Matayo

18 Føro Yesu unakpa singʉe ke dhi ngana ro, kpa dhungʉeri ke tso: “Bbo pli kʉ ra nǎ Pidhinga nǎ nari ká kʉ ie?” 2 Føro Yesu nzingʉe ddikpa re ngba nø, ke lingʉe ngba kpa kana, 3 ndirigoti ke pongʉeri ɨ: “Njati ni leni nzá ndirigoti ni ngʉ rere nzø bbai nzá ró, ni ro nzɨ tsu ra nǎ Pidhinga na pɨpɨ nanga ri. 4 Føri dho, ngbà thʉ ndi i re ngba bbai nari i kʉ bbo pli kʉ ra nǎ Pidhinga nǎ ná ke. 5 Ddikpa ke kó ɨ di ná re ngba ma ró dho djotsina ró, føri kʉ b’lo ko ma ná ke. 6 Ro, njati ddikpa le liri ma djo kʉ udha na ná rere i kpa kana ddikpa ke bʉni ró, ri kʉ bblo pli le sʉ kana adi drr ná ngaudha dhi dju fø le chu ndirigoti le bu le jʉdda d’u djo.

7 “Njedha dz’ dho, bʉ ka ndi bʉ le ná ritsi dzá lo dho! Bbʉbbʉ dhé, bʉ ka ndi bʉ le ná ritsi tso ro nzɨ nyini ri, ro njedha bʉ ka ndi bʉ le ná ritsi li ndrŭ nji ná ke dho! 8 Føri dho, njati rie ni thó ddikpa ri inga ni kó ddikpa ri rili ni bʉni ri ró, akrr ri krr ndirigoti abu ri da ni ró ro. Ri kʉ bblo ni ba shinga ddikpa ni thó kʉ ro inga ddikpa ni kó kʉ ro, cho ró nŭnŭnga dhi kazz na le bu ni aro ni thó kʉ ro inga aro ni kó kʉ ro nari djolu. 9 Godhé, njati rie ni nyǒ ddikpa ri rili ni bʉni ri ró, atu ni nyǒ føri tu ndirigoti abu ri da ni ró ro, dhonalo ri kʉ bblo ni ba shinga ddikpa ni nyǒ kʉ ro, aro ni nyǒ na le ni bu Gehena* dhi kazz na nari djolu. 10 Anirø ni ró nzɨ ni be rere fø kpa kana ddikpa ke ro ma pá, dhonalo ma ripo ni dho, kpadhó malaiká e krʉ ddo ró ra nǎ madzá Baba nyǒ djó nga ndima nja ro. 11* ——

12 “Ni ká ddiri ngbǎ i lo djo: “Njati ddikpa ke dhó chembø é 100 ndirigoti ri kana ro ddikpa ri vi ró, ká ke ka ndi bbá 99 kʉ ná ri nzá ngøtsɨ djo ndirigoti ndi rá vivi ná ddikpa ri ne? 13 Bbʉbbʉ dhé ma ripo ni dho, njati ke ba ri ró, ke nanga adi jini vivi e ná ddikpa fø ri dzá lo dho 99 kʉ ná nzá vie ná ri djolu. 14 Føri bbai, madzá* ra nǎ kʉ ná Baba nzá ji rere fø kpa kana ddikpa ke ro ma dhe ddi ri.

15 “Njati nidhi djona tani ta ni dho ró, ara ni d’ra* ke nji ná lo ke dho aro ro ni kʉ ná ngana. Ke rr ni ngbà ró, ni ba adjoni ba. 16 Ro, njati ke rr ni nzá ró, adzi ndrŭ ddikpa inga aro ni kina, ndiro krʉ kʉ ná lo dzá d’ʉnga chuni aro inga gbo kʉ ná ndrŭ po* ná lo ró ro d’e. 17 Njati ke gʉ fø kpa ndi rr nari ma gʉ ddi ró, ad’ra fø lo kutaniko dho. Ndirigoti ke gʉ kutaniko ndi rr nari ma gʉ ddi ró, anja ke ndrŭ tsɨ kana ddikpa ke bbai inga kitas tso nju ná ke bbai.

18 “Bbʉbbʉ dhé, ma ripo ni dho, i dz’ djó tso ni chi ná ritsi tso chini b’lo ra nǎ ndirigoti klo tso ni kló i dz’ djó ná ritsi tso kloni b’lo ra nǎ. 19 Godhé, bbʉbbʉ dhé ma ripo ni dho, njati ni kana i dz’ djó kʉ ná aro kʉ ná ndrŭ rrni ndima nzi mana dhi ri kʉ ná ngbá lo ma madzá ra nǎ kʉ ná Baba tso ró, ke si ri bbʉbbʉ kpa dho. 20 Dhonalo njati aro inga gbo kʉ ná ndrŭ nju ndima tso ma ró dho na ró, ma kʉ føga fø ndrŭ kana.”

21 Føro Petro singʉe ndirigoti ke dhungʉeri: “Bboke, madhi djona tani ta ma dho ró ká ma ka ma njí ke zø thɨ ina? Ri ká kʉ 7 ina?” 22 Yesu ngʉngʉe logoti: “Ma ripo ni dho, nga 7 ina ri, ro 77 ina.

23 “Ri kʉ føri dzá lo dho i, ra nǎ Pidhinga le ka le ddi, ddikpa pi ngʉ rine ndi gbá ndidhó ddeni tso ndidhó njí dhi kpa nǎ ro nari na. 24 Fø ddeni tso njudha tso ke nga ro, le singʉe talata 10 000* ri ngʉ ngani bbʉ ná ke na ke dhi ngana. 25 Kedhó nga ngʉe ddikpa ritsi ro maddi ndi bbʉ na fø mbø d’e ri nari dho, kedzá bboke pongʉeri le dzí ke ma, kebbá le ma, kedzá nzø ma, kedhó ritsi krʉ ma na nanga ndiri na le bbʉ ke djó fø ddeni d’e. 26 Føro fø njí dhi ke kongʉeni ndi d’eti djo, dz’ djo ndi nganja ro ndirigoti ke pongʉeri, ‘Ave ma tso ve, ma si nidhó fø mbø krʉ bbʉbbʉ ró.’ 27 Føri zø nji ndi ro, bboke bbangʉe fø mbø ke dho pá ndirigoti ke bbangʉeri ke rará. 28 Føga ro fø noke ra ro, ke rangʉe dinari* 100 ri ngʉ ngani bbʉ ndi dho ná ke ne. Ke løngʉe ke ndirigoti ke ngʉ ke chutso nzz ɨ ndi ripo ro, ‘Abbʉ madhó mbø krʉ ni nǎ ro.’ 29 Føro fø noke kongʉeni ke kó tsena ndirigoti ke ngʉ ddoni ke ró ɨ ndi ripo ro, ‘Ave ma tso ve, ma si nidhó fø mbø krʉ bbʉbbʉ ró.’ 30 Ro, ke nzá rrngʉe ke ro ri, ke bungʉe ndi lai njí dhi fø ke prizo na kpø ke ndi nǎ fø ddeni bbʉ ná nga djo. 31 Ke lai njí dhi nja kpa nja fø lo ro, kpa bangʉe njedha bbo. Kpa rangʉe ro, kpa d’rangʉe nji njini ná fø lo krʉ ndima dhó bboke dho. 32 Føri goti bboke nzingʉe fø noke ro, ke pongʉeri ke ni, ‘Ni kʉ che kʉ ná njí dhi ke, ni ddoeni ma ró ro, ma bbae ni nǎ e ná ddeni krʉ pá ni dho. 33 Ni ká nzá ka ni dhoe zølo ni lai njí dhi ke dho, ma dhoe zølo ni dho nari bbai ri?’ 34 Føro, kedzá bboke na thø djingʉe bbo ndirigoti ke bbʉngʉe ke prizo ronga b’o ná kpa dhona kpø ke ndi nǎ ddeni bbʉ krʉ ná ngadjo. 35 Madzá ra nǎ kʉ ná Baba maddi si njini ni kana nja ke ddiro na føri bbai njati ni di ni djoi zø nji ni thí nǎ ro krʉ nzá ró.”