Yohani

16 “Ma poe fø lo ni dho ndiro nzɨ ni thí bʉni ró. 2 Ni ndrŭ si pʉpʉ sinagogi nǎ ro. Bbʉbbʉ dhé, ddikpa saa na, ddikpa ke hwi ni ró, ke si riddi ndi takatifu kʉ ná njí nji Mungu dho. 3 Ro, kpa si fø lo nji kpa nzá chu Baba inga ma ro maddi ri nari dho. 4 Fø lo ma po ni dho dhonalo kʉ, ri si njini ró, ni si ri ma pongʉe po ni dho nari nga nono d’e.

“Anziro nzá ma pongʉe fø lo ni dho ri dhonalo ma ngʉe ni na nì. 5 Ro, kpadjo ma ra cho chongʉe ma ná ke dhi ngana, ro ni kana ddikpa le ma nzɨ ddi ri ro dhu ɨ ri, ‘Ni ká ra ngbaga?’ 6 Ro, ri kʉ fø lo ma d’ra ni dho nari dho i ni thí nanga lili njedha na ri. 7 Føro mai bbʉbbʉ dhé ma ripo ni dho, ri kʉ nidhi bblonga dho i ma ra følu ri. Njati ma rá nzá ró ni tsotso kó ná ke ro nzɨ si ri, ro ma rárá ró ma si ke chocho ni dhi ngana. 8 Fø ke si si ró, ke si ngbà le ka le u chenga ma, chølo ma, lod’idha ma na djo ná lo dzá d’ʉnga dho dz’ dho. 9 Ya kwanza ri sie chenga djo dhonalo kpa nzɨ udha dhǒ ma nǎ ri; 10 Føri goti ri sie chølo djo dhonalo ma ra Baba dhi ngana ndirigoti ni nzɨ si ma ki ro nja ri. 11 Ya mwisho ri sie lod’idha djo dhonalo i dz’ dzá pi djó lod’ini b’lo.

12 Ni dho ma d’ra ná ritsi kʉ bí go, ro ni nzá ka ni famu ri ro kpadjo ri. 13 Nì mai ri kʉ fø ro, fø ke* si si ró, føri kʉ bbʉbbʉlo dhi roho, ke si chutsodda ni dho krʉ kʉ ná bbʉbbʉlo kana dhonalo ke si ti nari nga kʉ ndi nganga dhó ro si ná lo ri, ro ri sie rr ke rr ná lo ndirigoti ke si gosi ná saa na si njini ná lo d’ra ni dho. 14 Ke si kadha bbʉ ma dho dhonalo ke si ritsi ba ma dhó ro ndirigoti ke si ri d’ra ni dho. 15 Baba dhó kʉ ná ritsi krʉ kʉ madhó ri. Ri kʉ føri dzá lo dho i ma pori ke si ritsi ba madhó ro ndirigoti ke si ri d’ra ni dho ri. 16 Karrnga goti ni nzɨ si ma ki ro nja ri ndirigoti karrnga goti ni si ma ki nja vi.”

17 Ke unakpa kana nja kpa ngangʉeri tidha tso ɨ ndima kana: “Ke ká ji ndi pori ngbǎ ko dho i lo chulu ‘Karrnga goti ni nzɨ si ma ki ro nja ri ndirigoti karrnga goti ni si ma ki nja vi’ ndirigoti ‘ma ra Baba dhi ngana nari dho’?” 18 Føro kpa ngʉ riti: “Ke ripo, ‘karrnga goti’ ná føri na ká ke ji ndi pori ngbǎ? Ko nzá chu addu djo ma ke loti nari ro ri.” 19 Yesu chungʉe kpa ngʉ ji ndima dhunga ndi tso nari chu nari dho, ke dhungʉeri kpa tso: “Ni ká føri ti ni kana ma poeri: ‘Karrnga goti ni nzɨ si ma ki ro nja ri ndirigoti karrnga goti ni si ma ki nja vi’ nari dho? 20 Bbʉbbʉ dhé ma ripo ni dho, ni si dzzdzz ndirigoti ni si ju bbɨ; dz’ sie hwè na ro ni sie njedha na, ro nidhó njedha si leni ndi ngʉ hwè. 21 Go isɨle ngba gø ná saa na, le e njedha na dhonalo ledhó saa si si, ro b’lo le gø ngba ró, le nzɨ adi ndi bae ná nzadha nga ki ro no ri dhonalo le e hwè na ngba gøni dz’ djó nari dho. 22 Føri bbai kpadjo ni kʉ njedha na, ro ma si ngʉ ná saa na ni thí nanga si lili hwè na ndirigoti nidhó fø hwè ro nzɨ ddikpa le ma si dhʉ nidhó ro ddi ri. 23 Føro nzɨ ni si ddikpa lo ro ma dhu ma tso ddi ri. Bbʉbbʉ dhé ma ripo ni dho, njati ni nzi ngbá lo ma Baba tso ma ró dho na ró, ke si ri bbʉbbʉ ni dho. 24 Kpø kpadjonga djo nzá ni d’e ddikpa ritsi ro ma nzi ma ró dho na ddi ri. Aniko ri ndirigoti ni si ri baba ndiro nidhó hwè tso kaka d’e.

25 Ma d’rae fø lo ni dho loroji chulu, ro saa si nì ná saa na nzɨ ma si loti ni dho loroji chulu ri, ro ma si lod’ra pʉlʉpʉlʉ ni dho Baba djo. 26 Fø dyi ni si nganzi Baba tso ma ró dho na; ro fø lo ma po nari chulu nzɨ ma ji ma pori nari kʉ ma i si ritsi ko ni dho ri. 27 Dhonalo Baba ndi ndiro jirie ni ji, ni ji ma ji ndirigoti ni uri ma singʉe Mungu rɨngana nari dho. 28 Ma singʉe Baba rɨngana ndirigoti ma si dz’ djo, ro kpadjo ma tuni tu dz’ djó ro ndirigoti ma ngʉ Baba dhi ngana.

29 Føro ke unakpa pongʉeri: “Anja! Kpadjo ni loti pʉlʉpʉlʉ, ro nga loroji chulu ri, 30 kpadjo ko churi chu ni chu krʉ kʉ ná lo ndirigoti ni tso ddikpa le ngadhu dho ná lo ro nga kʉ ri. Føri chulu ko uri u nari kʉ ni singʉe Mungu dhi ngana ro.” 31 Yesu dhungʉeri kpa tso: “Kpadjo i ká ni uri u? 32 Anirr di! Saa si nì ndirigoti ri si b’lo, ná fø saa na ni nanga si plini pli. Ni si nganyi ni bbalu ndirigoti ni si ma bba ddiro, ro ma nga kʉ ddiro ri dhonalo Baba kʉ ma na nì. 33 Ma po fø lo ni dho ndiro ma chulu ni é ngoi na d’e. Dz’ djó ni si nzadha ba, ro nzɨ ni nji do! Dhonalo ma sisi dz’ djolu.”