Roma

14 Aniko djø dhó udha djø ná ndrŭ bblo ndirigoti nzɨ ni di lod’i njonjo na nidhó ngaddidha kʉ ná ndrŭ djo. 2 Ddikpa ke ka ndi é udha na ndi nyó krʉ kʉ ná ritsi nyó, ro nga dhó udha kʉ kpakpa ná ke adi tsóbɨ dhé nyo. 3 Føri dho, krʉ ritsi nyo ná ke dho nzá ringani ndi be nzɨ krʉ ritsi nyo ná ke pá ri. Ndirigoti nzɨ krʉ ritsi nyo ná ke dho maddi nzá ringani ndi d’ilo nyo krʉ ritsi nyo ná ke djo ri dhonalo Mungu ko fø ke ko. 4 Nde, ni ká kʉ ie nja ni di lod’i nja ke dhó njí dhi ke djo d’e? Ke tøni røna ma, inga ke bʉni bʉ ma ró, føri nja kedzá bboke. Bbʉbbʉ dhé, ke si dani da dhonalo Yova* ka ndi da ke ngbà.

5 Nja ndrŭ adi riddi ddikpa ddo na mana dada nja ddo kpari djolu ndirigoti nja ndrŭ adi riddi ddo krʉ kʉ ddiddi. Ro, nja ke dho ringani ndi u ndi ddi ná lo ndi thí nǎ ro krʉ ndi nganga dho dhé. 6 Bbo na mana kʉ ri nja kʉ ná ddo nja ná ndrŭ adi rinji fø ndiro ndima bbʉ madha Yova* dho d’e. Krʉ kʉ ná ritsi nyo ná ndrŭ maddi adi rinji fø nja ndima bbʉ madha Yova* dho d’e, dhonalo kpa adi mbai po Mungu dho fø nyo dzá lo dho. Godhé, nzɨ ri nyo ná ndrŭ maddi adi madha bbʉ Yova* dho ndirigoti ndrŭ adi mbai po Mungu dho. 7 Ko kana ddikpa le ro ma nzɨ ddi adi di shi ndi nganga dzá lo dho ri ndirigoti ddikpa le ro ma nzɨ ddi adi dhe ndi nganga dzá lo dho ri. 8 Njati rie shi ma ko di ri ró, ko di shi Yova* dho ndirigoti rie dhe ma ko dhe ri ró, ko dhe Yova* dho. Føri dho ko é shi inga ko dhedhe ma ró, ko che Yova* dho dhé. 9 Kristo dhengʉe ndirigoti ke ki ngʉngʉe shi vi ndiro ndi é Bboke shi di ná ndrŭ ma, che cheni ná ndrŭ ma na krʉ djo d’e.

10 Føro ká ni lod’i nidhi djona djo addudho? Inga ni ká ke be pá addudho? Ko krʉ si tøni Mungu nji ndiro ke d’ilo ko krʉ djo d’e. 11 Dhonalo ndi ndini ná lo pori: “Yova* pori, ‘bbʉbbʉ dhé ma kʉ shi nari bbai, krʉ kʉ ná ndrŭ si koni ndima d’eti djo ma nji ndirigoti krʉ kʉ ná ndrŭ si ripo pʉlʉpʉlʉ nari kʉ, ma kʉ Mungu.’” 12 Ko kana nja ke ddiro si ndi djó lo nanga tu ndi ndiro Mungu njí.

13 Føri dho nzɨ ni d’ilo ro ni djo ni kana. Føri ró ró njonjo, avʉri nzɨ ni nji djø ka ndi djø adjoni dhó udha inga bʉ ka ndi bʉ adjoni ná ddikpa lo ro maddi. 14 Ma uri u Bboke Yesu chulu nari kʉ, nyo ko nyo ná ritsi kana nga kʉ nzá tsetse ná ritsi ro ddikpa maddi ri. Ro, ddikpa ke di riddi ddikpa ritsi nzá tsetse ri ró, føri ke nyó nari kʉ che. 15 Njati ni nyo ná nyo di rili adjoni thí bʉni bʉ ró, føro nzɨ ni jidha dhǒ ri. Nzɨ sa Kristo dhengʉe djotsina ná ke dhó udha ni nyo ná nyo chulu. 16 Nzɨ ni liri ndrŭ ti chelo ro ddikpa maddi ni nji ná bblolo djo. 17 Mungu dhó Pidhinga na mana nga kʉ le nyonga ndirigoti le jø jødha dhi ritsi ri, ro bbo na mana kʉ nari kʉ le é chølo dhi ke, le é ngoi na, ndirigoti le é hwè na roho takatifu chulu. 18 Njati ddikpa ke di njínji Kristo dho fø chu nǎ ró, fø ke tso uni u Mungu na ndirigoti ke tso ndrŭ ma si u ddi.

19 Ringani ko njí ngbà ko ka ko njí ná lo krʉ ndiro ko njí ngoi ndirigoti ko li ko kpakpa ko kana d’e. 20 Abba Mungu dzá njí ni sa nyo djotsina dhé nari tso. Bbʉbbʉ dhé, krʉ kʉ ná nyo kʉ tse ndi tse ro, ro ri nga kʉ bblo ni di bʉ ka ndi bʉ ni lai ná ritsi nyo ri. 21 Ri kʉ bblo nzɨ ni a zǎ, nzɨ ni jø wa inga nzɨ ni nji nja d’i ritsi, rie bʉ ri ka ndi bʉ adjoni thí ri ró. 22 Fø lo djo ni kʉ na ná udha kʉ ni kana lo Mungu na. Ni sie hwè na njati rie nzɨ ni thí lod’i ni djo chø kʉ ni nyǒ djó ri ni nja ná lo djotsina ri ró. 23 Ro, ddikpa ke nanga di rɨni rɨ ndi ji ndi nyó ná nyo djo, ro i ke nyó ri ngo ró, fø ke nji chenga. Dhonalo ke nji nzá d’yʉ ndi udha ró ná lo ndirigoti nzá d’yʉ ndi udha ró ná lo krʉ e chenga.