Yohani
15 “Ma kʉ bbʉbbʉ divai tsu ndirigoti madzá Baba kʉ nza bbɨ ná ke. 2 Ke adi nzɨ ndi kpa o ná lerr krrkrr ma ró ro ndirigoti nì ndi kpa o ná ri ronga ke adi thɨthɨ ndiro ri o ndi kpa ki bbo pli d’e. 3 Ni dho ma pongʉe ná lo djotsina ni kʉ b’lo ni tsetse ro. 4 Anidi ddi ni tso gbani ma na ro ndirigoti ma maddi si di ddi ma tso gbani ni na ro. Ddiddi tsú ró lerr nzɨ adi tsu-kpa ro ó nga ndi é divai tsu ró dhé ró ri nari bbai, ni ma nzɨ ddi ni kpa ro o rie nzá ni tso gbani ddi ma na ró ri. 5 Ma kʉ divai tsu ndirigoti ni kʉ lerr. Njati ddikpa ke é ddi ndi tso gbani ma na ro ndirigoti ma é ddi ma tso gbani ke na ro ró, fø ke si ndi kpa o bbo, dhonalo ngadhi ma ro nzá ni ka ni njí addu ro maddi ri. 6 Njati ddikpa ke é nzá ndi tso gbani ddi ma na ro ró, fø ke kʉ ddiddi krr le krr ná lerr bbai d’yu ndi adi d’yu ro. Ndirigoti ndrŭ adi fø lerr sø nari ndrŭ adi ra bu kazz na ndirigoti ri adi gbɨgbɨ. 7 Njati rie ddi ni tso gbani ma na ndirigoti madzá lo é nì ni nǎ ró, aniko ni ji ná ritsi ndirigoti ri si njini nji ni dho. 8 Madzá Baba adi madha ba njati ni di ni kpa ó bbo ndirigoti ni dhǒ ni ma unakpa ró. 9 Ddiddi Baba jingʉe ma nari bbai, ma maddi ji ni ji; anidi madzá jidha nǎ. 10 Njati ni di madzá yadha dyø ró, ni si di madzá jidha nǎ ddiddi ma maddi dyøngʉe Baba dzá yadha ndirigoti ma di kedzá jidha nǎ nari bbai.
11 Fø lo ma po ni dho ndiro madzá hwè é ni nǎ ndirigoti nidhi hwè tso kaka d’e. 12 I ri kʉ madzá yadha, ni jini ni kana ddiddi ma jirie ni nari bbai. 13 Ddikpa ke dhó jidha ro ma nzá ddi da ndidhó shinga* bbʉ ndidhó bbakau djotsina ná ke dhó jidha djolu ri. 14 Ni kʉ madzá bbakau njati ni di ma ja ni dho ná lo nji ró. 15 Ma nzɨ ni ki ro nzi nokpá ri, dhonalo noke nzá churie ndidzá bboke nji ná lo ro ri. Ro, ma ni nzǐ bbakau dhonalo ma liri ni chu madzá Baba dhó ro ma rr ná lo krʉ chu. 16 Ni nzá vʉngʉe ma ro ri, ro ri kʉ ma i vʉngʉe ni ri, ndirigoti ma vʉngʉe ni ndiro ni rá ndirigoti ni ó ni kpa, ná ndiri máma ndiro addu ma ni kó Baba tso ma ró dho na ró, ke bbʉ ri bbʉ ni dho d’e.
17 Føri ma ja ni dho ndiro ni jini ji ni kana d’e. 18 Njati rie ndro dz’ ndro ni ri ró, ni churi chu nari kʉ ri ndrongʉe ma i vi ni ri ndro nari njí. 19 Njati ni ée dz’ dzá ndrŭ ró, dz’ chiéni chi ndidzá ri kʉ ná ritsi na, ro ni nga kʉ dz’ dzá ndrŭ ri dhonalo ni ma vʉvʉ dz’ djó ro, ri kʉ føri dho i dz’ ndro ni ri. 20 Anib’o ma pongʉe ná i lo ronga ni djǒ nǎ: Njí dhi ke ro nzá darie ndidzá bboke djolu ri, njati rie nza kpa nzae ma ri ró, ni maddi kpa si nzanza; nde njati rie rr kpa rrngʉe nga madzá lo dho ri ró, ni po ná lo dho maddi kpa si ngarr rr. 21 Ro, kpa si fø lo krʉ nji ni ró ma ró dho djotsina dhonalo kpa nzá chu cho chongʉe ma ná Ke ri. 22 Njati ma sie nzá ndirigoti ma tielo nzá kpa dho ró, kpa nǎ nga eé chenga ro ri, ro kpadjo kpa zø le nji kpadhó chenga djotsina dho ná lo ro nga kʉ ri. 23 Ddikpa ke ndro ma ndro ró, fø ke ndro madzá Baba ma ndro ddi. 24 Njati ma njie nzá ro ie ma d’erie nji ná lo kpa kana nzá ro, kpa nǎ nga eé chenga ro ri, ro kpadjo kpa nja ma nja ndirigoti kpa ndro ma ma, madzá Baba ma na krʉ. 25 Ro, fø lo krʉ njini ndiro yadha nǎ ndingʉeni ná i lo njini d’e: “Kpa ndrongʉe ma pá dhé.” 26 Ma si nga tsotso kó ná ke cho, føri i kʉ bbʉbbʉlo dhi roho, ke si si Baba dhi nga nǎ ro ndirigoti ke si bbʉbbʉlo d’ra ma djo. 27 Ndirigoti ni dho ringani ni d’ra fø lo dzá bbʉbbʉnga dhonalo ni ngʉe ma na fø lo tso ngani ná nga djó ro.