Roma
4 Nde, kodhi bbuna Abrahamu djo ká ko ka ko po ngbá lo? 2 Njati Abrahamu nzieni chølo dhi ke ndi njingʉe ná lo djotsina ró, ke ka ndi ngbee ndi dho ná lo ka ndi ée nì, ro nga Mungu nyǒ njí ri. 3 Ndi ndini ná lo ká po ngbá lo? “Abrahamu lingʉe ndidhó udha Yova* djo, ná føri chulu ke njangʉeni* chølo dhi ke.” 4 Njínji ná ke dho le bbʉ ná ritsi nzɨ le adi nja* pá le bbʉ ke dho ná ri ri, ro ri kʉ nga ngani le bbʉ ke dho ná ritsi.* 5 Føri ró ro njonjo, njati ddikpa ke njinjí nzá ro i ke li ndidhó udha chølo dhi ri adi chelo dhi ndrŭ nzǐ ná Mungu djo ró, fø ke dhó udha adi njani* chølo. 6 Nzá mai ndi njinjí ro Mungu nja* chølo dhi ke ná ke dhó hwè djo Daudi pori ɨ: 7 “Hwè na kʉ nari kʉ, nji dhó chenga zø njini ndirigoti tsi dhó chenga djó nga tso tsini ná ke. 8 Hwè na kʉ nari kʉ, nzɨ djo Yova* ndi njingʉe ná chenga zø ná ke.”
9 Nde, fø hwè ba nari ká kʉ krr le krr ná ndrŭ dhé inga nzá le krr ná ndrŭ maddi? Dhonalo ko ripo: “Abrahamu njangʉeni* chølo dhi ke ndidhó udha chulu.” 10 Abrahamu ká le njangʉe* chølo dhi ke ngbá saa na? Ri ká ngʉe b’lo le krr ke ro, inga nzá le d’e ke krr ro? Ri ngʉe nzá le d’e ke krr ro. 11 Luti ke bangʉe ddikpa alama* ná føri kʉ ke le krrngʉe krr nari; ná føri ngʉe ke le zø chølo dhi ke ndidhó udha djotsina nari dhǒ ná kashe bbai, ndirigoti fø udha ke dhongʉe nzá le d’e ndi krr ro. Føri le njingʉe ndiro le nzi ke nzá le d’e ndima krr ro kʉ udha na ná ndrŭ krʉ dhi baba d’e, føri goti i kpa ka ndima njaeni* chølo dhi ndrŭ. 12 Føri goti ke ngʉngʉe krr le krr ná gø dhi baba maddi. Føro mai ri nga ngʉe krr le krr ná ndrŭ dho dhé ri, ro kodhi baba Abrahamu dhó udha kowu dyø nzá le d’e ndima krr ro ná ndrŭ dho maddi.
13 Dhonalo Abrahamu ma, ndi nǎ gø ma na nzá bangʉe dz’ wɨ ndima si nyo ná fø tsodha ro ddikpa yadha chulu ri, ro ri kʉ ke ngʉe chølo dhi ke udha djotsina nari chulu. 14 Njati rie yadha chulu i ndrŭ e tso djo le tsoni ná ritsi ba ri ró, føro udha dzá njí ro nga ka ndi ée ri ndirigoti Abrahamu dho le nji ná tsodha na mana ro nga eé ri. 15 Bbʉbbʉ dhé yadha dho le rrnga nzá ró, føri nǎ ro le adi malipizi ba; ro nga kʉ ná yadha nanga ro nzá le ka le d’rɨ ri.
16 Ri kʉ føri dzá lo dho i ko ba tsodha udha chulu ri, dhonalo ri kʉ pá Mungu bbʉ ko dho ná kado. Abrahamu nǎ gø krʉ ka ndima ba fø tsodha ba, ri nga kʉ yadha dho rrnga ná ndrŭ dhé ri, ro udha na kʉ ko krʉ dhi baba Abrahamu bbai ná ndrŭ maddi. 17 (Føri kʉ ddiddi ndi ndini ná i lo pori nari bbai: “Ma vʉ ni nja ni é bí kʉ ná ndrŭ tsɨ kpari dhi baba d’e.”) Abrahamu dhongʉe fø udha Mungu nyǒ njí, ná fø Mungu adi che cheni ná ndrŭ ngʉ shi ndirigoti ke adi loti nzá d’e njini ná ritsi djo b’lo njini nari bbai.* 18 Nga mai Abrahamu ngʉe ngab’odha na ndi ka ndi é dho ná lo na ro, ke lingʉe ndi thí ngab’odha djó nari dho, ke ngʉe na ná udha kʉ ndi ka ndi sie ngʉ bí kʉ ná ndrŭ tsɨ kpari dhi baba, ddiddi ke dho le pongʉe ná i lo bbai: “Ni nǎ gø sie aføri bbai.” 19 Nzá mai kedhó udha djøngʉe djø ro, ke ngʉ ngaddi ndi ndí djo dhonalo ke ndí ngʉe ddiddi dhedhe nari bbai (dhonalo kedhó cho ngʉe chøchø 100.) Føri kina ke chungʉeri chu Sara dhó cho dada nzø ka ndi gø ná nga djolu. 20 Mungu dhó tsodha djotsina ke nanga ro nzá rɨngʉeni inga ndi é udha na nga ri; føri rɨngana ke ngʉngʉe kpakpa ndidhó udha chulu ndirigoti ke bbʉngʉe madha Mungu dho. 21 Ke ungʉeri u ndi thí nǎ ro krʉ nari kʉ, Mungu ka ndi njí ndi tsoni djo ná lo ngbà. 22 Føri dho, kedhó udha chulu “ke njangʉeni* chølo dhi ke.”
23 Føro mai le ripo “ke njangʉeni”* ná fø lo nzá ndini ke djo kpali ri. 24 Fø lo ndini ko djo maddi. Ko maddi le si nja* chølo dhi ndrŭ dhonalo ko kʉ udha na che cheni ná ndrŭ kana ro gangʉe kodhi Bboke Yesu ná Ke nǎ. 25 Ke bbʉngʉeni ndi dhedhe kodhi chenga djotsina ndirigoti ke gangʉe ndiro ko nzini chølo dhi ndrŭ d’e.