Yohani

6 Føri goti Yesu dangʉe Galilea dhi jʉdda dzá chá dzɨ nga laidjo inga Tiberia na. 2 Ro, birobiro kʉ ná ndrŭ kpari ngʉ ra ke una dhé, dhonalo ndrŭ njangʉe ke ngʉ nji ná ddù ma, ke ngʉ dhe dhi ndrŭ gø nari ma na nja. 3 Føri dho, Yesu djingʉe ddikpa ngøtsɨ djo ndirigoti ke ma dingʉe føga ndi unakpa ma na. 4 Ro, Wayaudi bbá Pasaka dhi fete singʉe chøchø. 5 Yesu ngbengʉe ndi nyǒ ro, ke njangʉe birobiro kʉ ná ndrŭ kpari si ndi dhi ngana nari ro, ke dhungʉeri Filipo tso: “I ndrŭ kpari ka ndima nyó ná mukati ká ko ra dzi ngbaga?” 6 Ro, ke ngʉ føri po ndiri na ndi mbu Filipo mbu d’e, dhonalo ke chungʉe karrnga goti ndi sie nji ná lo chu. 7 Filipo ngʉngʉe logoti ke dho: “Dinari* 200 ró le dzi ná mukati nanga le ndó nini nari ro ma nzɨ ddi ka afø ndrŭ kpari na ri.” 8 Ke unakpa kana ddi ke, Andrea, Simoni dhi djona pongʉeri Yesu dho ɨ: 9 “Iga kʉ ná ddikpa jadda ke dju dhó kʉ shayiri dhi farine na le thɨ ná mukati mbʉ ndirigoti rere bbè djú aro. Ro, bí kʉ ná afø ndrŭ kpari kana ká føri ka ndi ve addu nji?”

10 Føro Yesu pongʉeri: “Anipori ndrŭ di gʉna.” Føga tsó ngʉe bbo nari dho ndrŭ dingʉe ri djo; føga kpetsi kpa ngʉe chøchø 5 000. 11 Yesu dzingʉe mukati, føro b’lo ndi po mbai sala nǎ nari goti, ke ndongʉe ri føga ngʉ di ná ndrŭ dho; rere ngʉe ná fø bbè djú na maddi ke njingʉeri fø; ndirigoti ndrŭ nyongʉe nga ndima ji ná ngatsi. 12 Ro, b’lo ndrŭ nyonga ndima o li ná ngatsi nari goti, ke pongʉeri ndi unakpa dho: “Aninju ri tso kúkú tso ndiro nzɨ ri ro sani ddikpa maddi ró.” 13 Shayiri dhi farine na le thɨ ná mukati ndrŭ nyo nari tso kúkú tso le gba nari singʉe d’yó 12 lu pɨpɨ.

14 Ke njingʉe ná fø ddù ndrŭ nja ro, ndrŭ ngangʉe ri podha tso ɨ: “Bbʉbbʉ dhé, i ri kʉ dz’ djo ka ndi sie si ná Nabi.” 15 Føri goti, Yesu d’ingʉe ri utso nari kʉ ndrŭ rine ndima lø ndi, ndiro ndima li ndi pi d’e ná saa na, ke ki rangʉe ngøtsɨ djo ddiro dhé.

16 Ngasdjó nga si ro ke unakpa thʉngʉe jʉdda tso ro. 17 Føri goti kpa djingʉe bbú na ndirigoti kpa ngangʉe radha tso Kapernaumu nǎ nga laidjo. Nga tɨngʉe tɨ b’lo, ro Yesu ro i nzá d’engʉe si kpa kana ri. 18 Føri kina nga ngʉ vʉ bbo nari dho, dda-gru ngʉ ndi bú røna. 19 Ro, b’lo kpa ra chøchø kilometre 5 inga 6* nari goti, kpa njangʉe Yesu dda djolu ndi bbi ro, ndirigoti chøchø ke si ndima dhó bbú kuso ro, ná føri dho do løngʉe kpa bbo. 20 Ro, ke pongʉeri kpa dho: “I ri kʉ ma ró, nzɨ ni nji do!” 21 Kpa ngʉ ji ndima d’ú ke bbú na ro, føro thei bbú singʉe kpakpa d’yu ná dz’ djo, ná føri ngʉe kpa ngʉ ra ná nga.

22 Bbʉdyi, chá dzɨ nga laidjo mangʉe ná birobiro kʉ ná ndrŭ njangʉeri føga nga kʉ bbú ro ri. Føga ngʉe sese kʉ ná ddikpa bbú dhé, ro Yesu ma ro nzá djingʉe ndi unakpa ma na ddikpa bbú na ri, dhonalo ke unakpa rangʉe ndima kpali ro dhé. 23 Ro, bbú nyangʉeni Tiberia nǎ ro, anziro Bboke pongʉe mbai sala nǎ nari goti ndrŭ nyongʉe mukati ná nga kuso. 24 Birobiro kʉ ná ndrŭ njangʉeri Yesu ma, ndi unakpa ma na krʉ ro nga kʉ føga ri nari ro, ndrŭ djingʉe ndima dhó bbú na ndirigoti ndrŭ rangʉe Yesu ne Kapernaumu na.

25 Ndrŭ singʉe ke ro jʉdda dzá chá dzɨ nga laidjó ro, ndrŭ dhungʉeri ke tso: “Rabi, ni ká si iga ngbá saa na?” 26 Yesu ngʉngʉe logoti kpa dho: “Bbʉbbʉ dhé ma ripo ni dho, ni ma ne dho nari nga kʉ ni njae ddù nari ri, ro ri kʉ ni nyoe mukati ndirigoti ni o lie li nari dho. 27 Nzɨ ni njinjí sa ka ndi sani ná nyo ró, ro aninji njí cho ró nŭnŭ di ná shinga dhi nyo ró; føri kʉ ndrŭ Ddù si kʉ bbʉ ni dho ná nyo, dhonalo fø ke djó i Baba, Mungu nganga du kashe nja ndi dhǒ ke tso ndi u ngbà nari d’e.”

28 Føri dho kpa dhungʉeri ke tso: “Ri ká ngani ko njí addu ndiro ko njí Mungu dzá njí d’e?” 29 Ke ngʉngʉe logoti kpa dho: “Mungu dzá njí kʉ, ni dhǒ udha cho ke chongʉe ná ke nǎ.” 30 Føro kpa ngʉngʉe logoti: “Ni ká ngbá ddù nji ndiri ko nja ndiro ko u ni d’e? Ni ká ngbá njí nji? 31 Ko bbui nyongʉe mana ngødja nǎ, ddiddi ndi ndini ná lo pori nari bbai: ‘Ke bbʉngʉe ra nǎ ro si ná mukati kpa nyó.’” 32 Føro Yesu ngʉngʉe logoti kpa dho: “Bbʉbbʉ dhé ma ripo ni dho, Musa nzá bbʉngʉe ra nǎ ro si ná mukati ro ni nyó ri, ro madzá Baba i bbʉ bbʉbbʉ kʉ ná mukati ra nǎ ro ni dho. 33 Dhonalo Mungu dhó ro si ná mukati kʉ ra nǎ ro thʉ ná ke, shinga ndi bbʉ dz’ dho ro.” 34 Føri dho, kpa pongʉeri: “Bboke, adi fø mukati bbʉ ko dho krʉ ddo ró.”

35 Yesu ngʉngʉe logoti kpa dho: “Ma i kʉ shinga dhi mukati. Ddikpa ke si ma dhi ngana ró, fø ke ki ro nzɨ ù hwi ri ndirigoti ddikpa ke dhǒ udha ma nǎ ró, fø ke ki ro nzɨ dda d’yu hwi ri. 36 Ro, ma poeri ni dho nari bbai, ngbà mai ni nja ma nja ro, ni nzá dhé u ma ro ri. 37 Madzá Baba bbʉ ma dho ná ndrŭ krʉ si kʉ sisi ma dhi ngana, ndirigoti ma nzɨ si ma dhi ngana si ná ke ro di ri. 38 Ma singʉe ra nǎ ro, nga ma njí ma ji ná lo d’e ri, ro ma njí cho chongʉe ma ná ke ji ná lo d’e. 39 Cho chongʉe ma ná ke ji ná lo kʉ, nzɨ ma vi ma dho ndi bbʉ ná ndrŭ kana ro ddikpa le ro maddi, ro ma si kʉ kpa ga ya mwisho ddo dyina. 40 Dhonalo, madzá Baba ji ná lo kʉ ena: “Ngbà chú le Ddù ndirigoti ngbà dhǒ udha ke nǎ ná ke si cho ró nŭnŭ di ná shinga ba, ndirigoti ma si kʉ ke ga ya mwisho ddo dyina.”

41 Føro Wayaudi nanga ngangʉe nudha tso ke djo, ke ngʉ ripo ɨ nari dho: “Ma i kʉ ra nǎ ro si ná mukati.” 42 Føri goti kpa ngangʉe ɨ ndima ripo nari tso: “I ri ká kʉ nga Yosefu dhi dduna Yesu, ddi ko chu ndidzá baba ma, ndidzá mama ma na ro ri? Ká ngbaribbai ke ripo kpadjo nari kʉ: ‘Ma i kʉ ra nǎ ro si ná mukati’?” 43 Yesu ngʉngʉe logoti kpa dho: “Anibba ni kana ni nanga nu nari tso. 44 Ddikpa le ro ma nzá ddi ka ndi si ma dhi ngana ri, rie nga cho chongʉe ma, ná madzá Baba dhé ddá le ri ró, ndirigoti ma si kʉ fø le ga ya mwisho ddo dyina. 45 Bbanabi chulu ri ndingʉeni ɨ: ‘Kpa krʉ dho Yova* si kʉ longaddi.’ Ngbà rr Baba ndirigoti ngbà chu lo ná ndrŭ si si ma dhi ngana. 46 Føri na mana nga kʉ Baba nja ná ndrŭ ro kʉ thé ri, rie nga Mungu dhi ngana ro singʉe ná ke dhé nja ke ri ró, fø ke dhé nja Baba. 47 Bbʉbbʉ dhé ma ripo ni dho, u uri ná ke kʉ cho ró nŭnŭ di ná shinga na.

48 “Ma kʉ shinga dhi mukati. 49 Ngbà mai ni bbui nyongʉe mana ngødja nǎ ro, kpa chengʉeni che dhé. 50 Ro, i ri kʉ ra nǎ ro si ná mukati ndiro ddikpa le nyó ri b’lo ró nzɨ le dhe ró. 51 Ma kʉ ra nǎ ro si ná shi di ná mukati. Njati ddikpa le nyó fø mukati ró, le si di shi theinga dho; bbʉbbʉ dhé ma si bbʉ ná mukati kʉ ma ndí ndiro dz’ djó ndrŭ ba shinga d’e.”

52 Føro, Wayaudi ngʉ ddani ndima kana ɨ ndima ripo ro: “I ke ká ka ndi bbʉ ndi ndí ko nyó ngbaribbai?” 53 Yesu pongʉeri: “Bbʉbbʉ dhé ma ripo ni dho, njati ni nyó ndrŭ Ddù ndí ndirigoti ni jø ke ró ju nzá ró, ni nǎ nga kʉ shinga ro ri. 54 Njati ddikpa ke nyó ma ndí ndirigoti ke jø ma ró ju ró, fø ke kʉ cho ró nŭnŭ di ná shinga na ndirigoti ma si kʉ ke ga ya mwisho ddo dyina, 55 dhonalo ma ndí kʉ, bbʉbbʉ kʉ ná nyo ndirigoti ma ró ju kʉ, bbʉbbʉ kʉ ná jødha dhi ritsi. 56 Ddikpa le nyó ma ndí ndirigoti le jø ma ró ju ró, fø le tso gbani ma na ndirigoti ma tso gbani fø le na. 57 Ddiddi shi di ná Baba chongʉe ma ndirigoti ma di shi Baba djotsina nari bbai, ddikpa ke nyó ma ndí ró, fø ke si di shi ma djotsina. 58 Iga kʉ ná i ri kʉ, ra nǎ ro si ná mukati. Ri nga kʉ ni bbui nyongʉe nari na ddiddi ri, dhonalo ngbà mai kpa nyongʉe ri ro kpa chengʉeni ngodhé. Ro, njati ddikpa ke nyó i mukati ró, ke si di cho ró nŭnŭ.” 59 Fø lo ke pongʉe Kapernaumu nǎ sinagogi nǎ* ndi ngʉ longaddi ro.

60 Fø lo ke una bí kʉ ná kpa rrngʉe ná saa na, kpa pongʉeri ɨ: “I ke ti nari kʉ nzá tso ka ndi veni ná lo, nde, fø di ná lo ká ie ka ndi rr?” 61 Yesu d’ingʉe ri utso ndi unakpa nanga nunu fø lo djo ro, ke dhungʉeri kpa tso ɨ: “Fø lo ká bʉ ni thí bʉ? 62 Nde, njati ni njae ndrŭ Ddù dji anziro ndi ngʉe ná ngana nari ró, ká nidhó lo gʉ ka ndi die ngbaribbai? 63 Ri kʉ roho i adi shinga bbʉ ri, ro le ndí dzá njí ro nga kʉ ddikpa maddi ri. Ni dho ma d’ra ná fø lo kʉ roho ndirigoti shinga. 64 Ro, ni kana nja ndrŭ nzɨ fø lo ro u ri.” Bbʉbbʉ dhé, Yesu chungʉe nzɨ ndidhó lo u ná ndrŭ ma, ndi nanga si dzi ná ke ma na anziro dhé. 65 Føri goti ke pongʉeri ki: “Ri kʉ føri dho i ma poeri ni dho nari kʉ, ddikpa le ro ma nzá ddi ka ndi si ma dhi ngana ri, rie nga Baba dhé u ritso ndi dho ri ró.”

66 Føri dzá lo dho i ke una bí kʉ ná kpa ngʉngʉe ndima goti ndi ma bbangʉe ná ritsi dhi ngana ndirigoti kpa bbangʉe ke ulu ndima bbi nari tso bba. 67 Føro Yesu dhungʉeri ndi una 12 kʉ ná kpa tso: “Nde, ni i ká jiri ni rá nzá?” 68 Simoni Petro ngʉngʉe logoti: “Ko ká ka ko rá ie dhi ngana? Dhonalo nidhó i kʉ cho ró nŭnŭ di ná shinga dhi lo. 69 Ko uri u ndirigoti ko churi chu nari kʉ, ni kʉ Mungu dzá Takatifu kʉ ná Ke.” 70 Yesu pongʉeri: “Ma ká vʉe ni 12 nzá? Ro, ni kana ddikpa ke njini Diabolo bbai.”* 71 Fø lo na ke ngʉ loti djo nari ngʉe Yuda, føri ngʉe Simoni Iskariote dhi dduna dhonalo ke i ka ndi sie Yesu nanga dzi nì mai ndi ngʉe 12 kʉ ná kpa kana ddi ke ro.