Marko

10 Føga ro ke ra ro, ke rangʉe Yudea nǎ thʉ* nǎ kʉ ná eneo na, Yordani dhi dda dzá chá dzɨ nga laidjo. Ndirigoti birobiro kʉ ná ndrŭ gbangʉe ndima tso ki ke kuso ndirigoti ke ngangʉe longaddidha tso ki kpa dho, ni dhé ndi ngʉ adi rinji nari bbai. 2 Føri goti, Bbafarisayo singʉe Yesu dhi ngana ndima mbu ke d’e. Kpa dhungʉe nga ke tso, ri tso ká uni u ddikpa kpetsi ke dho ndi kló ndoa nanga ndibbá le na nari djo. 3 Ke ngʉngʉe logoti: “Musa ká jangʉeri ngbǎ ni dho?” 4 Kpa pongʉeri: “Musa ungʉe ritso u le ndí isɨle le bba nari dhǒ ná barua le dhona ndirigoti le kló ndoa nanga klo le na.” 5 Ro, Yesu pongʉeri kpa dho: “Ri kʉ ni thí d’yu kpakpa nari dho i Musa ndingʉe fø yadha ni dho ri. 6 Ro, ndrŭ noni ná nga djó ro dhé, ‘Ke nongʉe ndrŭ kpetsi ndirigoti isɨ. 7 Ri kʉ føri dzá lo dho i kpetsi ke si ndidzá baba ma bba, ndidzá mama na ri, 8 føri goti kpa aro si ngʉ ddikpa le ndí. Føro nga kpa ki kʉ aro vi ri, ro ddikpa le ndí. 9 Føri dzá lo dho, b’lo tso Mungu gba nari nanga ro nzɨ ddikpa le ma ndo ddi.” 10 Føro adzá kpa ki tsu ro, ke unakpa ngangʉe ngadhudha tso ke tsó fø lo djo. 11 Ke pongʉeri kpa dho: “Ddikpa ke kló ndoa nanga ndibbá le na ndirigoti ke kø d’i le ró, fø ke nji uzinifu* ndirigoti ke nzá tøni chi ndibbá ya kwanza le dho ri. 12 Ndirigoti njati ddikpa isɨle kló ndoa nanga ndibbá ke na ndirigoti le rá køni d’i ke dho ró, fø le nji uzinifu.”*

13 Føri goti, ndrŭ ngʉ si jadda nzø na ke dhi ngana, nja ke lø nzø ronga d’e, ro ke unakpa ngʉ nzø tso gʉgʉ. 14 Fø lo ndi nja ro, Yesu lu fø lo kangʉeni ka ndirigoti ke pongʉeri: “Anibbari nzø si ma dhi ngana, nzɨ ni mburi ni cho kpa tso dhonalo ra nǎ Pidhinga kʉ ddiddi kpa bbai kʉ ná ndrŭ dho. 15 Bbʉbbʉ dhé ma ripo ni dho, njati ddikpa ke kó Mungu dhó Pidhinga re ngba bbai nzá ró, fø ke ro nzɨ tsu ri na pɨpɨ nanga ri.” 16 Føro ke gbangʉe nzø tso ndi kù kana ndirigoti ke ngangʉe nzø ronga ledha tso ndi thó ndi li kpa djolu ro.

17 Ra ke ngʉ ra ro, ddikpa ke d’angʉe ke dhi ngana, ke kongʉeni ndi d’eti djo ke nji ndirigoti ke dhungʉeri ke tso: “Bblo Mwalimu, ri ká ngani ma njí addu ndiro ma ba cho ró nŭnŭ di ná shinga d’e?” 18 Yesu ngʉngʉe logoti ke dho: “Ni ká ma nzǐ bblo kʉ ná ke addudho? Ddikpa le ro ma kʉ bblo nga, rie nga Mungu ddiro dhé ri ró. 19 Ni chu i yadha chu: ‘Nzɨ hwi ndrŭ, nzɨ nji uzinifu,* nzɨ nji gbʉ, nzɨ d’ya kali dhi lo tso ni lai djo, nzɨ d’u ritsi shasha chulu, abbʉ heshima nidzá baba ma dho, nidzá mama na.’” 20 Føro ke pongʉeri: “Mwalimu, føri krʉ kʉ nì ma adi nji madzá jaddanga nǎ ro ná lo.” 21 Yesu njangʉe ke ro, Yesu jingʉe ke ji, ndirigoti ke pongʉeri ke dho: “Nidhó ro tso vʉni ná lo kʉ ddikpa: Ara, ni dzí nidhó ritsi nanga, nari ni ndó njedha dhi ndrŭ dho, føro ni si kʉ mali ba ra nǎ. Føri goti asi, ni ngʉ ma unake.” 22 Ro, fø lo ndi rr ro ke thí bʉngʉeni bʉ ndirigoti ke rangʉe føga ro njedha na, dhonalo kedhó ritsi ngʉe bí.

23 B’lo Yesu njanga ndi ro lu gbrú ro, ke pongʉeri ndi unakpa dho: “Mbø kʉ dhó ná ndrŭ dho ri sie kpakpa bbo ndima tsu Mungu dhó Pidhinga na.” 24 Ro, ke unakpa nanga fø lo kengʉe ke. Føro ke pongʉeri ki kpa dho: “Madzá nzø, Mungu dhó Pidhinga na le tsu nari kʉ kpakpa bbo! 25 Mali dhi ke tsu Mungu dhó Pidhinga na nari kʉ kpakpa pli ngamia da shendani nyoi lú nari djolu.” 26 Fø lo kpa rr ro, kpa nanga gʉ kengʉeni bbo pli ndirigoti kpa dhungʉeri:* “Nde, afø ro ká ie ka ndi ve gø?” 27 Yesu nja kpa nyǒ nanga chøø ro ke pongʉeri: “Ndrŭ dho i nzɨ fø lo ka ri, ro Mungu dho i nì, dhonalo Mungu dho krʉ kʉ ná lo adi kaka.” 28 Føro Petro ngangʉe ri podha tso ɨ ke dho: “Anja! Ko bba kodhó ritsi krʉ ndirigoti ko ra ni ulu.” 29 Yesu ngʉngʉe logoti: “Bbʉbbʉ dhé ma ripo ni dho, ddikpa ke i bbá ndidhó dza inga ndi djoi inga ndi vei inga ndidzá mama inga ndidzá baba inga ndidzá nzø inga ndidhó nza kpari ma, ma djotsina ndirigoti hwè lo-i djotsina ró, 30 fø ke si ba 100 ina njʉ kʉ ná i dz’* djó nari kʉ: Dza kpari ma, ndi djoi ma, ndi ve-i ma, ndi yí ma, ndidzá nzø ma, nza kpari ma na, ddironga nzadha ma na, ndirigoti gosi ná dz’* djó ke si cho ró nŭnŭ di ná shinga ba. 31 Ro, ya kwanza kʉ ná bí kʉ ná ndrŭ si ngʉ ya mwisho, ndirigoti ya mwisho kʉ ná ndrŭ i si ngʉ ya kwanza.”

32 Yesu ma, ndi unakpa ma na ngʉ dji Yerusalemu na, ndirigoti Yesu ngʉ ra kpa njí. Føro ke unakpa nanga kengʉeni ke ndirigoti ke una ngʉ ra ná nja ndrŭ do løngʉe. Føro ke tungʉe ndi una 12 kʉ ná kpa ki ngatsotso ndirigoti ke d’rangʉe ndi ró si njini ná lo kpa dho: 33 “Anirr di! Ko dji Yerusalemu na ndirigoti ndrŭ Ddù si bbʉni bbakuhani djó bbobbonga ma, nga ndi ná kpa ma na dhona. Kpa si lod’i ke djo le hwi ke hwi ndirigoti kpa si ke bbʉ ndrŭ tsɨ dhona. 34 Kpa si ke gbogbo, kpa si sadda hwi ke djo, kpa si ke dhɨdhɨ ndirigoti kpa si ke hwihwi, ro ddo gbo djó ke si gaga.”

35 Zebedayo ddui Yakobo ma, Yohani na singʉe ke dhi ngana ndirigoti kpa pongʉeri ke dho: “Mwalimu, ko riji ni njí ko ji ko nzi ni tso ná lo ko dho.” 36 Ke dhungʉeri kpa tso: “Ni ká jiri ma njí addu ni dho?” 37 Kpa ngʉngʉe logoti: “Au ritso ko kana ddikpa ke si di nidzá thá djó ro ndirigoti ddikpa ke si di nidzá gru djó ro nidzá kadha nǎ.” 38 Ro, Yesu pongʉeri kpa dho: “Ni nzá chu ni nzǐ ná fø lo ri. Ni ká ka ni jø ma jø ná kopo tso ngbà, inga ni ba ma ba ná batiso ngbà?” 39 Kpa ngʉngʉe logoti: “Ngbao.” Føro ke pongʉeri kpa dho: “Ma jø ná kopo tso ni si jøjø ndirigoti ma ba ná batiso ni si baba. 40 Ro, madzá thá djó ro inga madzá gru djó ro le di ná føri i nzá ma ka ma bbʉ ni dho ri. Ro, føri kʉ fø nga le kpe dho ná kpa dhó nga.”

41 Føro 10 kʉ ná nja kpa rrngʉe fø lo ro, kpa lu Yakobo ma, Yohani ma na dhi lo kangʉeni ka. 42 Yesu nzingʉe kpa ndi dhi ngana ndirigoti ke pongʉeri: “Ni churi chu nari kʉ ndrŭ tsɨ djo pinyo nari bbai njani ná ndrŭ* adi pinyo ndrŭ djo ndirigoti ndrŭ dhó bbobbonga adi ndrŭ cho ndrŭ njí ndima ji ná lo. 43 Ni kana nzá ringani ri é fø ri, ro ddikpa ke jiri ndi é bbo kʉ ná ke ni kana ró, fø ke dho ringani ndi é nidhó njí dhi ke. 44 Ndirigoti ddikpa ke jiri ndi é ya kwanza ni kana ró, fø ke dho ringani ndi é ndrŭ krʉ dhó nokpa. 45 Dhonalo ndrŭ Ddù nganga ma nzá ddi singʉe ndrŭ i njinjí ndi dho d’e ri, ro ndi i njinjí ndrŭ dho ndirigoti ndi bbʉ ndidzá shinga* le ødha dhi be, bí kʉ ná ndrŭ djotsina d’e.”

46 Føri goti kpa singʉe Yeriko na. Yesu ma, ndi unakpa ma, birobiro kʉ ná bí pli kʉ ná ndrŭ ma na ngʉ vʉ Yeriko nǎ ro ná saa na, nga ngʉ adi kó ndrŭ tso ndirigoti nzɨ nyǒ ngʉ adi nganja ná ke Bartimayo (Timayo ddù) ngʉe chu tso ró ndi di ro. 47 Ke rrngʉeri føri kʉ Nazareti nǎ Yesu da ri ná saa na, ke ngangʉe ɨ ndi ndi nanga jø nari tso: “Yesu, Daudi Ddù, abe zø ma djo!” 48 Bí kʉ ná ndrŭ ngʉ tá ke djó ndiro ke go ddi d’e, ro føro i ke gʉ ngʉ ndi nanga jø bbo pli ɨ ndi ripo ro: “Daudi ddù, abe zø ma djo!” 49 Føro Yesu tøngʉeni ro, ke pongʉeri: “Anipori ke si.” Føri dho, ndrŭ nzingʉe nzɨ nyǒ ngʉ nganja ná fø ke ɨ ndima ripo ro: “Nzɨ nji do! Adani, ke ni nzi ró.” 50 Ke bungʉe ndi chutɨ arugu rù, ke dangʉeni tse ndi kó djo ndirigoti ke rangʉe Yesu dhi ngana. 51 Yesu dhungʉeri ke tso: “Ni ká jiri ma njí addu ni dho?” Nga nyǒ kʉ ná fø ke pongʉeri: “Raboni,* aliri ma njanga ki vi.” 52 Føri goti Yesu pongʉeri ke dho: “Arara. Nidzá udha gø ni gø ró.” Føro thei ke njangʉe nga ki vi ndirigoti ke ngangʉe Yesu una ndi ra chu lu nari tso.