Luka
22 Nga nǎ thì kʉ ná mukati dhi fete, Pasaka le ngʉ adi ndi nzǐ ro, singʉe chøchø b’lo. 2 Bbakuhani djó bbobbonga ma, nga ndi ná kpa ma na ngʉ ke ndima ka ndima hwi lu ná bblo kʉ ná chu ne, dhonalo kpa ngʉ ndrŭ do nji. 3 Føro Shetani tsungʉe Yuda na, føri ngʉe Iskariote le ngʉ nzǐ ná ke, ke ngʉe 12 kʉ ná kpa kana ddi ke. 4 Ke rangʉe loti bbakuhani djó bbobbonga ma, hekalu nǎ bbakapiteni ma na na, ngbaribbai ma ndi ka ndi dzí ke nanga nari djo. 5 Fø lo thongʉe kpa nyǒ bbo ndirigoti kpa pongʉeri ndima mbøkpa bbʉ ke dho. 6 Ke ungʉe føri tso u; ndirigoti fønga djó ro ke ngangʉe ke nanga ndi ka ndi dzí nga birobiro kʉ ná ndrŭ kʉ ná saa na lu ná bblo kʉ ná chu nedha tso.
7 Nga nǎ thì kʉ ná mukati dhi ddo singʉe b’lo, føri ngʉe Pasaka dhi bbʉdha ringangʉeni le bbʉ ná ddo. 8 Føri dho, Yesu chongʉe Petro ma, Yohani na ndirigoti ke pongʉeri kpa dho: “Anira nja ni thɨ Pasaka ko nyó d’e.” 9 Kpa dhungʉeri ke tso: “Ni ká jiri ko rá ri thɨ ngbaga?” 10 Ke pongʉeri kpa dho: “Anira vile na ndirigoti ni si nju dda dhi no d’u ndi djó ná ke na. Anira ke ulu kpø ke tsu na ná dza na. 11 Anipori fø dza ba dho, ‘Mwalimu dhuri ɨ: “Ma unakpa ma na ko ka ko nyó nǎ Pasaka ná dza ká kʉ ngbaga?”’ 12 Føro fø ke si bbo nanga kʉ ná chumba dho ni dho etaje djo, bblo le kpe krʉ kʉ ná ritsi ndi nǎ ro. Anithɨ Pasaka føga.” 13 Føro kpa ra ro, kpa singʉe krʉ kʉ ná ritsi ro ke d’rae ndima dho nari nganga bbai, ndirigoti kpa thɨngʉe Pasaka.
14 Føri dho, saa ka ro Yesu ma, cho le cho ná kpa ma na dingʉe mesa tso ro. 15 Føri goti ke pongʉeri kpa dho: “Ma e ù na bbo, ko nyó i Pasaka ddironga ni na, nza ma nzani nari njí, 16 dhonalo ma ripo ni dho, ma nzɨ ri ki ro nyo kpø ri tso si d’yani Mungu dhó Pidhinga nǎ ná nga djo ri.” 17 Yesu dzingʉe divai dhi kopo nari goti ke pongʉe mbai Mungu dho, ná føri goti ke pongʉeri: “Aniko ri ndirigoti anitse ri nanga ni kalu, 18 dhonalo ma ripo ni dho, njʉnga djó ro nzɨ ma i divai ki ro jø, kpø Mungu dhó Pidhinga si ná nga djo ri.”
19 Ke dzingʉe mukati, ke pongʉe mbai Mungu dho nari goti, ke d’rɨngʉe ri nanga ndirigoti ke bbʉngʉe ri kpa dhona ɨ ndi ripo ro: “I ri na mana kʉ ma ndí, ni djotsina ndi si bbʉni ro. Anidi rinji fø ni nó na ma nga d’e.” 20 Godhé, b’lo ndima nyo ngasdjó nga dhi nyo nari goti, ke njingʉeri divai dhi kopo na ma fø ddi, ɨ ndi ripo ro: “I divai na mana kʉ ‘wø koddo,’ madzá ju ró ndi d’yʉ ndi ro, ni djotsina ndi si d’røni ro.
21 Ro, aninjari, ma nanga si dzì ná ke na ko kʉ i mesa djó. 22 Dhonalo, bbʉbbʉ dhé ndrŭ Ddù rara ndi dho, ri ndingʉeni nari bbai. Ro, njedha ndrŭ Ddù nanga si dzi ná ke dho!” 23 Føri dho, kpa ngangʉe ie i ká si fø lo nji nari dhudha tso ndima kana.
24 Føro gʉ tangʉe kpa kana bbo pli, ndima kana ie i ká kʉ bbo nari djó. 25 Ro, ke pongʉeri kpa dho: “Ndrŭ tsɨ dhó pikpa adi pinyo ndrŭ djo ndirigoti bbobbonga na kʉ ndrŭ djo ná kpa ndrŭ adi nzǐ bblolo nji ná Kpa. 26 Ro, Ni dho nzá ringani ni njiri fø ri. Føri rɨngana, ni kana bbo pli kʉ ná ke dho ringani ndi é sese pli kʉ ná ke bbai ndirigoti chutso ddá ni kana ná ke dho ringani ndi é njí dhi ke bbai. 27 Nganyo ná ke ma kana njí nji ná ke na, ie i ká e bbo? Ri ká nga kʉ nganyo ná ke ri? Ro, ma i kʉ ni kana njí nji ná ke bbai.
28 “Nì mai ri kʉ fø ro, ni chieni ma na madzá mbudha krʉ kana; 29 ndirigoti ma koddo nji ni na Pidhinga dho, ddiddi madzá Baba nji koddo ma na nari bbai, 30 ndiro ni si nga ma nyo, nga ma jø madzá mesa djó, madzá Pidhinga nǎ ddironga ma na ndirigoti ni si di pi dhi kiti djo ndiro ni d’ilo Israeli nǎ 12 kʉ ná bbu djo d’e.
31 “Simoni, Simoni, arr di! Shetani rinzi ndi njí ngano ró d’ø ndima tu d’e ndrŭ adi nji ná lo ni krʉ ró. 32 Ro, ma nji ddo nǎ le ddoni ná sala nidhi lo dho ndiro nzɨ nidhó udha djø ró; ndirigoti ni djoi dhi ngana ni ngʉ ró thei, ali kpa kpakpa.” 33 Føro Petro ngʉngʉe logoti: “Bboke ma kʉ tayari ko rá ddinga ni na prizo na inga ko dhedhe ma che ni na.” 34 Ro, ke pongʉeri: “Petro, ma ripo ni dho, njʉ økpa ngoni nari njí, ni si ma gʉ gbo ina.”
35 Føri goti ke dhungʉeri ki kpa tso: “Nga dhó mbø dhi kpʉ ma, nyo dhi kpʉ ma, ss ma na ro ma chongʉe ni ro, ká ni ro rɨngʉe ddikpa ritsi ró maddi?” Kpa ngʉngʉe logoti: “Nzá.” 36 Føro ke pongʉeri: “Ro kpadjo, nì dhó mbø dhi kpʉ kʉ ná ke dzi ri dzi ndirigoti nì dhó nyo dhi kpʉ kʉ ná ke maddi njiri fø, ro nga dhó sà kʉ ná ke dzí ndi ró arugu rù nanga ndiro ndi dzí sà ndi dho d’e. 37 Dhonalo ma ripo ni dho, ndi ndini ma djo ná i lo dho ringani ndi njini njí, ‘Ke le zøngʉe nzɨ ngarr yadha dho ná ndrŭ kana.’ Dhonalo ma djo ndini ná fø lo kʉ nji ndi njini ro.” 38 Føro kpa pongʉeri: “Bboke, anja! kodhó sà kʉ aro ena.” Føro ke pongʉeri: “Føri kaka.”
39 Føga ro ke ra ro, ke rangʉe nì ndi ngʉ adi rinji nari bbai Mizeituni dhi ngøtsɨ djo ndirigoti ke unakpa ngʉe ke una. 40 Følu kpa si ro, ke pongʉeri kpa dho: “Anira anzi sala ni nji nari na ndiro nzɨ ni tsu mbudha na ró.” 41 Ke bbangʉe kpa føga ndirigoti ke rangʉe kpa kuso ro dju le bu ró, ri ka ndi rá d’e ná ngatsi. Ke kongʉeni ndi d’eti djo ndirigoti ke ngangʉe sala njidha tso. 42 Ke nzingʉeri ɨ: “Baba, njati rie ngbà ri ka ndi ka ri ró, atu i kopo da ma ró ro. Ro, abbari ni ji ná lo njini, ro nga ma ji ná lo ri.” 43 Føro ra nǎ ro si ná ddikpa malaika dhongʉe ndi ke dho ndirigoti ke lingʉe ke kpakpa. 44 Ke nanga ri ngʉ d’o bbo nari dho, ke ngʉ ra anzi bbo pli ndi nganzi nari na. Ke ró dyo ngʉngʉe ju bbai nari ngʉ d’e dz’ djo. 45 B’lo ndi nji sala nari goti, ke dani ro, ke ngʉngʉe ndi unakpa dhi ngana ro, ke singʉe kpa ro ddo kpa ddo ro, si njedha si ndima thí ronga djolu ro. 46 Ke pongʉeri kpa ni: “Ni ká ddo addudho? Anidani ndirigoti anira anzi nga ni nzi nari na ndiro nzɨ ni tsu mbudha na ró.”
47 Go, ke ngʉ loti ro, anja! birobiro kʉ ná ndrŭ singʉe ndirigoti ke una 12 kʉ ná kpa kana ddi ke, Yuda i ngʉ chutso ddá fø ndrŭ dho. Ke singʉe Yesu kuso ro, ke mbʉngʉe Yesu. 48 Ro, Yesu pongʉeri ke ni: “Yuda, ni ká ndrŭ Ddù nanga dzi mbʉ ni ke mbʉ nari chulu?” 49 Yesu kuso lu ngʉe ná kpa njangʉe nji ngʉ ji ndi njini ná lo ro, kpa pongʉeri: “Bboke, ri ká ngani ko hwini kpa tso ró sà na?” 50 Føro, kpa kana ddi ke krrngʉe bbò kuhani dhó njí dhi ke bɨ thá djó ri. 51 Ro, Yesu ngʉngʉe logoti: “Nzɨ ni njiri fø.” Føro Yesu løngʉe ke bɨ ronga ndirigoti ke gøngʉe ke gø. 52 Føri goti Yesu pongʉeri ndi lødha dho singʉe ná bbakuhani djó bbobbonga ma, hekalu nǎ bbobbokpa ma, ngó kpa ma na dho: “Ni ká nyani nidhó sà ma, tsú ma na na gbʉ dhi ke ni ra lø nari bbai? 53 Ni ma na ko ngʉe krʉ ddo ró, hekalu nǎ, ro nzá ni lingʉe ni thó ro ma djo ri. Ro, i ri kʉ nidhó saa ndirigoti tɨtɨnga nǎ kʉ ná kpa dhó bbonga dhó saa.”
54 Yesu løngʉe ná kpa rangʉe ke na bbò kuhani bba; ro, Petro ngʉ ra Yesu una dadá. 55 Kpa vʉngʉe kazz bbaidjónga dzá katikati na ndirigoti kpa njungʉe ndima tso føga. Føro Petro maddi dingʉe kpa kana. 56 Ro, njí dhi ddikpa singba ngba njangʉe ke kazz ku djó kazz ke dhǒ ro. Ngba njangʉe ke chøø ro, ngba pongʉeri: “I ke ma ngʉe ddi fø ke una.” 57 Ro, ke gʉngʉe fø lo ɨ ndi ripo ro: “I isɨle, ma nzá chu fø ke ri.” 58 Sese saa ro da nari goti, nja d’i ke njangʉe ke ki ndirigoti ke pongʉeri: “Ni maddi kʉ fø kpa kana ddi ke.” Ro, Petro pongʉeri: “I ke, ma nga kʉ fø kpa ro ri.” 59 Chøchø saa ddi da nari goti nja d’i ke ngangʉe ɨ ndi ripo kpakpanga na nari tso: “Bbʉbbʉ dhé, i ke ma ngʉe ddi fø ke una, dhonalo ke kʉ Galilea nǎ ke.” 60 Ro, Petro ngʉngʉe logoti: “I ke, ma nzá chu addu ma ni po nari ri.” Go ke ngʉ loti ro, økpa ngongʉeni thei. 61 Føri goti Bboke lengʉe ndi thí ro, ke njangʉe Petro chøø; føro Petro nongʉe Yesu pongʉe ndi dho ná i lo nga: “Økpa ngoni njʉ nari njí ni si ma gʉ gbo ina.” 62 Føro ke rangʉe arugu ro, ke dzzngʉe che sani.
63 Føri goti Yesu løngʉe ná kpa ngangʉe ke gbodha tso ndirigoti ke njidha tso. 64 B’lo ndima tsi ke nyǒ djó nga tso nari goti kpa ngʉ ridhu ɨ ke tso: “Ad’ra unabi! Ni ká ie b’ɨ?” 65 Føri goti kpa ngʉ dhú dhi bí kʉ ná nja lo kpari po ke ni.
66 Bbʉtsonga si ro, ndrŭ dhó ngó kpa njungʉe ndima tso, ddironga bbakuhani djó bbobbonga ma, nga ndi ná kpa ma na ndirigoti kpa mbangʉe ke ndima dhó Sanhendrini dhi dza na ndirigoti kpa pongʉeri: 67 “Rie Kristo ni kʉ ri ró, ad’rari d’ra ko dho.” Ro, ke pongʉeri: “Ri ma d’rad’ra ma ni dho ró, ni nzɨ dhé ri ro uri. 68 Føri kina ma dhunga ni tso ró, ni nzɨ ri goti ro ngʉ ri. 69 Ro, kpadjonga djó ro ni si kʉ ndrŭ Ddù nja, Mungu thó kpakpanga dhi thá djó ri laidjó ndi di ro.” 70 Føro kpa krʉ dhungʉeri ke tso: “Føri na mana ká kʉ ni kʉ Mungu Ddù?” Ke ngʉngʉe logoti: “Ni nganga i ripo ma kʉ ke.” 71 Føro kpa pongʉeri: “Ko ká ka ko ne nja lo ki ke djo addu dzá lo dho? Dhonalo ko rr ri ke nganga tso nǎ ro.”