Matayo

15 Føro, Bbafarisayo ma, nga ndi ná kpa ma na singʉe Yesu dhi ngana ndirigoti kpa dhungʉeri ke tso: 2 “Ni unakpa ká ko bbui bbangʉe ko dho ná yadha dyø nzɨ addudho? Loroji na, kpa nganyo nzá ndima ʉ* ndima thó ro.”

3 Ke ngʉngʉe logoti kpa dho: “Nde, ni ká Mungu dhó yadha bé pá nidhó yadha djotsina addudho? 4 Loroji na, Mungu pongʉeri: ‘Abbʉ heshima nidzá baba ma dho, nidzá mama na’ ndirigoti ddikpa ke po che kʉ ná lo* ndidzá baba inga ndidzá mama ró, fø ke ringani le hwihwi.” 5 Ro, ni ripo, ddikpa ke pori ndidzá baba inga ndidzá mama ni: “Ni tsotso ma ka ma koe na ná ritsi krʉ ma bbʉ bbʉdha Mungu dho b’lo” ró, 6 fø ke dho nzá ringani ndi bbʉ heshima ndidzá baba dho ri.” Føri dho, ni liri Mungu dzá lo é nga na mana kʉ ri nidhó yadha djotsina. 7 Ni kʉ aro kudjo dyʉ,* Isaya pongʉe bbʉbbʉlo ni djo ɨ ndi pongʉeri unabi nǎ ná saa na: 8 ‘I ndrŭ ma má ndima tsodjo ró kpali, ro kpa thí i kʉ da ma ró ro.’ 9 Kpa bbʉ ná madha kʉ pá dhonalo Mungu dhó yadha rɨngana kpa ndrŭ dhó yadha ngaddi.’” 10 Føri goti ke pongʉeri birobiro kʉ ná ndrŭ ndrini chøchø ndi kuso ndirigoti ke pongʉeri kpa dho: 11 “Ri nga kʉ le tso lu tsu ná ritsi i adi le sa ri, ro ri kʉ le tso nǎ ro si ná ritsi.”

12 Føro ke unakpa singʉe ke dhi ngana ro, kpa dhungʉeri ke tso: “Ni poe ná chá lo bʉe Bbafarisayo thí bʉ nari ká ni chu ngbà?” 13 Ke ngʉngʉe logoti: “Nzá madzá ra nǎ Baba zʉ ná ritsi le si hwahwa. 14 Anibba fø kpa nidhó ro. Føri kʉ nga nyǒ kʉ ná kpa chutso ddá ri. Njati nga nyǒ kʉ ná ke di chutso ddá nga nyǒ kʉ ná ke dho ró, fø kpa krʉ ra bʉni bbù na.” 15 Petro pongʉeri: “Atu ni bbʉe ná chá loroji nanga ko dho di.” 16 Føro ke pongʉeri: “Ni nganga ma ká lo famu nzɨ ddi? 17 Le tso lu tsu ná ritsi adi da estoma* na ndirigoti ri adi da wese* na nari ká ni chu nzá? 18 Ro, le tso lu vʉ ná ritsi adi si le thí nǎ ro ndirigoti føri adi le ngʉ nzá tsetse ri. 19 Loroji na, le thí nǎ ro i che kʉ ná ngaddidha adi si, føri i kʉ ndrŭ hwidha ma, uzinifu ma, uasherati* ma, gbʉ ma, kali dhi lo le ti ndrŭ djo nari ma, Mungu le dhu nari ma na. 20 Føri i kʉ sa adi le sa ná ritsi, ro nzá le ʉ* le thó ro le nganyo nari nzɨ adi le ro sa ri.”

21 Føga ro Yesu rangʉe Tiro ma, Sidoni ma na nǎ eneo na. 22 Føro, Foenike nǎ ddikpa isɨle singʉe fø eneo nǎ ro Yesu dhi ngana ndirigoti le pongʉeri ke dho ndi chu bbobbo ri na: “Bboke, Daudi Ddù, abe zø ma djo. Madzá singba ngba gó nzá bbo.” 23 Ro, ke nzá ngʉngʉe logoti ro ddikpa maddi le dho ri. Føro ke unakpa ndringʉeni ke kuso ro kpa pongʉeri ke dho: “Apori fø le rara dhonalo fø le gʉ ndi nanga jø ko una che ró.” 24 Ke ngʉngʉe logoti: “Ma le chongʉe Israeli bbá ndrŭ tsɨ kana vivi ná chembø nedha dho dhé.” 25 Ro, fø isɨle singʉe koni Yesu nji ndirigoti le pongʉeri: “Bboke, ako ma tsotso.” 26 Ke ngʉngʉe logoti: “Ri nga kʉ bblo le dzì nzø dhó mukati, nari le bbʉ tsɨ kalʉ dho ri.” 27 Le pongʉeri: “Bbʉbbʉ dhé Bboke, ri kʉ fø nì. Ro, tsɨ kalʉ ma adi ndima bai dhó mesa djó ro d’røni ná nyo tso kúkú ro nyo ddi.” 28 Føro Yesu pongʉeri le dho: “Nidhó udha kʉ bbo, abbari ri njini ni dho ni jiri nari bbai.” Føro thei ledzá singba ngba gøngʉe gø.

29 Føga ro Yesu ra ro, ke singʉe Galilea nǎ jʉdda tso ro. Føri goti ke djingʉe ngøtsɨ djo ndirigoti ke dingʉe gʉna. 30 Føri goti birobiro kʉ ná ndrŭ singʉe Yesu dhi ngana tsú kó tsu ná ndrŭ ma, tsú ró nja sehemu ro tsu na ndrŭ ma, nzɨ nyǒ nganja ná ndrŭ ma, nzɨ tso loti ná ndrŭ ma ndirigoti nja kʉ ná dhe kpari kʉ ró ná ndrŭ ma na. Ndirigoti ndrŭ lingʉe fø ndrŭ kpari ke nji. Føro Yesu gøngʉe fø ndrŭ krʉ. 31 Føri dho, ndrŭ nanga kengʉeni bbo ndima nja, nzɨ tso e loti ná ndrŭ loti, tsú ró nja sehemu ro tsue ná ndrŭ gøgø, tsú kó tsue ná ndrŭ bbibbi ndirigoti nzɨ nyǒ e nganja ná ndrŭ nganja nari dho. Føro ndrŭ bbʉngʉe madha Israeli bbá Mungu dho.

32 Ro, Yesu nzingʉe ndi unakpa ndirigoti ke pongʉeri kpa dho ɨ: “I ndrŭ dhi ri zø ma njinji dhonalo ndrŭ ma na ko di ddinga iga ddo 3 b’lo ndirigoti ndrŭ nyo ná ritsi ro kʉ nga. Ma nzá jiri ma bbari ndrŭ rá ù na ri dhonalo ndrŭ ka ndima rá rrni ù dho chu na.” 33 Ro, ke unakpa pongʉeri ke dho: “Nga tsotso kʉ ná i nga na ká ko ka ko ba mukati fø ndrŭ kpari o li na ná ngatsi ngbaribbai?” 34 Yesu dhungʉeri kpa tso: “Nidhó ká mukati kʉ thɨ?” Kpa pongʉeri: “Ri kʉ 7 ndidhi rere bbè djú na.” 35 Føri dho, b’lo ke pori birobiro kʉ ná ndrŭ di gʉna nari goti, 36 ke dzingʉe 7 kʉ ná mukati ma, bbè ma na. Føro mbai ke po nari goti ke d’rɨngʉe ri nanga ndirigoti ke ngangʉe ri ndodha tso ndi unakpa dhona. Føro ke unakpa ndongʉe ri birobiro kʉ ná ndrŭ dhona. 37 Ndrŭ krʉ nyongʉe nga ndima o li ná ngatsi ndirigoti kpa gbangʉe nyo tso kúkú tso pɨpɨ d’yó* 7. 38 Fø nyo nyongʉe ná kpetsi kpa ngʉe 4 000, nzá le zø isɨ ndrŭ ma, nzø ma na ro. 39 Mwisho, b’lo ndi pori ndrŭ rá nari goti, Yesu djingʉe bbú na ndirigoti ke rangʉe Magadani nǎ eneo na.