ETERNET djó kʉ ná Watchtower LIBRARY
Dzamu dhi Munara
ETERNET DJÓ KɄ NÁ LIBRARY
Baledha
  • BIBLIA
  • VICHAPO
  • NJUDHA
  • Matayo 27
  • Bibilia (Matayo-Ufunuo)

I sehema nǎ, tayari kʉ ná video ro nga

Dzodzo dhé, video ni telesharje ro ddikpa kosa banga.

Matayo nǎ lo

      • Yesu kpa bbʉ Pilato dhona (1, 2)

      • Yuda sʉ ndi nari (3-10)

      • Yesu kʉ Pilato njí (11-26)

      • Bbasøddá ke gbo nari (27-31)

      • Yesu le tɨ tsú badjó Golgota le nzi ná ngana (32-44)

      • Yesu dzá dhe (45-56)

      • Yesu le d’ø nari (57-61)

      • Kabuli ronga bbasøddá b’o nari (62-66)

Matayo 27:10

Agʉro le tu nanga nalo

  • *

    Anja Nyongeza A5.

Matayo 27:29

Agʉro le tu nanga nalo

  • *

    Inga “couronne; taji.”

Matayo 27:32

Agʉro le tu nanga nalo

  • *

    Anja Lo nanga le tu nari.

Matayo 27:40

Agʉro le tu nanga nalo

  • *

    Anja Lo nanga le tu nari.

Matayo 27:42

Agʉro le tu nanga nalo

  • *

    Anja Lo nanga le tu nari.

Matayo 27:45

Agʉro le tu nanga nalo

  • *

    Føri kʉ, dyina saa sita.

Matayo 27:50

Agʉro le tu nanga nalo

  • *

    Inga “ke dhengʉe.”

Matayo 27:52

Agʉro le tu nanga nalo

  • *

    Inga “nì nga noni ná kabuli.”

Matayo 27:59

Agʉro le tu nanga nalo

  • *

    Inga “kitani dhi rù.”

Matayo 27:60

Agʉro le tu nanga nalo

  • *

    Inga “nì nga noni ná kabuli.”

  • *

    Inga “nì nga noni ná kabuli.”

  • Bibilia (Matayo-Ufunuo)
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 31
  • 32
  • 33
  • 34
  • 35
  • 36
  • 37
  • 38
  • 39
  • 40
  • 41
  • 42
  • 43
  • 44
  • 45
  • 46
  • 47
  • 48
  • 49
  • 50
  • 51
  • 52
  • 53
  • 54
  • 55
  • 56
  • 57
  • 58
  • 59
  • 60
  • 61
  • 62
  • 63
  • 64
  • 65
  • 66
Bibilia (Matayo-Ufunuo)
Matayo 27:1-66

Matayo

27 Bbʉtsonga si ro bbakuhani djó bbobbonga krʉ ma, ndrŭ dhó ngó kpa ma na gbangʉe ndima tso ndiro ndima ba Yesu ndima ka ndima hwi ná chu d’e. 2 B’lo ndima chɨ ke nari goti, kpa mbangʉe ke guverner Pilato bba.

3 Føro Yesu nanga dzingʉe ná ke Yuda njangʉe Yesu djó le d’ilo nari ro, ke nanga ri d’ongʉe bbo ndirigoti ke ngʉngʉe 30 kʉ ná fø mbøkpa bbakuhani djó bbobbonga ma, ngó kpa ma na dhona. 4 Ke pongʉeri: “Ma nji chenga, nga nǎ kosa ro kʉ ná ke nanga ma dzi nari na.” Kpa ngʉngʉe logoti: “Føri nzá nja ko ri. Føri kʉ nidhó lo!” 5 Føro, ke bungʉe fø mbøkpa nanga hekalu na ndirigoti ke rangʉe ndi sʉsʉ. 6 Ro, bbakuhani djó bbobbonga søngʉe fø mbø ndirigoti kpa pongʉeri: “Ri tso nzá uni le li fø mbø takatifu mali kana ri dhonalo ri kʉ ju nanga le dzi na ná mbø.” 7 B’lo kpa ne lonanga ndima kana nari goti kpa dzingʉe cha rø ná ke bbá nza fø mbø na, ndi ngana le di d’i ngø nǎ ro si ná ndrŭ d’ø d’e. 8 Føri dho, kpø njʉnga djo le adi fø nza nzi Ju dhi Nza. 9 Føri chulu nabi Yeremia pongʉe ná i lo njingʉeni: “Kpa søngʉe 30 kʉ ná fø mbøkpa, føri ngʉe ndrŭ nanga dzidha dho le lingʉe ná mbø, Israeli ddui kana nja kpa d’ingʉe ke ró dzi føbø, 10 ndirigoti kpa bbʉngʉe ri ndiri na le dzi cha rø ná ke dhó nza, ddiddi Yova* jangʉeri ma dho nari bbai.”

11 Fø saa na Yesu ngʉ tøni guverner njí. Ro, guverner dhungʉeri ke tso: “Ni i ká kʉ Wayaudi bbá pi?” Yesu ngʉngʉe logoti: “Ni nganga i ripo fø.” 12 Ro, bbakuhani djó bbobbonga ma, ngó kpa ma na ngʉ Yesu bbø ro, ke nzá ngʉngʉe kpadhó logoti ro ri. 13 Føro Pilato pongʉeri: “Ni ká ni djo kpa d’ra ná fø lo krʉ rr nzɨ?” 14 Føro ma nzá dhé ke ngʉngʉe logoti ro ri, ddikpa ma nzá ddi, ná fø lo kengʉe guverner nanga bbo.

15 Fete dyina guvener ngʉ adi prizo nǎ le sʉe ná ndrŭ kana ro ddikpa ke kló, ri ngʉe birobiro kʉ ná ndrŭ vʉ ná ke. 16 Fø saa na le sʉngʉe bbo chungʉeni chelo njidha dho ná ddikpa ke prizo nǎ, ná føri ngʉe Baraba. 17 B’lo birobiro kʉ ná ndrŭ gba ndima tso nari goti, Pilato dhungʉeri ndrŭ tso: “Ni ká jiri ma kló ie, Baraba inga Yesu, Kristo le nzi ná ke?” 18 Bbʉbbʉ dhé, Pilato chungʉeri chu kpa bbø Yesu dda dzá lo dho. 19 Føri kina, lod’idha dho ke dingʉe ná saa na, kebbá le chongʉe ddikpa ke Pilato dhi ngana ndi rá ripo ɨ: “Abba chølo dhi fø ke nidhó ro, dhonalo fø ke djotsina che bbo sani ná nyo nyo ma njʉ ró.” 20 Ro, bbakuhani djó bbobbonga ma, ngó kpa ma na lingʉeri ndrŭ pori le kló Baraba, ro Yesu i le hwihwi. 21 Føro, guverner dhungʉeri ki: “Aro kʉ ná fø kpa kana ro ká ni jiri ma kló ie ni dho?” Føro, ndrŭ ngʉngʉe logoti: “Baraba.” 22 Pilato pongʉeri: “Nde, Yesu, Kristo le nzi ná i ke dhó lo ká ma nji ngbǎ?” Ndrŭ krʉ ngʉngʉe logoti: “Le tɨ ke tsú badjo!” 23 Pilato dhungʉeri: “Addudho? Ke ká nji ngbá kosa?” Ro, ndrŭ ngʉ hø ndima chu bbobbo ri na: “Le tɨ ke tsú badjo!”

24 Ke njangʉeri ndi ndi nzá pá ndirigoti ndrŭ ka ndima ngae fudjo tso ma krʉ ddi nari dho, ke dzingʉe dda ndirigoti ke ʉngʉe ndi thó birobiro kʉ ná ndrŭ nyǒ njí ɨ ndi ripo ro: “Ma djó nga kʉ fø ke dzá ju ro ri, ro ri kʉ ni djó dhé.” 25 Føro, krʉ ndrŭ ngʉngʉe logoti ɨ: “Abbari fø ke dzá ju tso ngʉ ko ma, kodhi nzø ma na djo.” 26 Føri dho, ke klongʉe Baraba kpa dho, ro ke pongʉeri le dhɨ Yesu fimbo na ndirigoti ke bbʉngʉe ke le tɨ tsú badjo d’e.

27 Føri goti, guverner dhó bbasødda mbangʉe ke guverner bba ndirigoti kpa gbangʉe bbasødda tso krʉ, ná kpa d’engʉe ke ronga tso gbrŭ. 28 Kpa klongʉe ke ró rù ndirigoti kpa thongʉe pli dzá kakanga kʉ ná rù ke ro. 29 Føri goti kpa d’yangʉe kpelé dhi klo,* kpa thongʉe ri ke djǒ ro ndirigoti kpa bbʉngʉe wɨ ke lø ndi thó thá djó ri na. Føri goti kpa ngʉ koni ke nji ndima d’eti djo ɨ ndima ke gbo ro: “Yambø, Wayaudi bbá Pi!” 30 Kpa hwingʉe sadda ke djo ndirigoti kpa dzingʉe fø wɨ, ná ri na kpa ngʉ ke djǒ nanga dhɨ. 31 Mwisho, b’lo ndima gbo ke nari goti, kpa klongʉe fø rù ke ró ro ndirigoti kpa ngʉngʉe ke ró rù nganga ke ro. Føri goti kpa rangʉe ke na ndima rá ke tɨ tsú badjo d’e.

32 Føga ro kpa tuni ro, kpa njungʉe Kirene nǎ Simoni ró dho kʉ ná ke na. Ro, kpa lengʉe ke tso ndiro ke d’u Yesu dhó nzadha dhi tsú* d’e. 33 Føro kpa singʉe Golgota le ngʉ nzi ná ngana, føri na mana kʉ, Le djǒ nǎ kpà dhi nga. Føga kpa si ro, 34 kpa bbʉngʉe divai ma tso le gba dyadya o ná ritsi na nari ke jø, ro ri dzi ke mbu nari goti ke nyingʉe ri nyi. 35 B’lo ndima tɨ ke tsú badjo nari goti kpa kangʉe ke ró arugu rù nanga dyá djó, nja ndima ndó ri nanga d’e. 36 Føri goti kpa dingʉe føga ke ronga b’odha dho. 37 Føri kina, kpa lingʉe ke le bbø na ná ɨ lo ke djǒ tso ro: “Ɨ ri kʉ Yesu, Wayaudi bbá Pi.”

38 Føri goti aro kʉ ná gbʉ dhi kpa le tɨngʉe tsú badjó ke kuso lu, ddi ke thá djó ro ndirigoti ddi ke gru djó ro. 39 Føro chu lu da ná ndrŭ ngʉ che kʉ ná loti ke dhi ngana ndima djǒ nanga ndima ja ro. 40 Ndirigoti ndrŭ ngʉ ripo: “Ni ngʉ ji ni glʉ hekalu ndirigoti ni chi ri gbo cha ddo kana ró, ave ni gø ni niro! Njati ni é bbʉbbʉ Mungu dhi dduna ró, athʉni nzadha dhi tsú* badjó ro!” 41 Bbakuhani djó bbobbonga ma, nga ndi ná kpa ma, ngó kpa ma na maddi ngangʉe ke gbodha tso ɨ ndima ripo ro: 42 “Nja ndrŭ i ke gø ngbà, ro ndi nganga ndi gø nari i gʉ ke tsori gʉ. Ke kʉ Israeli bbá pi, anibbari ke thʉni nzadha dhi fø tsú* badjó ro di, ndiro ko ke uu ró! 43 Ke lie ndi thí Mungu djó, ró kpadjo Mungu ve ke gø, rie ngbà Mungu ji ke ri ró. Dhonalo ke ngʉ ripo: ‘Ma kʉ Mungu Ddù.’” 44 Ke kuso ro ngʉe tsú badjó ná gbʉ dhi kpa maddi ngʉ chelo ti ke djo føri bbai.

45 Saa aza* djó ro nga tɨngʉe mbi kpø saa tisa djo, fø ngø lu gble. 46 Chøchø saa tisa si ro, Yesu høngʉe bbò ndi chu na ɨ: “Eli, Eli, lama sabaktani?” føri na mana kʉ “Madzá Mungu, madzá Mungu ni ká bba ma addudho?” 47 Fø lo ndima rr ro, føga ngʉ tøni ná kpa ngangʉe ɨ ndima ripo nari tso: “I ke Eliya nzǐ.” 48 Føro thei, kpa kana ddikpa ke d’angʉe eponje dzi, ke tɨngʉe ri ngóngó o ná divai na, ndirigoti ke chingʉe ri wɨ djǒ ro, føri goti ke bbʉngʉe ri Yesu ndø d’e. 49 Kpa kana nja kpa ngʉ ripo: “Abba ke! Anibba ko nja Eliya ká si ke gø nì ma nari.” 50 Føro Yesu ki høngʉe bbobbo ndi chu na nari goti ke thí d’engʉe* thei.

51 Ndirigoti Anja! takatifu kʉ ná nga nǎ rido nanga thangʉeni aro, arø ro agʉ ndirigoti dz’ jangʉe ja, føri goti bbobbo dju nanga thangʉeni tha. 52 Ndirigoti kabuli* kpari tso klongʉeni, føro che chengʉeni ná takatifu kʉ ná bí kʉ ná ndrŭ dhi bʉ vʉngʉe bbaidjo. 53 (Yesu dhe nari goti ngʉngʉe kabuli djó ro ná ndrŭ singʉe tsu takatifu bba gʉ) ndirigoti bí kʉ ná ndrŭ njangʉe fø bʉ nja. 54 Sødda djó bbonga ma, Yesu ronga ngʉ b’o ná nja kpa ma na njangʉe rɨ da nari ma, nji ngʉ njini ná lo ma na ro, kpa pongʉeri: “Bbʉbbʉ dhé, i ri e Mungu Ddù.”

55 Føga ngʉe bí kʉ ná isɨ ndrŭ, danga nǎ ro ndima ngʉ nganja ro; fø ndrŭ mbangʉe Yesu goti Galilea nǎ ro ke tsotsokodha dho. 56 Fø ndrŭ kana ngʉe Maria Magdalene ma, Yakobo ndirigoti Yose ma na dhi mama Maria ma, Zebedayo ddui dhi mama ma na.

57 B’lo ngasdjó nga si ro, Arimatia nǎ mali dhi ddikpa ke singʉe. Fø ke ró dho ngʉe Yosefu ndirigoti ke nganga maddi ngʉe Yesu unake. 58 Fø ke singʉe Pilato dhi ngana ndirigoti ke kongʉe Yesu dzá bʉ. Føro Pilato ungʉe ri tso u le bbʉ bʉ ke dhona. 59 Yosefu dzingʉe Yesu dzá bʉ ndirigoti ke ndɨngʉe ri ronga tso bbo dhó valer kʉ ná rù* na. 60 Ndirigoti ke rangʉe ri li dju nǎ ndi bbɨngʉe ná wø kʉ ná kabuli* na. Føri goti ke dzengʉe bbò dju kabuli* tsoro nari goti ke rangʉe ra. 61 Ro, Maria Magdalene ma, nja d’i Maria ma na dingʉe føga kabuli tso ro.

62 Bbʉdyi, føri kʉ matayarisho kpa nji ná nga dzá bbʉdyi, bbakuhani djó bbobbonga ma, Bbafarisayo ma na njungʉe ndima tso Pilato nji. 63 Kpa pongʉeri ɨ: “Bboke, ko nonga nari kʉ, go fø kali ba ngʉe shi ro, ke pongʉeri, ‘Ddo gbo djó ma si gaga.’ 64 Føri dho, ajari le b’o kabuli ronga kpø gbo cha ddo djo, nzɨ ke unakpa si kedzá bʉ d’ù ndirigoti ndima pori ndrŭ dho, ‘Ke gaga!’ ró. Le njiri fø nzá ró, fø kali gʉ si dada anziro e ná kali djolu. 65 Pilato ngʉngʉe logoti kpa dho: “Ri ronga b’o ná bbasødda kʉ nì. Anira ndirigoti ni kpe lo ni nja nari bbai.” 66 Kpa rangʉe ro, kpa b’langʉe ritso kpá dju na ndirigoti kpa lingʉe kabuli ronga b’o ná kpa.

Bbaledha nǎ Vichapo (2015-2025)
Avʉvʉ
Atsu
  • Baledha
  • Ando ri
  • Ji le ji nari
  • Copyright © 2025 Watch Tower Bible and Tract Society of Pennsylvania
  • Njí le nji na nalo
  • Ruruni nalo ronga le b'o nari
  • Paramètres de confidentialité
  • JW.ORG
  • Atsu
Ando ri