Filemo

1 I ri kʉ Yesu Kristo djotsina le sʉ ná ke Paulo ma, kodhi djona Timoteo ma na ndi ko lai njí dhi bbo ko ji ná ke Filemo ma, 2 kodhi vena Afia ma, ko lai sødda Arkipo ma, Filemo bbá dza nǎ njuni ná ndrŭ ma na dho ná barua.

3 Kodhi Baba Mungu ma, Bboke Yesu Kristo ma na dhó ro si ná nzá tso ka ndi koe le djo ná zølo ma, ngoi ma na é ni na.

4 Ma adi mbai po madzá Mungu dho krʉ ddo ró, ni Filemo ró dho ma di ti madhó sala nǎ ná saa na, 5 dhonalo ma adi lo rr bí ina nidhó udha djo ndirigoti Bboke Yesu ma, bbatakatifu ma na dho* ni kʉ na ná jidha djo. 6 Ma rinzi nja ndrŭ ma na ni kʉ na ná udha cho ni ronga ni ddinga Kristo chulu ko ba ná bblolo krʉ djo. 7 Dhonalo ni kʉ na ná jidha djo ma rr lo nari bbʉ hwè ma dho bbo ndirigoti ri li ma kpakpa. Bbʉbbʉ dhé, madhi djona ni pɨ bbatakatifu iso pɨ.

8 Føri dho, ngbà mai ri tso uni ma dho Kristo chulu ma ja ni dho ringani ni njí ná bblolo ro, 9 ma njari ri kʉ bblo ma ddoni ni ró ni kʉ na ná jidha djotsina, ma Paulo ngó ngʉ ná ke ndirigoti prizo nǎ le sʉ ma Yesu Kristo djotsina ro. 10 Ma rinzi ni dhǒ bblonga madzá ngba Onesimu dho, ma ngʉ kedzá baba prizo nǎ* ma kʉ nari kana. 11 Anziro nga ke na mana ngʉe ni dho ri, ro kpadjo ke ngʉ mana dhi ke ko dho ni na. 12 Ma ke ki ngʉ ni dhi ngana, bbʉbbʉ dhé, ke kʉ bbo ma ji ná ke.*

13 Ma ka ma jieri ke di ma kuso ndiro ke kó ma tsotso ni rɨngana prizo nǎ ma kʉ hwè lo-i djotsina nari kana d’e. 14 Ro, ma nzá jiri ma njí ddikpa lo ro maddi nzá ni u ndi tso ro ri; ndiro nzɨ ni nji bblolo cho le cho ni ro, ro ni njí ri ni thí nǎ ro dani ná jidha na d’e. 15 Njaro ri kʉ føri dzá lo dho i ke nyienga ro sese saa dho ndiro ndi gʉ vé ngʉ ni dhi ngana theinga dho d’e ri, 16 nga nokpa kpali ndi kʉ ro ri, ro ke dada nokpa djolu, ke kʉ bbo pli le ji ná le-djo, bbo pli ma dho, ro ni dho maddi, le ndí chulu ndirigoti Bboke chulu. 17 Føri dho, njati rie nidhó kau bbai ni nja ma ri ró, ako ke ma nganga ni ka ni koe nari bbai. 18 Føri djolu pli, njati rie ta ke taeni ni dho ndirigoti ke nǎ é nidhó ddeni ró, azø ri krʉ ma djo. 19 Ma Paulo, ma ri ndí ma nganga thó na nari kʉ: Ma si ri be ngʉngʉ—nzá ni vi ni dho ringani ni bbʉ nidzá shinga nganga ma dho nari nga ro. 20 Bbʉbbʉ dhé, madhi djona ma rinzi ni tso, ni njí fø bblolo ma dho Bboke nǎ; apɨ ma iso Kristo nǎ.

21 Ma uri u nari kʉ, ni ka ni njí fø lo ngbà; føri dho ma ngandi ni dho, chu ma churi nari kʉ, ni ri nji fønga djolu maddi ro. 22 Føri kina, athɨ didha dhi nga maddi ma dho, dhonalo ma riddi nidhi sala chulu ma ki si ngʉ vi ni dhi ngana.*

23 Kristo Yesu nǎ ko tso gbani na ná noke Epafras cho zʉdha ni dho. 24 Ndirigoti ma lai njí dhi kpa Marko ma, Aristarko ma, Dema ma, Luka ma na ma cho zʉdha ddi ni dho.

25 Bboke Yesu Kristo dzá nzá tso ka ndi koe le djo ná zølo é ni na, ni dhǒ ná fø lethi djotsina.