Roma
3 Nde, Muyaudi le kʉ nari na mana ká kʉ addu? Inga krr le krr le nari na mana ká kʉ addu? 2 Føri dzá bblonga kʉ bí. Ya kwanza Mungu bbʉngʉe ndidzá takatifu lo Wayaudi dho. 3 Nde, føro ká ri ka ndi é ngbǎ njati kpa kana nja kpa tøeni chi nzá ró? Føri na mana ká kʉ Mungu nzɨ adi tøni chi ri? 4 Bbʉbbʉ dhé nga! Njati ndrŭ krʉ ngʉ kali dhi ndrŭ ma ró, Mungu si di bbʉbbʉlo dhi ke dhé, ddiddi ndi ndini ná i lo ripo nari bbai: “Ni si dhoni chø nidzá lo chulu ndirigoti ni si sisi ni djo lo si d’ini ná saa djo.” 5 Ko nji ná nga kʉ chø ná lo ridho pʉlʉpʉlʉ nari kʉ, Mungu kʉ chølo dhi ke. Nde, føro Mungu bbʉ ndidhó thø ró ká ke nji kosa? (Ma loti ndrŭ adi loti nari bbai.) 6 Ri nga kʉ fø ri! Dhonalo rie fø ró ká Mungu ka ndi d’ilo dz’ djo ngbaribbai?
7 Føri kina, rie madhó kali rili Mungu kʉ bbʉbbʉlo dhi ke nari dhoni pʉlʉpʉlʉ ndirigoti ri di rili ke ba kadha bbo ró, nja ndrŭ ka ndima dhuri, ‘Føro ká le ma nzǐ chenga dhi ke addudho?’ 8 Føro ká le ka le pori ɨ nzá, “Akonji chelo ndiri nǎ ro i bblolo si d’e,” nja ndrŭ adi ri tso d’ya ko djo nari bbai? Fø di ná lo ti ná ndrŭ djo lo si d’ini chølo ró ro.
9 Nde, Wayaudi ko kʉ ro ká ko kʉ bblo pli nja ndrŭ djolu? Karnø ma nga ddi! Dhonalo ko dhoeri b’lo nari kʉ, Wayaudi ma, Bbagiriki ma na krʉ kʉ chenga dhi ndrŭ. 10 Ndi ndini ná lo ripo ná i ri bbai: “Chølo dhi ndrŭ ro nga kʉ ri, ddikpa ma nga ddi. 11 Lo le famu na ná akili na kʉ ná le ro nga kʉ ddikpa maddi ri ndirigoti nì Mungu ne ná le ro ma nga ddi kʉ ddikpa maddi ri. 12 Ndrŭ krʉ leni le Ke ró; ndrŭ krʉ ngʉ pá kʉ ná ndrŭ. Bblonga dhǒ ná le ro nga, ddikpa ma nga ddi.” 13 “Kpa chutso kʉ pʉlʉ tso kʉ ná kabuli. Kpa dà na kpa kali sha.” “Kpa tso kʉ su nǎ dyá bbai.” 14 “Kpa tso nanga lili wá ma, thø ma na na.” 15 “Kpa kó kʉ lele ju d’rødha dho.” 16 “Krʉ kpa nji ná lo kana, kpa vodha ma, njedha ma na ka ndi bbʉ ná lo nji. 17 Ndirigoti kpa nzá chu ngoi dhi chu ro ri.” 18 “Kpa nzɨ Mungu do ro nji ddikpa maddi ri.”
19 Kpadjo ko churi chu nari kʉ, Yadha nǎ kʉ ná lo krʉ adi njínji Yadha tsena kʉ ná ndrŭ djo. Ri dhó kusudi kʉ, krʉ kʉ ná ndrŭ tso go ddi ndirigoti ri dhori nari kʉ dz’ lu kaka ndi ba malipizi Mungu dhó ro. 20 Føri dho, ddikpa le ro ma nzɨ ddi Mungu zø chølo dhi le, le nji yadha po ná lo nari dho ri. Bbʉbbʉ dhé, yadha rili ko famu chenga ká kʉ addu nari pʉlʉpʉlʉ.
21 Ro, ddiddi Yadha ma, Bbanabi ma na pongʉeri nari bbai, kpadjo nzɨ Mungu dhó chølo dhoni Yadha chulu ri. 22 Mungu dhó chølo dhoni Yesu Kristo djo kʉ ná udha chulu. Dhonalo ddikpa ndrŭ tsɨ na mana ro ma nga ddi kʉ pli nja ndrŭ tsɨ djolu ri. 23 Dhonalo ndrŭ krʉ nji chenga ndirigoti ddikpa le tso ro ma nzɨ ddi si Mungu dzá kadha djo ri. 24 Pá le bbʉ ná bbʉdha bbai, Mungu zø kpa chølo dhi ndrŭ ndidzá nzá tso ka ndi koe le djo ná zølo chulu, kpa kloni Yesu bbʉ ná le ødha dhi be chulu nari dho. 25 Mungu bbʉ Yesu ndiro ko kana kau ki ngʉ* ndi na vi Yesu dzá ju djo ko kʉ na ná udha chulu d’e. Mungu njingʉe fø lo ndiri na ndi dhǒ ndi nganga dzá chølo d’e. Ke nzá dho ndidzá dà le thí* drrdrr njingʉeni ná chenga zø ndi nji nari chulu dhé ri, 26 ro ke dho ndi nganga dzá chølo ko dho maddi njʉ, Yesu djo kʉ udha na ná ndrŭ ndi nzi chølo dhi ndrŭ nari chulu.
27 Ngbe ko ko ngbe dho ná lo ro ká kʉ ddi? Ri ro nga kʉ ri. Nde, ri ká ngani ko ngbe ko, ko ngarr yadha dho nari dho? Ri nga kʉ fø ri; ro ringani ko ngbe ko, ko ngarr udha dhi yadha dho nari dho dhé. 28 Dhonalo ko churi chu nari kʉ, ddikpa ke le adi nzǐ chølo dhi ke udha chulu, ro nga ke rimbu ndi njí yadha ja ná lo nari chulu ri. 29 Inga Mungu ká kʉ Wayaudi dhi Mungu dhé? Ke ká kʉ nga ndrŭ tsɨ krʉ dhi Mungu maddi ri? Bbʉbbʉ dhé, ke kʉ ndrŭ tsɨ krʉ dhi Mungu. 30 Mungu kʉ ddikpa dhé nari dho, ke si krr le krr ná ndrŭ ma, nzá le krr ná ndrŭ ma na krʉ nzi chølo dhi ndrŭ kpadhó udha djotsina. 31 Nde, kodhó udha chulu ká ko Yadha sisi? Ri nga kʉ fø ri. Føri rɨngana ko ko tso gba Yadha na.