Luka

24 Ro, yenga ddo kana ya kwanza ddo dyi, ndrŭ singʉe ndima thɨngʉe ná djuu ngø ná fø tsó na bbʉtsó kukú kabuli* djo. 2 Ro, ndrŭ singʉe dju ro dze le dze ndi kabuli* tso ró ro ro. 3 Kabuli* na ndrŭ tsu ro, ndrŭ nzá singʉe Bboke Yesu dzá bʉ ro ri. 4 Go fø lo ngʉ ndrŭ djǒ nanga ngbʉ ro, aro kʉ ná kpetsi kpa tøngʉeni ndrŭ kuso, chachá ná rù kʉ ndima ró ro. 5 Fø ndrŭ do løngʉe bbo ndirigoti ndrŭ tsingʉe ndima djǒ dz’ djo. Føro fø kpetsi kpa dhungʉeri ndrŭ tso: “Ni ká shi kʉ ná ke ne che cheni ná ndrŭ kalu addudho? 6 Fø ke ro nga kʉ iga ri, ke gaga. Anino go ke ngʉe Galilea nǎ ro, ke pongʉe ni dho ná lo nga. 7 Ke ngʉ adi ripo, ndrŭ Ddù si bbʉni chenga dhi kpa dhona ndirigoti kpa si ke tɨ tsú badjo, ro ddo gbo djó ke si gaga.” 8 Føro ndrŭ nongʉe ke ngʉ adi po ná lo nga. 9 Føro fø isɨ ndrŭ ngʉngʉe kabuli* djó ro ro, ndrŭ d’rangʉe fø lo 11 kʉ ná kpa ma, nja ndrŭ krʉ ma na dho. 10 Føri ngʉe Maria Magdalene ma, Yoana ma, Maria Yakobo dzá mama ma na. Fø ndrŭ ma ngʉe na ná nja isɨ ndrŭ maddi ngʉ fø lo d’ra cho Yesu ngʉ adi chó ná kpa dho. 11 Ro, kpa njangʉe fø lo nga na mana kʉ ri, ndirigoti kpa nzá ungʉe fø isɨ ndrŭ d’ra ná lo ro ri.

12 Ro, Petro dangʉeni ro, ke d’angʉe kabuli* djo. Følu ke si ro ke d’ingʉe ndi nanga ro, ke njangʉe rù* dhé. Føro ke ngʉngʉe addu ma njini nari ndi dhu ndi tso ro.

13 Fø dyi nganga Yesu unakpa kana aro kʉ ná kpa ngʉ ra Emaus dhi bba gʉ, fø bba ngʉe chøchø kilometre 11* Yerusalemu nǎ ro, 14 ndirigoti kpa ngʉ loti ndima kana nji njingʉeni ná fø lo krʉ djo.

15 Fø lo djo kpa ngʉ loti ndirigoti ngaddi ná saa na, Yesu nganga maddi ndringʉeni kpa kuso ndirigoti ke ma ngangʉe bbi tso ddinga kpa ma na. 16 Ro, ke nyi kpa chu nari ró i kpa nyǒ djó nga tso chongʉeni cho. 17 Ke dhungʉeri kpa tso: “Føri ká ngbá lo djo ni loti ni kana bbi ni si bbí ro ri?” Føro kpa tøngʉeni njedha na ndima kʉ ro. 18 Kpa kana Kleopas ró dho kʉ ná ke ngʉngʉe logoti: “Ni ká kʉ d’i ngø nǎ ro si ná ke ndirigoti Yerusalemu nǎ nga ndrŭ ro kʉ ná ngana di ná ke, nzá ni chu* i bba njieni i ddo kana ná lo ro?” 19 Ke dhungʉeri: “Ri ká kʉ ngbá lo?” Kpa ngʉngʉe logoti: “Nazareti nǎ Yesu djó lo, Mungu ma, krʉ kʉ ná ndrŭ ma na njí ndi dhongʉeri ndi kʉ kpakpa kʉ ná nabi, ndi nji ná lo ma, ndi tso nǎ lo ma na chulu ro; 20 ndirigoti kodhó bbakuhani djó bbobbonga ma, chutso ddá ná kpa ma na bbʉe ke le hwihwi ndirigoti kpa tɨ ke tsú badjo. 21 Ro, ko ngʉ riddi føri kʉ Israeli ka ndi sie klo ná ke. Føri kina i ri kʉ ddo gbo fø lo njini ná nga djó ro. 22 Føri goti ko kana nja kʉ ná isɨ ndrŭ liri ko nanga keni bbo, dhonalo ndrŭ ra bbʉtso kukú kabuli* djo, 23 føro ndrŭ si kedzá bʉ ro nzá; ro ndrŭ ngʉ ro, ndrŭ pori ndima nja ké dho le nanga ka ndi keni ná lo, ndima nja malaiká, ná kpa pori ke kʉ shi. 24 Føri goti ko kana nja kpa ra kabuli* djo ro, kpa si lo ro fø isɨ ndrŭ d’rae nari nganga bbai, ro ke ro i nzá kpa nja ri.”

25 Føro ke pongʉeri: “Nga dhó nyod’yu kʉ ná kpa, ni thí o li bbanabi pongʉe ná lo krʉ udha dho! 26 Ri ká nzá ngangʉeni Kristo nzani føri bbai ndiro ndi tsu ndidzá kadha na d’e ri?” 27 Føri goti ke tungʉe ndi ndini ná lo nǎ ndi ronga lø ná lo nanga kpa dho krʉ, ke ngangʉe ri tso Musa djó ro, kpø nja bbanabi krʉ djo.

28 Mwisho, kpa singʉe ndima e ra na ná bbaka na ro, Yesu njingʉe ndi go ji ndi rá anzi nari bbai. 29 Ro, kpa chongʉe ke tso ɨ ndima ripo ro: “Akoma ma iga dhonalo ngasdjó nga si chøchø ndirigoti nga kʉ chøchø ndi tɨtɨ.” Føro ke tsungʉe adzá ndirigoti ke ma dingʉe kpa ma na. 30 Føro nga kpa ngʉ nyo ro, ke dzingʉe mukati, ke lengʉe ri ronga, ke d’rɨngʉe ri nanga ndirigoti ke ngangʉe ri ndodha tso kpa dhona. 31 Føro kpa nyǒ tso wengʉeni pʉlʉpʉlʉ ndirigoti kpa chungʉe ke nyi thei, ro ke tsungʉe nu kpa kana ro. 32 Føro kpa ngʉ riti ɨ ndima kana: “Ko thí ká e rørø nzɨ, chu nǎ ke e loti ko na ndirigoti ndi ndini ná lo nanga ke e tu pʉlʉpʉlʉ ko dho ná saa na? 33 Føro kpa dangʉeni thei ro, kpa ngʉngʉe Yerusalemu na, ro kpa singʉe 11 kʉ ná kpa ma, kpa nju ndima tso na ná ndrŭ ma na ro, 34 ná fø ndrŭ pongʉeri kpa dho: “Bboke ga bbʉbbʉ dhé, ná ke dho ndi Simoni dho maddi!” 35 Føro kpa d’rangʉe chu nǎ njieni ná lo ma, ngbaribbai ma ndima chue ke nyi mukati nanga ke d’rɨ ro nari ma na.

36 Go kpa ngʉ loti fø lo djo ná saa na, ke nganga tøngʉeni kpa kana kati na ndirigoti ke pongʉeri: “Ngoi é ni na.” 37 Ro, kpa do løngʉe bbo ndirigoti kpa ronga ngʉ tata nari dho, kpa ngʉ riddi ddikpa malaika* ndima nja ri. 38 Føri dho ke pongʉeri kpa dho: “Ni ká do nji addudho? Ndirigoti ni nanga ká rɨni addudho? 39 Aninja ma kó ma, ma thó ma na; ri kʉ ma nganga, dhonalo malaika ró nga e nyó ma, kpà ma na ro ma ró ri kʉ nari bbai ri.” 40 Fø lo ke ngʉ po ro, ke dhongʉe ndi kó ma, ndi thó ma na kpa dho. 41 Ro, kpa ngʉe hwè na bbo ndirigoti kpa nanga kengʉeni bbo nari dho, kpa dho nzɨ fø lo ro ngʉ uni ri. Føro ke dhungʉeri: “Nidhó ká kʉ nyodha dhi ritsi ro ddi iga?” 42 Føri dho kpa bbʉngʉe bɨ le bɨ ná bbè lungú ke dhona. 43 Ke kongʉe ri ndirigoti ke angʉe ri nì kpa njanja ro.

44 Føri goti ke pongʉeri kpa dho: “Go ko ngʉe nì ma na ro, ma pongʉeri ni dho nari kʉ, ringani ma djo ndini Musa dhó Yadha ma, Bbanabi ma, Zaburi ma na nǎ ná lo krʉ njini njí.” 45 Føri goti ke kongʉe kpa tsotso ndiro kpa famu ndi ndini ná lo bblo d’e, 46 ndirigoti ke pongʉeri kpa dho, “I ri kʉ ndi ndini ná lo: ri uri Kristo nzani nza, ro ddo gbo djó ke gaga, 47 ndirigoti ngbà leni ná le zø njini ke ró dho chulu, ná føri ringani d’rani krʉ ndrŭ tsɨ kalu, Yerusalemu nǎ ro ndi tso ngani ro. 48 Ni dho ringani ni é fø lo dhi dimu. 49 Anirr di! Ma si madzá Baba tsoeni djo ná ritsi cho ni djo. Ro, anidi i vile nǎ kpø ni ba arø ro si ná kpakpanga ná nga djo.”

50 Føro ke rangʉe kpa na Yerusalemu nǎ ro kpø Betania na. Ke ngbengʉe ndi thó ndirigoti ke lengʉe kpa ronga. 51 Kpa ronga ke ngʉ lé ro, kpa kana nga ndongʉeni ke na ndirigoti ke ngbengʉeni ra na. 52 Kpa kongʉeni ke nji ndirigoti kpa ngʉngʉe Yerusalemu na bbò hwè na ndima kʉ ro. 53 Føri goti krʉ ddo ró kpa ngʉe hekalu nǎ Mungu dho ndima madha bbʉ ro.