Matayo
3 Fø saa na, Yohani Mubatizaji singʉe lod’ra Yudea nǎ ngødja na, 2 ke ngʉ ripo: “Anileni, dhonalo ra nǎ Pidhinga si ná ddo kʉ chøchø.” 3 Ri kʉ ke djo i nabi Isaya tingʉelo ɨ ndi ngʉ ripo ro ri: “Ddikpa ke ngajø ngødja nǎ ro: ‘Anithɨ Yova* dzá chu nanga! Aniliri ri é mbrø.’” 4 Yohani ró ngʉe ngamia dhi zǎ ró ká na le thɨ ná rù, ke b’ʉso ngʉe zǎ ró kødha na le thɨ ná setir. Kedhó nyo ngʉe karu ma, tiidda ma na. 5 Yerusalemu nǎ ndrŭ ma, Yudea nǎ ndrŭ krʉ ma, Yordani dhi dda tso ro lu kʉ ná ngø lu ndrŭ krʉ ma na ngʉ si ke dhi ngana. 6 Ndrŭ ngʉ ndima dhó chenga d’ra pʉlʉpʉlʉ ndirigoti ke ngʉ batiso* bbʉ fø ndrŭ dho Yordani dhi Dda nǎ.
7 Ke njangʉe bí kʉ ná Bbafarisayo ma, Bbasadukayo ma na si batiso ba nari ro, ke pongʉeri kpa dho: “Ni idhalolo dhi su nǎ gø, ni dho ká ie jari ni nyi gosi si ná thø? 8 Anidho ni leni ngbà nari nidhó nyi chulu. 9 Nzɨ ni di ripo ɨ pá: ‘Kodhi baba kʉ Abrahamu,’ dhonalo ma ripo ni dho, Mungu ka ndi pʉ nzø Abrahamu dho i dju nǎ ro maddi. 10 Lǒ* le li b’lo tsú tɨtɨ ró, nzɨ bblo tsu-kpa ó ná tsú le si krrkrr ndirigoti le si ri bu kazz na. 11 Ma batiso bbʉ ni dho dda na ni leni le nari dho, ro ma goti si ná ke kʉ kpakpa ma djolu, ma ro nzá ka ke kó ró ss klodha dho maddi ri. Ke si batiso bbʉ ni dho roho takatifu ma, kazz ma na na. 12 Nyo-kpa ronga le adi lě na ná ritsi kʉ ke thó thi, ke si nyo-kpa ronga ndi adi lě nanga tsù vii ndirigoti ke si ngano li depo na, ro nyo d’ø ke si bɨ nzá ro ka ndi dhéni ná kazz na.”
13 Føri goti, Yesu singʉe Galilea nǎ ro Yordani dhi dda djo Yohani dhi ngana, ndiro ke bbʉ batiso ndi dho d’e. 14 Ro, Yohani mbungʉeri ndi cho ke tso cho, ɨ ndi pori nari na: “Ringaeni ni i bbʉ batiso ma dho, ro ni ká ngʉ si ma dhi ngana ngbaribbai?” 15 Føro Yesu ngʉngʉe kedhó logoti: “Abba ri njini fø kpadjo kpali, dhonalo ri kʉ føri bbai i ko ka ko njí chø kʉ ná lo ri.” Føro Yohani bbangʉe ke tso ndi cho nari tso bba. 16 Batiso ndi ba nari goti Yesu vʉngʉe dda nǎ ro thei; ndirigoti anja! Ra pʉngʉe ndi tso ndirigoti ke njangʉe Mungu dzá roho bbǎna ró ji na ndi thʉ ndi djo ro. 17 Føro anja! Ddikpa lechu singʉe ra nǎ ro, ɨ ndi ripo ro: “I ri kʉ madhi Dduna bbo ma ji ná ke, u ma u ndi tso ro.”