉeni nja ndi ddi longa ko dho d’e, ndiro kodhó ngatsovedha ma, ndi ndini ná lo nǎ ro si ná le isopɨdha ma na chulu ko é ngab’odha na d’e. 5 Ngatsovedha ma, le isopɨdha ma na adi bbʉ ná Mungu liri ni krʉ é Kristo Yesu ngʉe na ná ngaddidha na. 6 Fø chu nǎ ni si madha bbʉ kodhi Bboke Yesu Kristo dzá Baba dho ddi ni tso gbani ro, ndirigoti ddikpa le chu* na.

7 Anidi ni kó bblo ni kana Kristo kongʉe ni nari bbai, dhonalo føri adi madha bbʉ Mungu dho. 8 Ma ripo ni dho Kristo ngʉngʉe Wayaudi dhó njí dhi ke, ndiro ndi dhǒ Mungu pongʉe ná lo dzá bbʉbbʉnga ndirigoti ndi dhǒ kpa bbui dho Mungu njingʉe ná tsodha si njini nji nari d’e. 9 Føri kina, fø lo njingʉeni ndiro ndrŭ tsɨ bbʉ madha Mungu dho kedzá zølo djotsina d’e. Ndi ndini ná lo pori ná i ri bbai: “Ri kʉ føri dho i ma ungʉe ni tso pʉlʉpʉlʉ ndrŭ tsɨ kana ri ndirigoti ni ró dho dho ma si madha dhi dyi ngo.” 10 Godhé Mungu pori: “Ndrŭ tsɨ, aninji hwè ddironga ndidzá ndrŭ na.” 11 Føri goti godhé: “Anibbʉ madha Yova* dho, krʉ kʉ ná ndrŭ tsɨ ndirigoti krʉ kʉ ná ndrŭ má ke.” 12 Føri goti Isaya ndingʉeri: “Yese tɨtɨ nǎ ro ddikpa ke si si, ná ke si pinyo krʉ kʉ ná ndrŭ tsɨ djo ndirigoti krʉ kʉ ná ndrŭ tsɨ si ndima dhó ngab’odha li ke djo.” 13 Ngab’odha adi bbʉ ná Mungu liri ni nanga lili hwè ma, ngoi ma na na, ni ni thí li ke djo nari dho, ndiro ni é ngab’odha na bbo pli roho takatifu dzá kpakpanga chulu d’e.

14 Le-djoi, ma uri u nari kʉ ni nanga lili bblolo na, ni kʉ lochudha na ndirigoti ni kaka ni ddi longa ni dho ni kana. 15 Nì mai ri kʉ fø ro, i lo kana nja lo ma ndi ni dho pʉlʉpʉlʉ ndiro ma nó ri nga ni dho d’e, ma dho Mungu dhoe ná nzá tso ka ndi koe le djo ná zølo djotsina. 16 Ma kʉ Kristo Yesu dhó njí dhi ke ndrŭ tsɨ dho. Ma njínji kpakpanga na Mungu dzá hwè lo-i dhi takatifu kʉ ná njí nanga plidha kana, ndiro fø ndrŭ tsɨ ngʉ ngbà ka ndi tho Mungu nyǒ ná bbʉdha, roho takatifu chulu ngʉ ke dho takatifu ná bbʉdha d’e.

17 Ma kʉ hwè na ma kʉ Kristo Yesu unake ndirigoti ma Mungu dzá njí nji nari dho. 18 Ma nzɨ lo ki ro ti ma nji ma maro ná ddikpa lo djo maddi ri, ro ma loti Kristo nji ndirigoti ke po ma chulu ndiro ma kó nja ndrŭ tsɨ tsotso nja kpa rrnga ke dho d’e ná lo djo dhé. 19 Kpa rrnga Mungu dhó roho chulu njini ná bbobbo ddù ma, ké ka ndi ke le nanga ná lo ma na djotsina. Fø chu lu, ma d’ra hwè lo-i bblo pli Kristo djo Yerusalemu nǎ ro kpø Ilirikamu na. 20 Ma kpengʉe ma njí ná lo kʉ, nzɨ ma d’ralo b’lo Kristo chuni ná ngalu, dhonalo ma nzá jingʉeri ma chi dza nja ke dhó dza rɨ na ri. 21 Ri kʉ ddiddi ndi ndini ná lo pori ná i ri bbai: “Nzá dho le d’rangʉe lo ro ke djo ná ndrŭ si ke njanja ndirigoti nzá rrngʉeri ná ndrŭ si ri famufamu.”

22 Føri dzá lo dho i ma tso chongʉeni bí ina ni dhi ngana ma si nari ró. 23 Ro, kpadjo ma d’ya i eneo nǎ ma lod’ra nari tso d’ya, ndirigoti cho bí kana ma jieri bbo ma si ni ronga be. 24 Føri dho Espanye na ma si ra ná saa na, ma kʉ na ná ngab’odha kʉ ko si njani ni na nì. B’lo ko ro di ni na nari goti ma churi chu ni ka ni si ma goti ro mba ngbà Espanye na ma ra ro. 25 Ro, kpadjo ma riji ma ra Yerusalemu na ndiro ma kó følu kʉ ná takatifu kʉ ná ndrŭ tsotso d’e. 26 Makedonia ma, Akaya nǎ le-djoi ma na bae hwè ndima bbʉ bbʉdha njedha kʉ Mungu dzá ndrŭ kana Yerusalemu nǎ ná ndrŭ dho nari dho. 27 Bbʉbbʉ dhé, kpa njingʉe fø lo ndima nǎ ji na, ro kpa nǎ ngʉe Yerusalemu nǎ le-djoi dhó ddeni dhonalo ndrŭ tsɨ bangʉe kiroho nǎ ritsi ro b’lo kpa dhó ro, ná føri dho ndrŭ tsɨ dho ringangʉeni ndima kó Yerusalemu nǎ le-djoi tsotso ndima dhó le ndí ronga dhi ritsi na. 28 B’lo ma bbʉ fø ritsi kpa dhona ró, ma si da ni bba lu Espanye na ma ra ro. 29 Ma churi chu nari kʉ ni dhi ngana ma si ró, ma si Kristo dhó ro si ná bbo na mana kʉ ná ledha bbʉ ni dho.

30 Le-djoi, ma ni li kpakpa kodhi Bboke Kristo Yesu ma, roho takatifu adi bbʉ ná jidha ma na chulu, ni gba ni tso ma na ndirigoti ni di nganzi kpakpanga na Mungu tsó ma dho. 31 Aninzinga nja ma plani Yudea nǎ nzá uri ná ndrŭ dhó ro ndirigoti Mungu dzá ndrŭ dho ma mba Yerusalemu na ná i bbʉdha ndrŭ kó bblo d’e. 32 Ndirigoti ngbà Mungu ji ri ró, ma si ngʉ ni dhi ngana bbò hwè na ndirigoti ko iso si pɨni pɨ ddironga ni ma na. 33 Ngoi adi bbʉ ná Mungu é ni krʉ na. Amina.