Matayo

17 Ddo 6 goti, Yesu dzingʉe Petro ma, Yakobo ma, kedhi djona Yohani ma na ndirigoti ke ma rangʉe bbo ngbeni ná ddikpa ngøtsɨ djo, kpa ma na dhé. 2 Føro ke nyi lengʉeni kpa nji; ke nyǒ djó nga ngʉ chá dyi bbai, ke ró arugu ro kʉ ná rù ngʉ ká* kadha bbai. 3 Føro Musa ma, Eliya ma na dhongʉe ndima kpa dho ndirigoti kpa ngʉ loti Yesu na. 4 Føro Petro pongʉeri Yesu dho: “Bboke, ri kʉ bblo ko di iga. Ngbà ni jiri ró, ma bbadza chi 3 iga, ddikpa ri ni dho, ddikpa ri Musa dho, ndirigoti ddikpa ri Eliya dho.” 5 Go, ke ngʉ loti ná saa na, chachá ná ndundu tsingʉe kpa djó nga tso ndirigoti ddikpa lechu pongʉeri fø ndundu nǎ ro: “I ri kʉ madhi Dduna, bbo ma ji ná ke, u ma u ndi tso ro. Anirrnga ke dho.” 6 Fø lo Yesu unakpa rr ro, kpa do løngʉe bbo ndirigoti kpa kongʉeni ndima d’eti djo, gʉna ndima tsi ndima djǒ ro. 7 Føri goti Yesu ndringʉeni kpa kuso ro, ke lø kpa ronga ɨ ndi ripo ro: “Anidani. Nzɨ ni nji do.” 8 Kpa djǒ kpa ngbe ná saa na, kpa nzá njangʉe ddikpa le ro maddi Yesu ró ro ri. 9 Ngøtsɨ djó ro kpa ngʉ thʉ ro, Yesu jangʉeri ɨ kpa dho: “Nzɨ ni d’ra ni nja ná lo ro ddikpa le dho maddi kpø ndrŭ Ddù ga che cheni ná ndrŭ kana ro ná nga djo.”

10 Ro, Yesu unakpa dhungʉeri ke tso: “Ká addu dzá lo dho nga ndi ná kpa adi ripo, ringani Eliya i si vi?” 11 Ke ngʉngʉe logoti: “Bbʉbbʉ dhé, Eliya si nì ndirigoti ke si krʉ kʉ ná lo thika kpekpe. 12 Ro, ma ripo ni dho Eliya sie b’lo, ro kpa nzá chue ke nyi ro ri ndirigoti kpa njie ndima ji ná lo krʉ ke ró. Ndrŭ Ddù nganga maddi kpa si kʉ nza føri bbai. 13 Føro ke unakpa d’ingʉe ri utso nari kʉ, ke loti Yohani Mubatizaji djo.

14 Kpa singʉe birobiro kʉ ná ndrŭ dhi ngana ná saa na, ddikpa ke singʉe Yesu dhi ngana ndirigoti ke kongʉeni ndi d’eti djo ro, ke pongʉeri: 15 “Bboke abe zø madzá kpetsi ngba djo dhonalo ke ró kʉ ngarr* ndirigoti ke nzani bbo. Ke adi bʉni bí ina kazz na ndirigoti dda na. 16 Ma sie ke na ni unakpa dhi ngana ro, kpa tsori ke ndima gø nari gʉgʉ.” 17 Yesu ngʉngʉe logoti: “Nga dhó udha kʉ ná sa sani ná i gø! Ni na ká ma di kʉ thɨcha? Ni tso ká ma ve kʉ thɨcha? Anisi ke na ma dhi ngana.” 18 Føro Yesu tangʉe fø gó djó ndirigoti gó vʉngʉe vʉ ke nǎ ro, ndirigoti fø kpetsi ngba ró dhe gøngʉe fø saa na thei. 19 Føro Yesu unakpa singʉe ke dhi ngana nga ndrŭ ro kʉ ná saa na ndirigoti kpa dhungʉeri: “Fø gó ká dieni ko dho nzá addudho?” 20 Ke ngʉngʉe logoti: “Ri kʉ nidhó udha kʉ sese nari dho. Bbʉbbʉ dhé ma ripo ni dho, njati nidhó udha ée haradali dhi tsu-kpa tsi ró, ni ka ni poeri i ngø ni, ‘Atuni iga ro ni rá chaga’, føro ri ka ndi tuni tu. Ndirigoti ddikpa lo ma nzá ddi ka ndi gʉe ni tsori ro ri.” 21* ——

22 Yesu ma, ndi unakpa ma na gbangʉe ndima tso Galilea na ná saa na, ke pongʉeri kpa dho ɨ: “Ndrŭ Ddù si bbʉni ndrŭ thó thina, 23 ndirigoti kpa si ke hwihwi, føri goti ddo 3 djó ke si gaga.” Fø lo bbʉngʉe njedha bbo kpa dho.

24 Kapernaumu na kpa si ro, drakma* 2 dhi palata wø ná kpa singʉe Petro dhi ngana ndirigoti kpa pongʉeri: “Nidhó mwalimu ká adi drakma 2 dhi palata wø nzɨ?” 25 Petro ngʉngʉe logoti: “Nì.” Ro, adza ke tsu ná saa na, Yesu i dhungʉe nga ke tso nji, ke dhungʉeri: “Simoni ni ká ddiri ngbǎ i lo djo: “Dz’ djó pikpa ká adi ritsi tso ødha dhi mbø ma, palata ma na kó ie tso? Ri ká kpa adi kó ndima ddui tso inga d’i ngø nǎ ro si ná ndrŭ tso?” 26 Petro ngʉngʉe logoti: “Ri kpa adi kó d’i ngø nǎ ro si ná ndrŭ tso.” Føro Yesu pongʉeri ke dho: “Bbʉbbʉ dhé, føri pori, pi ddui nzɨ adi palata wø ri. 27 Ro, ndiro nzɨ ko bʉ kpa thí ró, adzi ndobbani ndirigoti adjo ri jʉdda na. Adzi ya kwanza ni lø ná bbè ndirigoti ni wé ri tso nanga; ri tso nǎ ni si si kichele dhi mbøkpa* ro ddikpa. Adzi fø mbøkpa ndirigoti ara ko djó ri bbʉ ni na.”