Roma

6 Føri na mana ká kʉ ringani ko rá anzi chenga ko nji nari na ndiro Mungu dhó nzá tso ka ndi koe le djo ná zølo ngʉ bbo pli d’e? 2 Bbʉbbʉ dhé nga! Kodhó chenga dhi maisha “dhedhe,” nde føro ká ko ka ko rá anzi chenga nǎ ko di nari na ngbaribbai? 3 Kristo Yesu nǎ ko bangʉe batiso ro, ko krʉ bangʉe batiso kedzá dhe nǎ nari ká ni famu nzá? 4 Ko le d’øngʉe ddinga ke ma na kodhó dhe dhi batiso chulu. Ddiddi Kristo gangʉe bʉ ndrŭ kana ro Baba dhó kadha chulu nari bbai, ko maddi bbí wø kʉ ná maisha nǎ. 5 Njati ko tso gbani ke na kedhó dhe bbai di ná dhe dho ko dhe nari chulu ró, bbʉbbʉ dhé, ko tso si gbani ke na kedhó gadha bbai di ná gadha ko si ba ná saa djo maddi. 6 Ko churi chu nari kʉ, kodhó drrdrr nyi ma le tɨngʉe b’lo ke ma na tsú badjo, ndiro ndi tu chenga dhi kpakpanga ko ndí nǎ ro d’e. Ko dho nzá ringani ko ki é chenga dhi nokpá ri. 7 Dhonalo ddikpa ke dhedhe ró, fø ke dhó chenga zø njini nji.*

8 Ko chengʉeni ddinga Kristo ma na nari bbai, ko uri u nari kʉ shi ma ko si di ddinga i ke ma na. 9 Ko churi chu nari kʉ, Kristo ki ro nzɨ dhe ri dhonalo ke gangʉe b’lo. Føri dho, dhe ro nga kʉ kpakpanga ki na ke djo ri. 10 Ke dhengʉe ndiro ndi si dhe si* ddikpa ina theinga dho d’e. Ro, kpadjo ke kʉ shi nja ndi njí Mungu ji ná lo d’e. 11 Føri bbai chenga njidha dhi lo kana aninja ni che cheni nari bbai, ndiro ni njí Mungu ji ná lo Kristo Yesu dyø ná ndrŭ bbai d’e.

12 Føri dho, nzɨ ni bbari chenga nyó pi ni ndí dhe ka ndi dhe nari djo ndiro nzɨ ni ngarr ni ndí dzá ù dho ró. 13 Nzɨ ni bbʉ ni ndí* chenga dho, chelo le nji na ná ritsi bbai, ro anibbʉ ni Mungu dho che cheni ná ndrŭ kana ro ga nari bbai. Anibbʉ ni ndí* Mungu dho bblolo le nji na ná ritsi bbai. 14 Ri nzá ngani dhe nyó pi ni djo ri dhonalo ni ro nga kʉ Yadha tsena ri, ro kpadjo ni ba Mungu dhó nzá tso ka ndi koe le djo ná zølo.

15 Nde, føri na mana ká kʉ ko dho ringani ko njí chenga ko ba Mungu dhó nzá tso ka ndi koe le djo ná zølo b’lo ndirigoti ko kʉ Yadha tsena nga nari dho? Bbʉbbʉ dhé, ri nga kʉ fø ri! 16 Ddikpa ke dho ni bbʉ ni ndiro ni rrnga ke dho nokpa bbai ró, ni e fø ke dhó no tsena nari ká ni chu nzá? Føri dho, ni ka ni é dhe dhi ngana adi le mba ná chenga dhó nokpa inga chølo dhi ngana adi le mba ná ngarrdha dhó nokpa. 17 Ko mbai po Mungu dho dhonalo kʉ nì mai ni ngʉe ddikpa saa na chenga dhi nokpá ro, kpadjo ni ngarr ni thí nǎ ro ni dho le ddinga ná lo dho. 18 B’lo ni kloni chenga nǎ ro nari goti ni ngʉngʉe chølo dhi nokpá. 19 Ma loti ndrŭ adi loti nari bbai ni dho, dhonalo ni nzɨ lonangane bbo ri, ni lonangane ni ndí chulu. Ni ngʉ adi ribba ni ndí dzá ù liri ni ngʉ nzá tsetse ná lo ma, chelo ma na dhi nokpá. Ro, kpadjo ringani ni dyø chølo ma, takatifu kʉ ná lo ma na dhi nokpá ni ngʉ ná ù. 20 Dhonalo chenga dhi nokpá ni ngʉe ná saa na nzá nidhó lo ungʉeri ni njí chølo ri.

21 Fø saa na ni ngʉ adi nji ná lo nǎ ro ká ngbá lo singʉe? Ni njingʉe ná lo adi do pá ni djo njʉ, ndirigoti ri kʉ dhe dhi ngana adi le mba ná lo. 22 Ro, kpadjo ni kloni b’lo chenga nǎ ro nari bbai, aninji takatifu kʉ ná lo Mungu dhó nokpá bbai, ná føri nǎ ro ni si cho ró nŭnŭ di ná shinga ba. 23 Dhonalo chenga kobe e dhe, ro Mungu bbʉ ná kado kʉ cho ró nŭnŭ di ná shinga Kristo Yesu kodhi Bboke chulu.