Tito

2 Ro ni, ara anzi nì kʉ faida ná longaddidha djo ni loti nari na. 2 Ngó kʉ ná kpetsi kpa dho ringani ndima é ngbà ndima chu ndima dhó thʉ ndima nji ná lo kana ro, nzɨ ndima lo bé pá ro, bblo ndima lo nanga ne ro ndirigoti kpakpa ndima kʉ udha ma, jidha ma, ngatsovedha ma na kana ro. 3 Føri bbai, ngó ngʉ ná isɨ ndrŭ dho ringani ndima dhó nyi é nì Mungu do nji ná ndrŭ bbai, nga ndima kʉ ndrŭ djǒ tso gbá ná ndrŭ ro, nga ndima kʉ wa dhi noi ro, ro kpa é bblo kʉ ná lo ngaddi ná ndrŭ; 4 ndiro fø ndrŭ bbʉ shauri* jadda kʉ ná dza dhi isɨ ndrŭ dho, ndrŭ ji ndima bbá kpa ma, ndima dhi nzø ma na, 5 ndrŭ é bblo ndima lo nanga ne ro, tse ndima tse ro, nì ndima njínji ndima bba lu ro, li ndima nanga li bblolo njidha na ro, djø ndima djøni ndima bbá kpetsi kpa dho ro, ndiro nzɨ che kʉ ná lo tini Mungu dzá lo djo ró.

6 Føri bbai, ajari jadda kʉ ná kpetsi kpa dho, kpa é bblo ndima lo nanga ne ro; 7 ndirigoti adho ni nganga bblo kʉ ná loroji krʉ kʉ ná bblolo ni nji nari kana, addi tsetse ná lo nga li ni li ni d’yu ro. 8 Adi nzá djo ndrŭ ka ndima ti chelo ro ná faida kʉ ná lo ti, ndiro lo tso ró ddani ná kpa djo do pá ndirigoti nzɨ kpa ba ko djo ndima po ná chelo ro ró. 9 Ringani nokpá djøni djø ndima dhi bbobbokpa dho krʉ kʉ ná lo kana, kpa di kpakpanga nji ndima bbʉ hwè kpa dho ndirigoti nzɨ kpa di kpa nanga ndanda; 10 nzɨ kpa di kpadhó ritsi d’ud’u, ro kpa dhǒ ndima djo le ka le li le thí ngbà nari kaka ná ngatsi ndiro kpa thɨ kodhi Gødha ba Mungu dzá longaddidha ronga krʉ kʉ ná chu nǎ d’e.

11 Dhonalo Mungu dzá nzá tso ka ndi koe le djo ná zølo dhongʉeni nja ndi bbʉ gødha krʉ kʉ ná ndrŭ dho d’e. 12 Mungu longaddi ko dho ndiro ko pʉ nzɨ le Mungu do nji nari ma, i dz’ dzá tamaa ma na ko ró ro d’e; ro, ko é bblo ko lo nanga ddi ro, chølo ko nji ro ndirigoti Mungu ró ko chini njʉ kʉ ná i dz’* djó ro; 13 go ko hwè si bbʉ ko dho ná ngab’odha b’o ndirigoti bbò kʉ ná Mungu ma, kodhi Gødha ba Yesu Kristo ma na si dhoni kadha nǎ nari b’o ro. 14 Ke bbʉngʉe ndi ko djotsina le ødha dhi be ndiro ndi wø* ko yadha nanga le d’ri nari krʉ nǎ ro ndirigoti ndi liri ndrŭ tsetse, ná ndrŭ ché ndi dho, kpakpanga na ndima bblo kʉ ná njínji ro.

15 Ara anzi fø lo ni po nari na ndirigoti ali kpa kpakpa, áo kpa na bbonga na. Nzɨ bbari ddikpa le ma be ni ro pá ddi.