Marko

14 Ddo gʉ dingʉe aro Pasaka ma, nga nǎ thì kʉ ná mukati dhi fete ma na dho. Ro, bbakuhani djó bbobbonga ma, nga ndi ná kpa ma na ngʉ rine ndima lø Yesu mayele na ndirigoti ndima hwi ke hwi; 2 ro kpa ngʉ ripo: “Ri nzá ngani ri é fete dhi ngana ri, dhonalo njaro føri ka ndi bbʉ ngbʉngbʉ ndrŭ kana.”

3 Betania nǎ Yesu ngʉe korøkorø ngʉe ró anziro ná ke Simoni bbá ndi nganyo ro ná saa na, ddikpa isɨle ndringʉeni ke kuso albatre dhi dju na le thɨ ná chupa nǎ bbo ró dzi dyu ná djuu ngø ná ché na, ri ngʉe nardo le nzǐ ná tsó kpali na le thɨ ná ché. Le pʉ chupa tso nari goti, le ngangʉe ri ddodha tso ke djǒ djo. 4 Føro nja kpa ngʉ riti ndima kana ka ndima nanga kani ro: “Djuu ngø ná fø ché ká le sa fø addudho? 5 Fø ché nanga le ka le dzie ró ná mbø ka ndi dae da dinari* 300 djolu, nari le ndoé njedha dhi ndrŭ dho!” Fø le dzá lo kangʉeni kpa lu bbo.* 6 Ro, Yesu pongʉeri: Anibba fø le nidhó ro. “Ni ká fø le djǒ nanga ngbʉ addudho? Fø le nji bblo kʉ ná lo ma laidjo. 7 Dhonalo njedha dhi ndrŭ sie nì dhé ni kana ndirigoti ni ka ni njí bblolo kpa dho ni ji ná saa na, ro ma nga sie ni kana krʉ ddo ró ri. 8 Le nji ngbà ndi ka ndi njí ná lo; le ddo djuu ngø ná ché ma djo nzina, ma d’ødha dho. 9 Bbʉbbʉ dhé ma ripo ni dho, i hwè dhi lo-i si d’rani dz’ djolu ná nga krʉ lu, ndrŭ si loti fø isɨle njingʉe ná lo djo maddi ndima nó na le nga d’e.”

10 Føri goti 12 kʉ ná kpa kana ddi ke Yuda Iskariote rangʉe bbakuhani djó bbobbonga dhi ngana ndiro ndi dzí ke nanga kpa na d’e. 11 Føri kpa rr ro, kpa nanga jingʉeni ji ndirigoti kpa tsongʉeni ndima mbøkpa bbʉ ke dho. Fønga djó ro ke ngʉ adi Yesu nanga ndi ka ndi dzí ná chu ne.

12 Nga nǎ thì kʉ ná mukati dhi fete dzá ya kwanza ddo dyina, føri kʉ Pasaka dhi bbʉdha le ngʉ adi bbʉ ná dyi, ke unakpa singʉe ke dhi ngana ndirigoti kpa dhungʉeri ke tso: “Ni ká jiri ko rá Pasaka dhi nyo thɨ ni dho ngbaga?” 13 Føro ke chongʉe ndi unakpa kana aro kʉ ná kpa ndirigoti ke pongʉeri kpa dho: “Anira vile na ndirigoti ni si nju dda dhi no d’u ndi djó ná ke na. Anira ke ulu, 14 ndirigoti ke tsu ddikpa dza na ró, anipori fø dza ba dho, ‘Mwalimu dhuri ɨ: “Ma unakpa ma na ko ka ko nyó nǎ Pasaka ná dza ká kʉ ngbaga?”’ 15 Ke si bbo nanga kʉ ná chumba dho ni dho etaje djo, bblo le kpe krʉ kʉ ná ritsi ndi nǎ ro. Anithɨ Pasaka ko dho føga.” 16 Føro ke unakpa ra ro, kpa tsungʉe vile na ndirigoti kpa singʉe krʉ kʉ ná ritsi ro ke poe ndima dho nari nganga bbai. Føri goti kpa thɨngʉe Pasaka.

17 Ngasdjó nga si ro, ke ma singʉe ndi una 12 kʉ ná kpa ma na. 18 Mesa tso ró ndima nganyo ro Yesu pongʉeri: “Bbʉbbʉ dhé ma ripo ni dho, ni kana, ddinga ko nganyo na ná ddikpa ke si ma nanga dzidzi.” 19 Fø lo bbʉngʉe njedha bbo kpa dho nari dho kpa ngangʉe ri dhudha tso ddiddiro: “Bboke, ri ká kʉ ma?” 20 Ke ngʉngʉe logoti kpa dho: “Ri kʉ 12 kʉ ná kpa kana ddi ke, ddikpa no nǎ ko nganyo na ná ke. 21 Ndrŭ Ddù rara ndi dho, ndi djo ri ndini nari bbai. Ro, njedha ndrŭ Ddù nanga si dzi ná ke dho! Ri ka ndi ée bblo nzɨ fø ke gøeni pá.”

22 Nga kpa ngʉ nyo nari kana, Yesu dzingʉe mukati, ke nzingʉe ledha ri djo nari goti, ke d’rɨngʉe ri nanga ndirigoti ke bbʉngʉe ri kpa dhona ɨ ndi ripo ro: “Aniko ri, dhonalo ri dhǒ nari kʉ ma ndí.” 23 Føri goti ke dzingʉe divai dhi kopo, føro b’lo ndi po mbai nari goti, ke bbʉngʉe ri kpa dhona ndirigoti kpa krʉ jøngʉe ri jø. 24 Føri goti ke pongʉeri kpa dho: “I ri dhǒ nari kʉ ma ró ju, ‘koddo dhi ju,’ bí kʉ ná ndrŭ djotsina ndi si d’røni ro. 25 Ro, ma ripo ni dho: Ma nzɨ i divai ki ro jø, kpø ko ka ve si ri ki jø ni ma na Mungu dhó Pidhinga nǎ ná nga djo ri.” 26 Mwisho, b’lo kpa ngo madha le bbʉ na ná dyi* nari goti, kpa rangʉe Mizeituni dhi ngøtsɨ djo.

27 Føri goti Yesu pongʉeri kpa dho: “Ni krʉ si ma bbabba* dhonalo ri ndini: ‘Ma si chembø ró rø ná ke hwi, nari goti chembø nanga si plini dhaa.’ 28 Ro, ma ga nari goti ma si da ni ró nji Galilea na.” 29 Føro Petro pongʉeri: “Nja kpa krʉ bbá ni bbá* ma ró, ma i nzɨ ni ro bbari.”* 30 Føro Yesu ngʉngʉe logoti ke dho: “Bbʉbbʉ dhé ma ripo ni dho, njʉ i kuna nganga, økpa ngoni aro ina nari njí ni si ma gʉ gbo ina.” 31 Ro, Petro ngʉ ripo ɨ dhé: “Ri uri ko dhedhe ma ni ma na ró, ma nzɨ ni ro gʉ pɨpɨ nanga ri.” Ke una nja kpa krʉ maddi ngangʉe fø ndima ripo nari tso.

32 Føri goti kpa singʉe Getsemani le nzǐ ná ngana ro, Yesu pongʉeri ndi unakpa dho: “Anidi iga, go ma ra sala nji ró.” 33 Føro ke dzingʉe Petro ma, Yakobo ma, Yohani ma na ndirigoti ke thí ngangʉe bbo ndi vodha ba nari tso ndirigoti ke nanga ri ngʉ d’o bbo. 34 Føro ke pongʉeri kpa dho: “Ma* kʉ njedha na bbo pli hwi ka ndi hwi ma ná ngatsi. Anidi iga ndirigoti anidi kere.” 35 Føga ro ke ro ndrini sese ro, ke kongʉeni dz’ djo ndirigoti ke ngangʉe ri nzidha tso, rie ngbà ri ka ndi ka ri ró, nzɨ fø vodha tso si ndi djo. 36 Ndirigoti ke nzingʉeri: “Abba,* Baba, krʉ kʉ ná lo kaka ni dho, ró atu i kopo da ma ró ro. Ro nga ma jiri nari bbai ri, ro ni jiri nari bbai.” 37 Føro ke ngʉ ro, ke singʉe kpa ro ddo ndima ddo ro ndirigoti ke pongʉeri Petro ni: “Simoni, ni ká ddoddo dhé? Ni ró ká kʉ saa ddikpa ni di kere na ná kpakpanga kpali ro ma nga ddi? 38 Anidi kere ndirigoti anira anzi nga ni nzi nari na ndiro nzɨ ni tsu mbudha na ró. Bbʉbbʉ dhé, le thí jiri ngbà, ro le ndí i kʉ sʉsʉ.” 39 Føri goti ke ki ra ro, ke nzingʉe fø lo ki dhé. 40 Føro ke ki ngʉ ro, ke singʉe kpa ro ddo dhé kpa ddo ro dhonalo kpa nyǒ ngʉ o li. Kpa nzá chungʉe ke dho ndima po ná lo ro ri. 41 Føri goti ke ngʉ ndi unakpa dhi ngana ri si na gbo ina d’e ro, ke pongʉeri kpa ni: “Ká ɨ di ná saa na i ni ddoddo ndirigoti ni ni ronga chʉ? Ri kaka! Saa si b’lo! Aninja! Kpadjo ndrŭ Ddù bbʉni chenga dhi kpa dhona. 42 Anidani, akora. Aninjari! Ma nanga si dzi ná ke si.”

43 Føro thei, go ke ngʉ loti ro, ke una 12 kʉ ná kpa kana ddi ke, Yuda singʉe. Ke ma ngʉe sà ma, tsú ma na kʉ dhó ná birobiro kʉ ná ndrŭ ma na. Fø ndrŭ bbakuhani djó bbobbonga ma, nga ndi ná kpa ma, ngó kpa ma na chongʉe. 44 Ke nanga ngʉ si dzi ná ke bbʉngʉe i alama kpa dho: “Ddikpa ke dho ma si yambø bbʉ mbʉ ma ke mbʉ ro, ná føri i kʉ ke. Anilø ke ndirigoti anili ke nidhó bbonga tsena.” 45 Føro ke rangʉe mbrø Yesu djo ro, ke si ke kuso ro, ke pongʉeri: “Rabi!” Føri goti ke mbʉngʉe Yesu djø ndi djø ndi ro. 46 Føro kpa løngʉe ke ndirigoti kpa sʉngʉe ke sʉ. 47 Ro, føga ngʉ tøni ná kpa kana ddikpa ke pʉngʉe ndidhó sà ro, ke krrngʉe bbò kuhani dhó njí dhi ke bɨ. 48 Føro Yesu pongʉeri kpa ni: “Ni ká si ma lø sà ma, tsú ma na na gbʉ dhi ke bbai? 49 Krʉ ddo ró, ma ngʉe hekalu nǎ longa ma ddi ro, ro ni løngʉe ma ro nzá. Ro, fø lo krʉ njini ndiro ndi ndingʉeni ná lo njini d’e.”

50 Føro kpa krʉ bbangʉe ke bba ndirigoti kpa nyingʉe nga nyi. 51 Ro, jadda kʉ ná ddikpa kpetsi ke ngangʉe chøchø ndi ra ke una nari tso; ke thongʉe bblo kʉ ná uzi na le ro ná rù dhé ndi chutɨ. Føro kpa jingʉeri ndima lø ke, 52 ro, ke bbangʉe ndi ró rù bba kpa dhona ndirigoti ke d’angʉe ngaro.*

53 Føro kpa rangʉe Yesu na bbò kuhani bba, ná føga i bbakuhani djó bbobbonga krʉ ma, ngó kpa ma, nga ndi ná kpa ma na gbangʉe ndima tso. 54 Ro, Petro rangʉe Yesu una dadá kpø bbò kuhani bbá bbaidjo. Ndirigoti ke ma ngʉ di njí dhi kpa ma na rørø ná kazz tsó. 55 Fø saa na, bbakuhani djó bbobbonga ma, Sanhendrini nǎ kpa krʉ ma na ngʉ kali dhi lo ne Yesu djo ndiro ndima hwi ke d’e, ro kpa nzá bangʉe ri ro ddikpa maddi ri. 56 Bbʉbbʉ dhé, kali dhi lo ngʉ d’ra ke djo ná ndrŭ kpari ngʉe bí, ro kpa d’ra ná lo tso ro nzɨ ngʉ nju ri. 57 Luti nja kpa ki dangʉeni, ná fø kpa ngʉ ke bbø kali dhi lo na ɨ ndima ripo ro: 58 “Ko rrngʉe fø ke ɨ ndi ripo ro, ‘Ma ka ma glʉ le thó na le chi ná i hekalu glʉ ndirigoti ma chi nzá le chi le thó na ná d’i ri gbo cha.’” 59 Ro, føro ma kpa d’ra ná lo tso ro nzɨ dhé ngʉ nju ri.

60 Føro bbò kuhani dangʉeni kpa kana ro, ke dhungʉeri Yesu tso: “Ni ká po ddikpa lo ro ma nzá ddi fø lo djo? Fø kpa bbø ni na ná lo djo ká ni po ngbá lo?” 61 Ro, Yesu gongʉe ddi, ke nzá ngʉngʉe logoti ro ddikpa maddi ri. Føro bbò kuhani ngangʉe ri dhudha tso ki ke tso: “Ni i ká kʉ Kristo, le ronga leni ná Ke Ddù?” 62 Føro Yesu ngʉngʉe logoti ke dho: “O, ma i kʉ ke; ndirigoti ni si kʉ ndrŭ Ddù nja, kpakpanga dhi thá djó le thó laidjó ndi di ro ndirigoti ddironga rakpa ró ndundu ma na ndima si ro.” 63 Føro bbò kuhani thangʉe ndi ró rù nanga ndirigoti ke pongʉeri: “Ko ká ka ko ne nja ngbá lo ki ke djo? 64 Ni rr ke dhu Mungu nari rr aføna. Ni ká addu ddi* fø lo djo?” Kpa krʉ pongʉeri, ke ka dhe dho. 65 Føri goti nja ndrŭ ngangʉe sadda hwidha tso ke djo, kpa tsingʉe ke nyǒ djó nga tso ndirigoti kpa ngʉ ke d’ru ngumi na ɨ ndima ripo ro: “Ad’ra unabi.” Føro b’lo tribinale nǎ bbobbokpa b’ɨ ke bɨti nanga nari goti, kpa rangʉe ke na ra.

66 Bbaidjó agʉ ro kʉ ná ngana Petro ngʉe ro, bbò kuhani dhó njí dhi sinzø nzø kana ddikpa singba ngba singʉe. 67 Petro kazz dhǒ nari ngba nja ro, ngba njangʉe ke chøø ro, ngba pongʉeri: “Ni ma ngʉe ddi Nazareti nǎ ke, Yesu una!” 68 Ro, ke gʉngʉe fø lo ɨ ndi ripo ro: “Ma nzá chu fø ke ro ri ndirigoti ma nzá famu addu djo ma ni loti nari ro maddi ri.” Føri goti ke rangʉe ndrŭ ngʉ adi tsu lu ná ngana. 69 Føga njí dhi singba ngba nja ke ro, ngba ngangʉe ri podha tso ki føga ngʉ tøni ná ndrŭ dho: “I ri kʉ fø kpa kana ddi ke ro.” 70 Føro Petro gʉngʉe ke ki vi dhé. Føri goti tse, føga ngʉ tøni ná ndrŭ ngangʉe ri podha tso ki Petro ni: “Bbʉbbʉ dhé, ni kʉ fø kpa dhi ddi ke ro, dhonalo ni kʉ Galilea nǎ ke.” 71 Ro, ke ngangʉe chádha ndi nzǐ ndi djo nari tso ndirigoti ke tsongʉeni ɨ: “Ma nzá chu ni loti djo ná fø ke ro ri!” 72 Føri goti thei økpa ngongʉeni ri si na aro ina d’e. Føro Petro nongʉe Yesu pongʉe ndi dho ná i lo nga: “Økpa ngoni aro ina nari njí, ni si ma gʉ gbo ina.” Føro ke ró klø singʉeni si ndirigoti ke ngangʉe dzz tso.