Tito
1 I ri kʉ Paulo, Mungu dhó noke ndirigoti Yesu Kristo dhó cho le cho ná ke, gba ndidhó udha tso gbani Mungu vʉ ná ndrŭ dhó udha ma, Mungu na le chini nari ró d’yʉ ndi ná nga nǎ kosa kʉ ná bbʉbbʉ lochudha ma na na ro. 2 Ndirigoti ri d’yʉ ndi nzá ka ndi sha kali ná Mungu njingʉe cho ró nŭnŭ di ná shinga djo drrdrr ná ngab’odha dhi tsodha ró. 3 Ro, ke nganga vʉ ná saa na, ke lingʉeri ndidzá lo chuni ma dhona bbʉngʉeni ná lod’radha dhi njí chulu, kodhi Gødha ba Mungu jangʉe ná lo ró ro. 4 I barua ma ndí madzá bbʉbbʉ kʉ ná ngba Tito dho, ddi ko tso gbani ndi na udha kana ro:
Baba Mungu ma, kodhi Gødha ba Yesu Kristo ma na dhó ro si ná nzá tso ka ndi koe le djo ná zølo ma, ngoi ma na é ni na.
5 Ma bbae ni Krete na ndiro ni thɨ nzɨ bbi bblo* ná lo thika ndirigoti ni li wazee krʉ kʉ ná vile lu, ma jaeri ni dho nari bbai: 6 Ri é nzɨ djo ndrŭ chelo ti ná ke, ddikpa bbá isɨle kʉ ná ke, kedzá ri é ngbà uri ná nzø nga ndima dhó nyi kʉ che* ro ndirigoti nì ndima ngarr ro. 7 Bbʉbbʉ dhé, Mungu dzá dza djó nga nja ná ke inga ndrŭ dho chutso ddá ná ke dho ringani ndi é nzɨ djo ndrŭ chelo ti ná ke, nzá djǒ d’yu kpakpa ná ke, nzɨ nanga kani tse ná ke, nzɨ wa rɨ ná ke, nzɨ fudjo nji ná ke, nzɨ ndi kobe ne nga kʉ chø ná chu lu ná ke, 8 ro, ringani ke é lʉ kó ná ke, bblolo ji ná ke, nì lo nanga ne ná ke,* chølo dhi ke, chi kʉ ná ke, nì ndi tso cho ná ke, 9 ngbà chini bbo pli chi kʉ ná lo* na longaddidha dhi ufundi na ndi kʉ nari kana ná ke; ndiro ri kaka ke dho ke li ndrŭ kpakpa faida kʉ ná longaddidha chulu ndirigoti ke oó che kʉ ná lo ti fø longaddidha djo ná ndrŭ na d’e.
10 Dhonalo ni kana tsatsa ná kpa kʉ bí, nga na mana kʉ ná lo ndima ti ro, kali ndima sha ro, ro bbori krr lé le krr nari na ndima gba ndima tso ro. 11 Ringani le chi fø kpa tso chi dhonalo kpa familia lu kʉ ná ndrŭ dhó udha nanga ngbʉ, nzá ringani le ddi ná lo ndima ddi nari chulu ndiro ndima ba faida nga kʉ chø ná chu lu d’e. 12 Kpa kana ddikpa ke, kpadhó nabi nganga pongʉeri ɨ: “Krete nǎ ndrŭ e kali dhi ndrŭ dhé, tsó nǎ che kʉ ná zǎ ndirigoti nzá ji njí njidha ná ʉna dhi kpa.”
13 Føri kʉ bbʉbbʉ kʉ ná lo. Ri kʉ føri dho i, áo kpa na makali ndiro kpa é kpakpa udha kana d’e; 14 ndirigoti nzɨ kpa li ndima thí Wayaudi bbá ngɨ ma, bbabba bbʉbbʉlo ná kpa dhó yadha ma na djo ró. 15 Krʉ kʉ ná ritsi tserie tse ngbà tsetse ná ndrŭ dho. Ro, nzá tsetse ná ndrŭ ma, nga kʉ udha na ná ndrŭ ma na dho nzá ddikpa ritsi ro ma tserie ddi ri, dhonalo kpadhó ngaddidha ma, kpadhó zamiri ma na e nzá ndi tsetse ro. 16 Kpa rid’ra pʉlʉpʉlʉ nari kʉ ndima chu Mungu chu, ro kpa nji ná lo chulu i kpa gʉ ke gʉ dhonalo kpa kʉ o tss o ná ndrŭ ndirigoti nzɨ ngarr ná ndrŭ. Føri kina, kpa tso ro nzá uni bblo kʉ ná ddikpa njí dho maddi ri.