Roma

7 Kpadjo kʉ ná i lo ma po chuchu Yadha ná le-djoi ni dho: Ni ká nzá chu Yadha e kpakpanga na ddikpa ke djo go ke kʉ shi ná saa na dhé nari ri? 2 Loroji na, kø køni ná isɨle chini ndibbá ke ró yadha chulu, go ke kʉ shi ná saa na. Ro, njati ke dhedhe ró, le kloni klo ndibbá ke dhó yadha tsena ro. 3 Njati le køni d’i ke dho go lebbá ke kʉ shi ro ró, le nji uzinifu.* Ro, le bbá ke dhedhe ró, le kloni klo kedhó yadha tsena ro. Føro le køni d’i ke dho ró, le nzá nji uzinifu* ro ri.

4 Føri bbai ma djoi, Kristo ndí liri ni kloni klo Musa dhó Yadha nǎ ro. Føri njini ndiro ni ché d’i ke dho d’e, føri kʉ che cheni ná ndrŭ kana ro gangʉe ná ke. Kpadjo ko ka ko njinjí Mungu dho. 5 Go ko ngʉ njini ko ndí* chenga dhi ri ji nari bbai ná saa na, Yadha lingʉeri ko d’i ko ndí nǎ ngʉ njínji ná chenga dhi ù utso. Føri ka ndi mbae ko dhe dhi ngana dhé. 6 Ro, kpadjo ko kloni klo Yadha nǎ ro ndirigoti ko kloni klo prizo nǎ sʉngʉe ko ná ritsi dhó ro. Kpadjo ko njínji Mungu dho wø kʉ ná chu nǎ roho chulu, ro nga drrdrr ngʉe ná chu nǎ le thó na le ndi ná Yadha chulu ri.

7 Nde, ko ká ji ko pori Yadha kʉ chenga? Ri nga fø ri! Ma nzá ka ma chue d’ʉ ká chenga kʉ addu nari ro ri, njati Yadha ée nga ró. Loroji na, njati Yadha poeri nzá, “Ni dho nzá ringani ni tamani nja ndrŭ dhó ritsi ri” ró, nzá ma ka ma chue nja ndrŭ dhó ritsi le tamani nari kʉ che nari ro ri. 8 Ro, fø Yadha chulu i chenga liri njonjo kʉ ná che kʉ ná ù tsu ma na. Fø Yadha ée nga ró, chenga dzá kpakpanga ro nga eé ri. 9 Bbʉbbʉ dhé, Yadha le bbʉ nari njí ma ngʉe shi. Ro, Yadha si nari goti ma i “dhengʉe dhe,” ro chenga i ngʉngʉe shi. 10 Føro shinga dhi ngana ri ngʉ ngani ddá chutso ma dho ná yadha i lingʉeri ma dhedhe. 11 Chenga njingʉe njí fø yadha na ndi sha ma ndirigoti ndi hwi ma d’e. 12 Godhé, Yadha nganga kʉ takatifu ndirigoti lojadha maddi kʉ takatifu, chø ndirigoti bblo.

13 Nde, føri ká pori, bblo kʉ ná fø ritsi i hwingʉe ma? Ri nga kʉ fø ri! Ro, hwi hwingʉe ma nari kʉ chenga. Yadha kʉ bblo, ro ri dhongʉeri pʉlʉpʉlʉ nari kʉ, ri kʉ chenga i ngʉ ma hwi ri. Føri dho bbʉbbʉ dhé, lojadha dhongʉe ngbá ngatsi ma chenga kʉ che bbo nari. 14 Ko churi chu nari kʉ, Yadha singʉe Mungu dhó ro kedzá roho chulu, ro kpakpalo bbʉ nari kʉ ma, dhonalo ma kʉ nzá kaka ná ke,* ma nanga dzingʉeni nja ma é chenga dhó nokpa d’e. 15 Ma nji ná lo ká ma adi nji addudho ma nari ro nzɨ ma famu bblo ri. Ji ma ji ná lo ma njié nari rɨngana, ma ndro ma ndrorie ná lo nji. 16 Ma uri u Yadha kʉ bblo, ro føro mai ma adi nzá ma ji ná lo nji godhé. 17 Føri dho, fø chelo nji nari nga kʉ ma nganga ri, ro ri kʉ ma nǎ kʉ ná chenga. 18 Ma churi chu nari kʉ ma nǎ nga kʉ bblo kʉ ná lo ro ri, føri kʉ má ndí chenga dhi i ri nǎ. Dhonalo ngbà mai ma jiri ma njí bblolo ro, ri ro nzɨ njini ma dho ri. 19 Ma ji ma njí ná bblolo ro i nzɨ njini ma dho ri. Ro, føri rɨngana ma nji nari kʉ nzɨ ma adi ji ma njí ná chelo nganga. 20 Føri dho ma di nzá ma ji ma njí ná lo nji ró, ri nga kʉ ma i fø chelo nji ri. Ro, ri kʉ ma nǎ di ná chenga i fø lo nji ri.

21 Ma laidjó ro ma njari i lo kʉ bbʉbbʉ: Ma jiri ma njí bblolo ró, chelo e ma nǎ. 22 Ma nǎ atsi ma ji Mungu dhó yadha bbo. 23 Ro, ma ndí* nǎ ma ddikpa d’i yadha nja, ná ri hwini madhó ngaddidha dhi yadha tso ró, ndirigoti ri ma mba sʉ le sʉ ná ke bbai ma ndí* nǎ kʉ ná chenga dhi yadha dhona. 24 Ma ile dzá njedha! Ma ká ie klo dhe dhi ngana ma mba ná i le ndí dhó ro? 25 Mbai Mungu dho dhonalo ke ma gø kodhi Bboke Yesu Kristo chulu! Føri dho, madhó ngaddidha ró ma kʉ Mungu dzá yadha dhi nokpa, ro ma ndí ró ma kʉ chenga dhi nokpa.