Luka

23 Føri dho, birobiro kʉ ná ndrŭ dangʉeni krʉ ro ndirigoti ndrŭ mbangʉe ke Pilato bba. 2 Ndrŭ ngangʉe ke bbødha tso ɨ ndima ripo ro: “Ko si i ke ro ngbʉngbʉ ndi li kobbá ndrŭ tsɨ kana ro, ndirigoti ke ripo nzɨ ndrŭ wø Kaisari dhó palata, føri kina ke ndi nzǐ Kristo ndirigoti pi.” 3 Føro, Pilato dhungʉeri ke tso: “Ni i ká kʉ Wayaudi bbá pi?” Yesu ngʉngʉe logoti: “Ni nganga i ripo fø.” 4 Føri goti Pilato pongʉeri bbakuhani djó bbobbonga ma, birobiro kʉ ná ndrŭ ma na dho: “Ma nzá ba i ke djo le ka le d’ilo dho ná lo ro ri.” 5 Ro, kpa ngʉ tøni i lo djo dhé: “Fø ke ddi ná lo chulu ke rili ndrŭ tsatsa. Føri tso ke nga Galilea nǎ ro, nari na ke da Yudea lu krʉ ndirigoti kpadjo ke si iga.” 6 Fø lo Pilato rr ro, ke dhungʉe Yesu ká kʉ Galilea nǎ ke ma nari. 7 Yesu singʉe Herodi pinyo djo ná eneo nǎ ro nari dzá d’ʉnga Pilato chungʉe ná saa na, ke chongʉe ke Herodi dhi ngana; føri kina Herodi maddi ngʉe fø ddo kana Yerusalemu nǎ.

8 Yesu ndi nja ro, Herodi nanga jingʉeni bbo. Dhonalo ke b’ongʉeri bicha b’lo ndi nja Yesu, ke rrngʉe bí kʉ ná lo Yesu djo nari dho. Føri kina ke ngʉ riji Yesu njí ddikpa ddù ro ndi nja. 9 Føri dho, ke dhungʉe bí kʉ ná lo kpari Yesu tso, ro Yesu nzá ngʉngʉe kedhó logoti ro ddikpa maddi ri. 10 Ro, bbakuhani djó bbobbonga ma, nga ndi ná kpa ma na ngʉ dani ndirigoti kpa ngʉ Yesu bbø kpakpanga na. 11 Føro Herodi ma, ndidhó bbasøddá ma na ngʉ ke bé pá ndirigoti Herodi ngʉ ke gbogbo, bbo d’ani ná rù ndi tho ke ro nari chulu. Føri goti ke chongʉe ke ki Pilato bba. 12 Fø dyi Herodi ma ngʉngʉe kau Pilato na, ro anziro nzɨ kpa ngʉ adi rrni ri.

13 Føri goti Pilato gbangʉe bbakuhani djó bbobbonga ma, pikpa ma, nja ndrŭ ma na tso, 14 nari goti ke pongʉeri kpa dho: “Ni mba i ke ma bba ro, ni pori ke rili ndrŭ tsatsa. Ro, aninjari! Ma dhunga ke tso nì ni rr ro, ro ma nzá ba ke ni bbø na ná lo ro ddikpa maddi ke nǎ ri. 15 Herodi nganga ma nzá ddi ba kosa ro fø ke nǎ ri, ná føri dho i ke ngʉ ke ki ko dhi ngana. Fø ke nzá nji hwí le ka le hwí ndi djó ná lo ro ri. 16 Ro, ma malipizi i bbʉ ke dho nì, nari goti ma ke kloklo.” 17* -- 18 Birobiro kʉ ná ndrŭ krʉ høngʉe: “Ahwi ke hwí,* ro aklo Baraba!” 19 (Baraba le sʉngʉe prizo na, ke ngʉe vile na tsangʉe ná ndrŭ kana ndirigoti ke hwingʉe ndrŭ nari djó.) 20 Ro, Pilato dhungʉe nga ki ndrŭ tso bbobbo ndi chu na, dhonalo ke ngʉ ji ndi kló Yesu klo. 21 Føro ndrŭ døngʉe bbobbo ndima chu na, ɨ ndima ripo ro: “Le tɨ ke tsú badjo! Le tɨ ke tsú badjo!” 22 Pilato dhungʉeri ki kpa tso, ri si na gbo ina d’e: “Addudho? Ke ká nji ngbá kosa?” Fø ke nzá nji hwí le ka le hwí ndi djó ná lo ro ri. Ma malipizi i bbʉ ke dho nì, nari goti ma ke kloklo.” 23 Føro ndrŭ tøngʉeni ndima dhó fø lo djo dhé. Ndrŭ ngʉ ripo bbobbo ndima chu na le hwi ke hwi* ndirigoti ndrŭ chu dzá kpakpanga dangʉe da. 24 Føri dho, Pilato vʉngʉeri ndi njí ndrŭ nzi ndi tso ná lo. 25 Ke klongʉe ndrŭ pongʉe le kló ná ke, føri kʉ tsa le tsá nari ma, ndrŭ ndi hwi nari ma na djó le sʉngʉe prizo na ná ke, ro ke bbʉngʉe Yesu ndrŭ dhona, ndrŭ jingʉeri nari bbai.

26 Ke na kpa ra ro, kpa singʉe Kirene nǎ Simoni ró dho kʉ ná ddikpa ke lø, nza gʉ ro ndi ngʉ ro ndirigoti kpa lingʉe Yesu dhó nzadha dhi tsú* ke djo nja ke d’u ri Yesu una d’e. 27 Birobiro kʉ ná ndrŭ kpari ngʉ ra ke una, fø ndrŭ kana ngʉe ná nja isɨ ndrŭ ngʉ ndima badjo b’ɨ vodha dho ndirigoti ndrŭ ngʉ ke dzz. 28 Føro Yesu lengʉe ndi thí fø isɨ ndrŭ dhi ngana ro, ke pongʉeri: “Yerusalemu nǎ sinzø, anibba ma ni dzz nari tso, ro anidzz ni ni niro ndirigoti nidhi nzø; 29 dhonalo gosi ná ddo na ndrŭ ka ve si ripo, ‘Hwè kʉ dho nari kʉ ngʉ di ná le, nzá ba nzø ro ná le ndirigoti nzá ba ro nzø njʉ ná le!’ 30 Fø saa na ndrŭ si kʉ ripo bbobbo ngø dho, ‘Aglʉni ko djo!’ ndirigoti glʉ dho, ‘Atsi ko djó nga tso!’ 31 Njati rie i di ná lo kpa nji go tsú kʉ ju ro ri ró, d’yu tsú d’yu ná saa na ká ri gʉ si o ngbǎ?”

32 Føri goti chelo nji ná aro kʉ ná kpa maddi ndrŭ ngʉ mba le ra che ddinga Yesu ma na d’e. 33 Føro kpa singʉe Le djǒ nǎ kpà le nzǐ ná ngana. Ndrŭ tɨngʉe ke tsú badjo føga, chelo njingʉe ná kpa ma na ddinga, ddi ke thá djó ro ndirigoti ddi ke gru djó ro. 34 Ro, Yesu ngʉ ripo ɨ: “Baba, anji fø kpa zø nji dhonalo kpa nzá chu ndima nji ná lo ri.” Føri kina, kpa kangʉe ke ró rù nanga dyá djó, nja ndima ndó ri nanga d’e. 35 Birobiro kʉ ná ndrŭ ngʉ tøni føga, nga ndima nja ro. Ro, ndrŭ dho ngʉ chutso ddá ná kpa ngʉ ke gbo ɨ ndima ripo ro: “Nja ndrŭ i ke gø ngbà; njati rie bbʉbbʉ ke kʉ Mungu dzá Kristo, vʉ vʉni ná Ke ri ró, anibbari ke gø ndi ndi ndiro.” 36 Bbasødda ma krʉ ngʉ ke gbogbo ndirigoti kpa bbʉngʉe ngóngó o ná divai ke jø, 37 ɨ ndima ripo ro: “Njati rie bbʉbbʉ ni kʉ Wayaudi bbá Pi ri ró, agø ni ni niro.” 38 Føri kina, kpa ndingʉe i lo ke djǒ tso ro: “I ri kʉ Wayaudi bbá Pi.”

39 Ke kuso ro ngʉe tsú badjó ná chelo nji ná kpa kana ddi ke ngangʉe chelo ndi ti ke djo nari tso ɨ ndi ripo ro: “Ni ká nga Kristo ri? Nde, agø ni ni niro ndirigoti ni gø ko maddi!” 40 Ro, fø kpa kana ddi ke ongʉe ndi lai ke na ɨ ndi ripo ro: “Ni ká Mungu do ro nji sese ma nzɨ ddi, ni djó i le ngʉ lod’i ddiddi fø ke na ro? 41 Ko djó le d’ilo d’ʉ, dhonalo ko ba nari kʉ ko nji ná kosa nganga kobe. Ro, i ke nzá nji chelo ro ddikpa maddi ri.” 42 Føri goti ke pongʉeri: “Yesu, nzɨ ni si ma nga vi, pi ni si ngʉ ná saa na.”* 43 Føro Yesu ngʉngʉe logoti ke dho: “Bbʉbbʉ dhé, njʉ ma ripo ni dho, ni ma na ko sie Paradiso nǎ.”

44 Ri ngʉe chøchø saa aza si ro,* føro nga tɨngʉe mbi kpø saa tisa* djo fø ngø lu gble, 45 dhonalo dyi nzɨ ngʉ nga ro í ri ndirigoti takatifu kʉ ná nga nǎ rido nanga thangʉeni katikati lu. 46 Yesu høngʉe bbobbo ndi chu na ɨ: “Baba, ma bba madzá shinga ni thó thí.” Fø lo ke po nari goti ke thí d’engʉe* thei. 47 Sødda djó bbonga njangʉe nji njini ná fø lo ro, ke ngangʉe Mungu madha tso ɨ ndi ripo ro: “Bbʉbbʉ dhé, i ri ngʉe chølo dhi ke.” 48 Føga njungʉe ndima tso fø lo njadha dho ná ndrŭ njangʉe nji njini ná fø lo ro, ndrŭ ngʉngʉe ndima bba ndima badjo ndima b’ɨ ro. 49 Chu chungʉe ke nyi ná ndrŭ krʉ ngʉ tøni da ngana. Godhé, Galilea nǎ ro mbangʉe ke goti ná isɨ ndrŭ ma ngʉe ddi føga, ná fø ndrŭ ma njangʉe fø lo ddi.

50 Anja! Lo ngʉ adi d’i ná kpa kana ddikpa ke ró dho ngʉe Yosefu, ná føri ngʉe bblo kʉ ná ke ndirigoti chølo dhi ke. 51 (Fø ke nzá njingʉe vote ro ri ndiro nzɨ ndi gba ndi tso kpa kpengʉe ná lo ma, kpa njingʉe ná lo ma na na ró) Fø ke ngʉe Yuda nǎ Arimatea dhi vile nǎ ke ndirigoti ke maddi ngʉ adi Mungu dhó Pidhinga b’o. 52 Fø ke rangʉe Yesu dzá bʉ ko Pilato tso. 53 Ke thʉngʉe kedzá bʉ røna ro ndirigoti ke ndɨngʉe ri ronga tso bbo dhó valer kʉ ná rù* na. Føri goti ke rangʉe ri li dju nǎ ngʉe ná kabuli* na, fø kabuli na nzá le d’engʉe ndrŭ ro d’ø ri. 54 Føri ngʉe Matayarisho dhi ddo ndirigoti Sabato ngʉe chøchø ndi tso ngani ngá. 55 Galilea nǎ ro mbangʉe ke goti ná isɨ ndrŭ ma singʉe ddi kabuli djo. Føro ndrŭ njangʉe nga kabuli* na ro, ndrŭ njangʉe ngbaribbai ma le lingʉe kedzá bʉ nari nja. 56 Føri goti ndrŭ ngʉngʉe ro, ndrŭ thɨngʉe djuu ngø ná tsó ma, djuu ngø ná ché ma na. Ro, Sabato ddo dyina ndrŭ chʉngʉe ndima ronga chʉ.