Matayo
4 Føri goti, roho ddangʉe chutso Yesu dho ngødja na ndiro Diabolo mbu ke d’e. 2 B’lo ke chi nyo ddo 40 kana dyina blii, kuna b’u nari goti, ke ù løngʉe bbo. 3 Føri goti mbudha adi bbʉ ná ke singʉe ke dhi ngana ndirigoti ke pongʉeri: “Njati rie nì ni kʉ Mungu ddù ri ró, apori i dju kpari ngʉ mukati.” 4 Ro, ke ngʉngʉe logoti: “Ri ndini: ‘Ndrŭ dho nzá ringani ndi di shi mukati na dhé ri, ro Yova* tso nǎ ro si ná krʉ kʉ ná lo na.’”
5 Føri goti Diabolo mbangʉe ke takatifu kʉ ná bba gʉ, ndirigoti ke d’ungʉe ke hekalu djó bbo ngbeni ná ngana, 6 ndirigoti ke pongʉeri: “Njati rie nì ni kʉ Mungu ddù ri ró, atini gʉna dhonalo ri ndini: ‘Ke si loja ndidzá malaiká dho ni djo’ ndirigoti, ‘Kpa si ni d’u ndima thó thina ndiro nzɨ ddikpa dju ma b’ɨ ni kó ro ddi ró.’” 7 Yesu pongʉeri ki ke ni: “Ri ki ndini ɨ maddi: ‘Ni dho nzá ringani ni mbu nidzá Mungu Yova* ri.’”
8 Føri goti Diabolo mbangʉe ke bbo pli ngbeni ná ngøtsɨ djo ndirigoti ke dhongʉe dz’ djó pidhinga krʉ Yesu dho, ndima dhi kadha ma na. 9 Føri goti ke pongʉeri ke dho ɨ: “Afø ritsi krʉ ma si bbʉ ni dho, njati ni koni ni d’eti djo ndirigoti ni njí ddikpa lo ni bbʉ na madha ma dho ró.” 10 Føro Yesu pongʉeri ke ni ɨ: “Atuni, Shetani! Dhonalo ri ndini ɨ: ‘Ringani ni má Yova* nidzá Mungu ndirigoti ri kʉ ke ddiro dho dhé ringani ni njí takatifu kʉ ná njí ri.’” 11 Føro Diabolo bbangʉe ke bba, ndirigoti anja! Malaiká singʉe ndirigoti kpa ngangʉe ke tsotsokodha tso.
12 Yesu rrngʉe Yohani ndrŭ sʉ nari ná saa na, ke rangʉe Galilea na. 13 Føri goti ke tungʉeni Nazareti nǎ ro ndirigoti ke rangʉe di Kapernaumu nǎ jʉdda tso ro, Zebuloni ma, Naftali ma na bbá ngø na. 14 Ke njingʉeri fø ndiro nabi Isaya pongʉe ná ɨ lo njini d’e: 15 “Kɨɨ, Zabuloni dzá ngø ma, Naftali dzá ngø ma, jʉdda tso ro lu Yordani dzá ddi nga laidjó nga ma, ndrŭ tsɨ di nǎ ná Galilea ma na! 16 Tɨtɨnga nǎ di ná ndrŭ nja bbò kadha, ndirigoti dhe dhi sʉsʉ kʉ nǎ ná ngø nǎ di ná ndrŭ djó kadha si.” 17 Fø saa djó ro, Yesu ngangʉe lod’radha tso ɨ ndi ripo ro: “Anileni, dhonalo ra nǎ Pidhinga si chøchø.”
18 Galilea nǎ jʉdda tso ro lu Yesu ngʉ bbi ro, ke njangʉe aro kʉ ná kpa, føri ngʉe Simoni, Petro le ngʉ ndi nzi ro ndirigoti kedhi djona Andrea. Kpa ngʉ ndima dhó bbè-mbi djǒ dda na dhonalo kpa ngʉe bbè pɨ ná kpa. 19 Ndirigoti ke pongʉeri kpa dho: “Anisi ma ulu, ma si rili ni ngʉ ndrŭ pɨ ná kpa.” 20 Føro kpa bbangʉe ndima dhó bbè-mbi thei ndirigoti kpa rangʉe ke ulu. 21 Føga ro ndi tuni ro ke njangʉe aro kʉ ná nja kpa ki, føri ngʉe Yakobo ma, adjondi Yohani na, ná føri ngʉe Zebedayo ddui. Kpa ngʉe bbú nǎ ndima dhi baba Zebedayo ma na, ndima dhó bbè-mbi ronga ndima thɨ ro, ndirigoti ke nzingʉe kpa. 22 Føro thei kpa bbangʉe ndima dhó bbú ma, ndima dhi baba ma na ndirigoti kpa rangʉe ke ulu.
23 Føri goti ke bbingʉe Galilea lu gble, longa ndi ddi sinagogi lu ro ndirigoti Pidhinga dzá hwè lo-i ndi d’ra ro, ndirigoti ke ngʉ njonjo kʉ ná dhe ma, tsù ma na gø ndrŭ tsɨ kalu. 24 Føri goti ke djó lo gangʉe Siria lu gble, føri dho ndrŭ singʉe njonjo kʉ ná dhe kʉ ró ná ndrŭ ma, ndi ronga ndí ná ndrŭ ma, gó kʉ nǎ ná ndrŭ ma, ngarr* dhi ndrŭ ma, ddo ndí dhe ddo ná ndrŭ ma na na ke dhi ngana, ndirigoti ke gøngʉe fø ndrŭ krʉ. 25 Føri lingʉeri birobiro kʉ ná ndrŭ rá ke ulu Galilea ma, Dekapoli* ma, Yerusalemu ma, Yudea ma, Yordani tsotso lu kʉ ná ngø ma na nǎ ro.