Marko
5 Føri goti kpa singʉe jʉdda dzá cha dzɨ nga laidjo, Bbageraseni bbá eneo na. 2 Bbú nǎ ro Yesu thʉni nari goti thei ddikpa ke mongʉe Yesu kabuli* kana ro, fø ke nǎ ngʉe gó. 3 Ke ngʉ adi di kabuli kalu ndirigoti ddikpa le ma nzá ddi ka ndi chie ke ro ri, tseretsere* nganga na ma nzá ddi. 4 Bí ina le ngʉ adi ke kó ma, ke thó ma na chi tseretsere* na, ná føri nanga ke ngʉ adi d’id’i ndirigoti ke jotso ka ndi ko ná le ro nga ngʉe ri. 5 Ndirigoti dyina blii, kuna b’u, ke ngʉ adi ndi nanga jø kabuli kalu ndirigoti ngøtsɨ djolu ndirigoti ke ngʉ adi ndi ndí ró nga thá dju na. 6 Ro, Yesu ke nja danga nǎ ro ro, ke d’angʉe ke dhi ngana ndirigoti ke singʉe koni ndi d’eti djo ke nji. 7 Føri goti ke høngʉe bbò ndi chu na ɨ ndi ripo ro: “Bbo pli ngbeni ná ngana kʉ ná Mungu Ddù, Yesu, ni na ká ri di ko kana ngbǎ? Atsoni Mungu ró dho na ma dho nari kʉ, ni nzɨ ma nza ri.” 8 Dhonalo Yesu ngʉ ripo ri ni ɨ: “Ni gó, avʉ i ke nǎ ro.” 9 Yesu dhungʉeri ke tso ɨ: “Ni ró dho ká kʉ ie?” Føro ke ngʉngʉe logoti: “Ma ró dho kʉ Lejioni dhonalo ko kʉ bí.” 10 Føri goti ke ddongʉeni Yesu ró bí ina ndiro nzɨ Yesu di fø gó d’i ngø na ró.
11 Føga ngʉe ná ngø iso bí kʉ ná djø kpari ngʉ nganyo. 12 Føro gó ddongʉeni ke ró ɨ: “Acho ko afø djø kpari na ndiro ko tsu ri na d’e.’’ 13 Ndirigoti ke ungʉe ritso u. Føro, gó kpari nyangʉeni ke nǎ ro, ri rangʉe meni djø kpari na ndirigoti chøchø 2 000 kʉ ná fø djø kpari mongʉe nga ngø iso ro jʉdda na, ná ngana ri chengʉeni krʉ. 14 Ro, djø ró ngʉ rø ná kpa nyingʉe nga nyi ndirigoti kpa d’rangʉe nji njini ná fø lo krʉ, vile ma, vilaje ma na nǎ ndrŭ dho, ná fø ndrŭ singʉe ndiro ndima nja nji njini ná lo d’e. 15 Yesu dhi ngana ndrŭ si ro, ndrŭ njangʉe gó singʉe nǎ ro ná ke, anziro Lejioni ngʉe ndi nǎ ro. Ke dingʉe gʉna, rù kʉ ndi ró ro ndirigoti kedhó akili ngʉngʉe krʉ, ná føri dho ndrŭ do løngʉe. 16 Føri kina, nja njangʉe fø lo ná ndrŭ ngʉ gó vʉ nǎ ro ná ke ma, djø ma na ró njingʉeni ná fø lo nanga tu si singʉe ná ndrŭ dho. 17 Føro ndrŭ ngangʉe ri nzidha tso Yesu tso ke tuni ndima bbá ngø nǎ ro.
18 Bbú na Yesu ngʉ dji ro, gó vʉngʉe nǎ ro ná ke ngʉ ddoni Yesu ró ke bbari ndima rá ddinga. 19 Ro, ke nzá ungʉe ritso ri, ke pongʉeri: “Angʉ nidhó familia kana ndirigoti ni d’ra Yova* nji ni dho ná lo ma, ngbaribbai ma ke dho zølo ni dho nari ma na.” 20 Fø ke rangʉe ro, ke d’rangʉe fø lo Dekapoli* lu krʉ ndirigoti ri rr ná ndrŭ nanga kengʉeni ke.
21 Dda djolu Yesu da bbú nǎ adzɨ nari goti, birobiro kʉ ná ndrŭ kpari njungʉe ndima tso ke kuso ndirigoti ke ngʉe dda tso ró. 22 Sinagogi nǎ ddikpa bbonga ró dho ngʉe Yairo, ná fø ke njangʉe Yesu ro, ke singʉe Yesu dhi ngana ndirigoti ke kongʉeni ndi d’eti djo ke nji. 23 Ke ddongʉeni Yesu ró bí ina ɨ ndi ripo ro: “Madzá re singba ngba kʉ dhe na bbo* ró, kirikiri asi ni li ni thó ngba djo ndiro ngba gøgø ndirigoti ngba di shi d’e.” 24 Føro Yesu ma rangʉe ke ma na ro, birobiro kʉ ná ndrŭ kpari rangʉe ke ulu ndirigoti ndrŭ ngʉe chøchø bbo ke ro lu.
25 Føga ngʉe ná ddikpa le ró ro ju rangʉe cho 12 kana b’lo. 26 Fø le nzangʉeni bbo bí kʉ ná bbanganga bba lu, le sangʉe ndidhó mbø krʉ, ro le ró dhe ro nzá dhé gøngʉeri, føri rɨngana ri gʉ ngʉngʉe che pli. 27 Yesu djo ndrŭ ngʉ ti ná lo ndi rr ro, le singʉe ke goti lu, le tsungʉe ndrŭ kpari kalu ndirigoti le løngʉe ke ró arugu rù ronga, 28 dhonalo le ngʉ ripo ɨ: “Njati ma lø ke ró arugu rù ronga dhé ró, ma gøgø.” 29 Føro thei le ró ju bbangʉe ra ndi ra nari tso ndirigoti le mbungʉeri ndi ndí na nari kʉ ndi gøgø che bbo kʉ ná fø dhe nǎ ro.
30 Føro thei Yesu d’ingʉe ri utso nari kʉ, ndi ndí nǎ ro ddikpa kpakpanga vʉ ndirigoti ke lengʉe ndi thí birobiro kʉ ná ndrŭ dhi ngana ro, ke dhungʉeri: “Ma ró arugu rù ronga ká ie lø?” 31 Ro, ke unakpa ngʉngʉe logoti: “Ni ndrŭ kpari mbʉ ni ró krʉ ngalu nari njanja, ro i ni ridhu: ‘Ma ronga ká ie lø?’” 32 Ro, ke ngʉ nganja ndi ro lu gbrú ndiro ndi nja fø lo ká ie nji nari d’e. 33 Fø isɨle do ngʉ nji ndirigoti le ronga ngʉ tata, le chungʉe ndi ró njini ná lo chu nari dho. Føro, le singʉe koni Yesu nji ndi d’eti djo ndirigoti le d’rangʉe bbʉbbʉlo krʉ ke dho. 34 Yesu pongʉeri le dho: “Madzá singba ngba, nidzá udha gø ni gø. Ara ngoi na ndirigoti ni gøgø ni ró che bbo kʉ ná fø dhe nǎ ro.”
35 Go ke ngʉ fø lo po ro, nja kʉ ná kpetsi kpa singʉe sinagogi nǎ bbonga bbá ro ndirigoti kpa pongʉeri: “Nidzá singba ngba dhe b’lo ró, ni ká Mwalimu djǒ nanga ngbʉ addudho?” 36 Ro, Yesu rrngʉe kpa po ná fø lo ro, ke pongʉeri sinagogi nǎ bbonga dho: “Nzɨ nji do, adi udha na dhé.” 37 Petro ma, Yakobo ma, Yakobo dhi djona Yohani ma na ró ro nzá ke bbangʉeri d’i ndrŭ ki ro rá ndi ulu ri.
38 Sinagogi nǎ bbonga bba kpa si ro, kpa singʉe bbò kʉ ná makilele ro, ndrŭ ngʉ dzzdzz ndirigoti ndrŭ ngʉ hø bbobbo ndima chu na. 39 Adzá Yesu tsu ro, ke dhungʉeri: “Ni ká addu dzz ndirigoti ni ká makilele nji bbo addudho? Fø ngba nzá dhedhe ri, ro ngba ddoddo.” 40 Føro ndrŭ ngangʉe ke gbodha tso. Ro, b’lo ndi pori ndrŭ krʉ vʉ arugu nari goti, ke dzingʉe ngba dzá baba ma, ngba dzá mama ma, ke ma ngʉe na ná kpa ma na ndirigoti ke tsungʉe ngba ngʉe ná ngana. 41 Føri goti, ke løngʉe ngba thó ndirigoti ke pongʉeri ngba ni: “Talita kumi,” ná føri nanga le tutu ró, ri na mana kʉ: “Re singba ngba, ma ripo ni dho, adani!” 42 Føro thei ngba dangʉeni ndirigoti ngba ngangʉe bbidha tso. (Ngba dhó cho ngʉe 12.) Ndirigoti fø saa na thei ndrŭ bangʉe hwè bbo pli. 43 Ro, ke jangʉeri bí ina* nari kʉ, nzɨ ndrŭ d’ra fø lo ro ddikpa le dho maddi ndirigoti ke pongʉeri le bbʉ nyo fø ngba nyó.