Filipi

1 I ri kʉ Kristo Yesu dhó nokpá Paulo ma, Timoteo ma na ndi Filipi nǎ ngbà gba ndima tso Kristo Yesu na ná bbatakatifu krʉ ma, ndrŭ djó nga nja ná kpa* ma, njí tsotso kó ná kpa* ma na dho ná barua:

2 Kodhi Baba Mungu ma, Bboke Yesu Kristo ma na dhó ro si ná nzá tso ka ndi koe le djo ná zølo ma, ngoi ma na é ni na.

3 Ma adi mbai po krʉ ddo ró madzá Mungu dho ni nga ma no ró, 4 ni krʉ dhi lo dho ma ddoni Mungu ró nǎ ná sala krʉ nǎ. Ddo nǎ ma ddoni ná sala krʉ ma adi nji hwè na. 5 Nidhi njí* djotsina hwè dhi lo-i ra anzi, ya kwanza ni rrngʉe lo ná nga djó ro kpø njʉnga djo. 6 U ma u nari kʉ, ni kana ngangʉe bblo kʉ ná njí tso ná Mungu si ri tso d’yad’ya ndirigoti ke si rili ri rá kpø Kristo Yesu si ná nga djo. 7 Ri thonga tho ma po fø lo ni djo dhonalo ma ji ni bbo ndirigoti ni ma na i ko ba bblonga nzá tso ka ndi koe le djo ná zølo nǎ ro. Føri kina, ni ko ma tsotso prizo nǎ ma e nari kana ndirigoti hwè lo-i djó ko e soni nari ma, ko e rine ri tso uni sheria njí nari ma na kana.

8 Mungu i chu ngbá ngatsi ma ma jiri ma nja ni krʉ ki vi nari ngbà. Ma ji ni bbo ddiddi Kristo Yesu ji ni bbo nari bbai. 9 Ndirigoti ma adi rinzi nidhi jidha rá anzi dhi ndi dhi nari na, ddi ronga d’ʉ kʉ ná lochudha ma, bblo pli le lo famu nari ma na. 10 Ri uri ni d’i bbo pli na mana kʉ ná lo utso ndiro ni é tse ni tse ro ndirigoti nzɨ ni bʉ ddikpa le thí ro maddi kpø Kristo si ná nga djo ró. 11 Godhé, ma rinzi ni ba bblonga kaka nari bbai bblo kʉ ná njí krʉ nǎ ro, Yesu Kristo chulu ndi si ro ndiri bbʉ kadha ma, madha ma na Mungu dho d’e.

12 Le-djoi, ma jiri ni churi nari kʉ, ma bani na ná lo ra rili hwè lo-i nanga plini bbo pli. 13 Ri liri pi ronga b’o ná bbasødda ma, nja ndrŭ krʉ ma na churi chu nari kʉ, ma le sʉ ma kʉ Kristo unake nari djotsina. 14 Kpadjo ma le sʉ nari li Bboke dho njínji ná bí kʉ ná le-djoi kpakpa ndirigoti ri ndri kpadhó klø ki ndri ndiro kpa d’ra Mungu dzá lo nga nǎ do ro d’e.

15 Bbʉbbʉ dhé, nja kpa lod’ra Kristo djo dda dhi le thí na ndirigoti ddi le le ddi nari na, ro nja kpa ronga i bblolo cho. 16 Bblolo cho ronga ná fø kpa lod’ra Kristo djo jidha djotsina dhonalo kpa churi chu nari kʉ, ma vʉngʉeni ma ti hwè lo-i djó lo d’e. 17 Ro, dda dhi le thí na ndirigoti ddi le le ddi nari na lod’ra ná fø kpa ronga nzɨ tsetse ná lo cho ri, dhonalo kpa riji ndima ndrí madzá nzadha ki ndri prizo nǎ ma kʉ nari kana. 18 Nde, føri nǎ ro ká ngbá lo si? Rie chelo ma, bblolo ma kpa ronga cho ri ró, Kristo djo i lo d’rani d’ra dhé, ná føri dho ma hwè ba. Ndirigoti ma si ra anzi dhé hwè ma ba nari na, 19 dhonalo ma churi chu føri si rili ma ba gødha, nidhi ddo nǎ le ddoni ná sala ma, Yesu Kristo dzá roho dhó ngatsotsokodha ma na chulu. 20 Fø lo tso njunju bbo ma jirie ná lo ma, madhó ngab’odha ma na na, ná føri dho do pa ma djo dho ná lo ro nga kʉ ri. Ma uri u nari kʉ ma si ra anzi dhé lo ma ti nari na ndiro ma bbʉ kadha Kristo dho njʉ anziro ma adi rinji nari bbai d’e, njati ma é shi ma inga ma dhedhe ma ró.

21 Shi ma di Kristo dho, ro dhe ma dhe nari ka ndi ée bblo pli ma dho. 22 Njati rie ma ndí chulu ma di shi godhé ri ró, føri kʉ madhó njí kobe; ro ma nzá chu ma ká ka ma vʉ ngbá lo ma nari ri. 23 Ma thí ddani aro kʉ ná fø lo kana dhonalo bbo ma ji nari kʉ ma kloeni ndiro ko é ddinga Kristo na d’e; bbʉbbʉ dhé føri i kʉ bblo pli kʉ ná lo. 24 Ro, ma di shi ni djotsina nari kʉ bblo pli. 25 Ma u fø lo u nari dho, ma churi chu ko si di ddinga ni krʉ ma na ndiro ma kó ni tsotso ni rá anzi ndirigoti ni é hwè na udha kana d’e. 26 Ko ki si njani ni na ró, Kristo Yesu nǎ ni kʉ na ná hwè si ndrini ndri.

27 Føri kana, ringani nidhó nyi tso gbani gba Kristo djo tilo ná hwè lo-i na. Ndiro ma si ni dhi ngana inga nzá ma ró, ma rr bblolo dhé ni djo ndirigoti ma rr ri nari kʉ ni tøni kpri ddi ni tso gbani ro, ddikpa ngaddidha na ni kʉ ro ndirigoti ddinga ni njínji ndiro ni é udha na hwè lo-i nǎ d’e ro, 28 ndirigoti nzɨ ni bbari ni tso ró ddani ná kpa tá do ro ni na karnø maddi. Ni kʉ do na nga ná føri ridho kpa si sadha ba, ro ni si gødha ba; føri kʉ Mungu dhó ro si ná lo. 29 Ni djó bblolo tso ko Kristo dzá lo dho, nga udha na ni kʉ ke nǎ nari dho dhé ri, ro ni nzani nza maddi ke djotsina d’e. 30 Ni ma na ko hwini ddikpa kpakpalo tso ró, nari kʉ nì ni nja ro ma ngʉ hwini tso ró ná kpakpalo ndirigoti ni rr ri ma hwini fø lo tso ró kpø njʉnga djo.