Yohani
13 Føro, Pasaka dhi fete njí Yesu chungʉeri chu ndidhó saa kaka ndi tuni i dz’ djó ro ndi rá ndidzá Baba dhi ngana d’e nari dho, ddiddi ke jingʉe ndidzá ri kʉ i dz’ djó ná ndrŭ ji nari bbai, ke jingʉe kpa kpø mwisho djo. 2 Ngasdjó nga dhi nyo kpa ngʉ nyo nari kana, Diabolo ngʉe b’lo ndi liri Simoni ddù Yuda Iskariote thí nǎ ndi si ke nanga dzidzi ro. 3 Yesu ngʉe b’lo ndi chu ndidzá Baba bbʉ krʉ kʉ ná ritsi ndi thó thina ndirigoti ndi singʉe Mungu dhi ngana ro ndirigoti ndi ngʉ Mungu dhi ngana nari ro. 4 Føri dho, ke dangʉeni ngasdjó nga dhi nyo tso ró ro, ke tungʉe ndi ró arugu rù, føri goti ke dzingʉe kitambala nari ke sʉngʉe ndi b’ʉtso. 5 Føri goti ke ddongʉe dda base djo, nari na ke ngangʉe ndi unakpa kó ronga ʉdha tso, føri goti ke ngangʉe kpa kó ronga njʉdha tso ndi b’ʉso ndi sʉngʉe ná kitambala na. 6 Simoni Petro djo ke tso si ro, ke dhungʉeri: “Bboke, ká ni ma kó ʉ?” 7 Yesu ngʉngʉe logoti: “Ma nji ná i lo nzá ni ka ni famu kpadjo ri, ro ni si ri famu luti.” 8 Føro Petro pongʉeri: “Ni nzɨ ma kó ro ʉ pá maddi ri.” Ro, Yesu pongʉeri ke dho: “Rie nzɨ ma ni kó ʉ ri ró, ni na ko nji ddinga ná ritsi ro nga kʉ ri.” 9 Føro Simoni Petro pongʉeri: “Bboke, nzɨ ʉ ma kó kpali ró aʉ ma thó ma, ma djǒ ronga maddi.” 10 Yesu pongʉeri: “B’lo ʉ dda ná le dho ringani ndi ʉ ndi kó kpali dhé, dhonalo le e b’lo ndi tsetse lu ro. Ndirigoti ni kʉ b’lo ni tsetse ro, ro ri nga kʉ ni krʉ ri.” 11 Ke chungʉe ndi nanga sie dzi ná ke chu, ná føri dho i ke pongʉeri: “Ri nga kʉ ni krʉ i tsetse ri.”
12 B’lo ke d’ya kpa kó ʉdha tso nari goti ke thongʉe ndi ró arugu rù ndirigoti ke ngʉngʉe mesa tso ro, ro ke dhungʉeri kpa tso: “Ma nji ni dho ná fø lo ká ni famu ngbà?” 13 Ni adi ma nzǐ ‘Mwalimu’ ndirigoti ‘Bboke’ ná føri kʉ bbʉbbʉ dhonalo ma kʉ nì fø ke ri. 14 Føri dho, njati rie nì mai ma kʉ Bboke ndirigoti Mwalimu ro i ma ʉ ni kó ri ró, ni dho maddi ringani ni di ni kó ʉ ni kana. 15 Dhonalo ma bba loroji ni dho, ddiddi ma njiri ni dho nari bbai, ni maddi di rinji fø. 16 Bbʉbbʉ dhé ma ripo ni dho, njí dhi ke ro nzá darie ndidzá bboke djolu ri, ndirigoti cho le cho ná ke ro nzá darie ndi cho ná ke djolu ri. 17 Njati rie ngbà ni chu fø lo ri ró, ni kʉ hwè na ni njiri fø ró. 18 Ma nzɨ loti ni krʉ djo ri, dhonalo ma chu vʉ ma vʉ ná kpa chu. Ro, føri kʉ ndiro ndi ndingʉeni ná i lo njini d’e: ‘Madzá mukati ngʉ nyo ná ke i dani* ma tso ró.’ 19 Kpadjonga djó ro ma fø lo d’ra ni dho ri si njini nari njí ndiro ri si njini ró, ni si ri uu nari kʉ, ma kʉ fø ke. 20 Bbʉbbʉ dhé ma ripo ni dho, ddikpa le kó cho ma cho ná ke ró, fø le ko ma maddi, ndirigoti ddikpa le kó ma ró, fø le ko cho chongʉe ma ná Ke maddi.”
21 Fø lo ndi po nari goti Yesu thí bʉngʉeni bbo ndirigoti ke pongʉeri: “Bbʉbbʉ dhé ma ripo ni dho, ni kana ddikpa ke si ma nanga dzidzi.” 22 Yesu unakpa ngangʉe ndima nyǒ nanga njadha tso ndima kana dhonalo kpa nzá chungʉe ie djo ma ke ngʉ loti nari ro ri. 23 Yesu unakpa kana bbo Yesu jingʉe ná ke dingʉe Yesu kuso chøchø.* 24 Føro Simoni Petro wingʉe fø ke ndirigoti ke dhungʉeri ke tso: “Apo ko dho ke ká loti ie djo nari.” 25 Føro fø ke langʉe ndi aluti Yesu badjo ndirigoti ke dhungʉeri Yesu tso: “Bboke ri ká kʉ ie?” 26 Yesu ngʉngʉe logoti: “Ri kʉ chʉdda na ma tɨ ná mukati ma si bbʉ dhona ná ke.” Føro Yesu tɨngʉe mukati chʉdda na nari goti ke bbʉngʉe ri Simoni Iskariote ddù, Yuda dhona. 27 Fø mukati Yuda ko nari goti Shetani tsungʉe ke na, føro Yesu pongʉeri ke dho: “Anji ni nji ná lo lele.” 28 Ro, mesa tso ró kpa ngʉe na ná kpa kana ddikpa ke ma nzá ddi chungʉe føri ká ke po Yuda ní addudho ma nari ro ri. 29 Bbʉbbʉ dhé, nja kpa ngʉ riddi njaro ri kʉ Yuda dhó i kʉ mbø dhi kess nari dho i ke ripo: “Adzi kodhó lo u fete dho ná ritsi ri,” inga ke bbʉ nja ritsi ro njedha dhi ndrŭ dho ri. 30 Føri dho, b’lo ke ko fø mukati nari goti ke vʉngʉe bbaidjo thei, føri ngʉe kuna.
31 Yuda vʉ bbaidjo nari goti Yesu pongʉeri: “Kpadjo ndrŭ Ddù ba madha b’lo ndirigoti Mungu ba madha ndrŭ Ddù chulu.” 32 Mungu nganga si ke mama ndirigoti ke si ke ma thei nzá ndi rɨni rɨ ro. 33 Jadda nzø, ma ro kʉ ni kana sese saa dho go. Ni si ma nene; ndirigoti Wayaudi dho ma pongʉeri nari bbai ma ripo ni dho maddi kpadjo, ‘Ma ra ná ngana nzá ni ro ka ni si ri.’ 34 Ma wø yadha bbʉ ni dho nari kʉ, ni jini ji ni kana; ma jingʉe ni nari bbai, ni maddi anijini ni kana. 35 Føri ró i krʉ kʉ ná ndrŭ si richu nari kʉ, ni kʉ ma unakpa njati ni é jidha na ni kana ró.
36 Føro Simoni Petro dhungʉeri: “Bboke ni ká ra ngbaga?” Ro, Yesu ngʉngʉe logoti: “Ma ra ná ngana nzá ni ka ni si kpadjo ri, ro ni si si ma ulu luti.” 37 Petro dhungʉeri: “Ma ká ka ma rá ni ulu kpadjo nzá addudho? Ma si madhó shinga* bbʉ ni djotsina.” 38 Yesu ngʉngʉe logoti: “Ká ni si nidhó shinga* bbʉ ma djotsina? Bbʉbbʉ dhé ma ripo ni dho, økpa ngoni nari njí ni si ma gʉ gbo ina.”