Marko

13 Hekalu nǎ ro Yesu ngʉ vʉ ro, ke unakpa kana ddikpa ke pongʉeri ke dho: “Mwalimu, anja ngbá ngatsi ma, afø dju ma, hekalu le chi nari ma na d’ani nari di!” 2 Ke pongʉeri ke dho: “Ni ká fø hekalu dzá bbonga nja nì? Iga nzɨ ddikpa dju ro ma si ma dju djo ddi nzá ndi glʉni ro ri.”

3 Yesu ngʉ di Mizeituni dhi ngøtsɨ djó ná nga nǎ ro hekalu ngʉ njani nja. Føro Petro ma, Yakobo ma, Yohani ma, Andrea ma na dhungʉeri ke tso nga nja ndrŭ kʉ ná ngana: 4 “Apori ko dho di, Fø lo ká si njini ngbá saa na, ndirigoti fø ritsi krʉ tso si d’ø nari ká ko si chu addu ró?” 5 Føro Yesu ngangʉe ri podha tso kpa dho: “Anidi krr, nzɨ ni bbari ddikpa le ma shá ni ro ddi. 6 Bí kʉ ná ndrŭ si kʉ si ma ró dho na ɨ ndima ripo ro: ‘Ma i kʉ ke,’ ndirigoti kpa si bí kʉ ná ndrŭ shasha. 7 Føri kina, ni si là dhi lo rr ndirigoti là djo ndrŭ loti nari rr ró, nzɨ ni bbari ni ronga tá; dhonalo fø lo dho ringani ndi njini njí, ro ngatso d’ø ná saa sie nzá ndi d’e si go ro.

8 “Dhonalo nja ndrŭ tsɨ si dani ndima nji là nja ndrŭ tsɨ tso ró, nja pidhinga si dani ndi nji là nja pidhinga tso ró, ndirigoti rɨ da nari si ngaba ddi ngana ndirigoti nja ngana, føri kina nyo tso si vʉni vʉ. Føri krʉ sie bbobbo kʉ ná nzadha tso ngani ri.

9 “Anib’o ni ronga, dhonalo ndrŭ si kʉ ni mba bba kalu kʉ ná tribinale nji ndirigoti ndrŭ si kʉ ni dhɨ sinagogi lu ndirigoti ndrŭ si ni mba guverner ma, pikpa ma na nji lu ma djotsina ndiro lo d’rani kpa dho d’e. 10 Føri kina ringani hwè lo-i d’rani ndrŭ tsɨ krʉ dho vi. 11 Tribinale na ndrŭ ni mba ná saa na, nzɨ ni bbari rid’o ni nanga ni si po ná lo dho, anipo fø saa na le si bbʉ ni dho ná lo thei dhonalo loti nari nga kʉ ni ri, ro ri kʉ roho takatifu. 12 Godhé, nja ke si ndidhi djona bbʉ le hwihwi, ngba dzá baba si ndidzá ngba bbʉ ndirigoti nzø si tsa ndima dhi gø dhi ndrŭ ro, ndirigoti ndima liri le che fø ndrŭ ché. 13 Krʉ kʉ ná ndrŭ si kʉ ni ndrondro ma ró dho djotsina. Ro, ngbà ve ngatso kpø mwisho djo ná ke si gødha ba.

14 “Ro, ni si ngasa ná nzá tsetse ná ritsi nja nzá ringaeni ri di ná ngana ndi tøni ro ró, (lo zø ná ke di lo utsod’idha na.) Yudea lú kʉ ná ndrŭ dho ri si ngani ndima nyinga ngøtsɨ djo. 15 Dza djó le chɨ ná ngana kʉ ná ke nzɨ thʉni ndi rá ndibbá adzá kʉ ná ritsi sø; 16 ndirigoti nza gʉ é ná ke dho nzá ringani ndi ngʉ ndi goti, ndi ró arugu rù dzidha dho ri. 17 Njedha sie lɨnga dhi isɨ ndrŭ ma, ba bbʉ nzø dho ná isɨ ndrŭ ma na dho fø saa na! 18 Anidi nganzi ndiro nzɨ nga ni nyi ná saa ra si grì dhi bi na ró. 19 Dhonalo fø saa na si ngaba nari sie nzá d’erie nga ro ba Mungu no nga ná nga djó ro kpø njʉnga djo ná mbudha, ndirigoti ri nzɨ ka si nga ki ro ba ri. 20 Fø ddo nanga Yova* ngʉe ngʉ nzá ró, ddikpa le ro ma nzá ddi gøe ri, ro ke ngʉ fø ddo nanga ngʉ vʉ ndi vʉ ná ndrŭ djotsina.

21 “Njati ddikpa ke pori ni dho, ‘Aninjari! Kristo kʉ iga’ inga, ‘Aninjari! Ke kʉ chaga’ ró, nzɨ ni u ri. 22 Dhonalo kali dhi Kristo kpari ma, kali dhi bbanabi ma na si kʉ si ndirigoti kpa si bbobbo ddù ma, ké ka ndi ke le nanga ná ritsi ma na nji ndiro ndima shá, ngbà ri ka ró vʉ le vʉ ná ndrŭ ma krʉ ddi d’e. 23 Føri dho, anib’o ni ronga. Ma po krʉ kʉ ná lo ni dho nzina.

24 “Ro, fø ddo na, mbudha da nari goti, dyi nyǒ djó nga si tɨtɨ, bi si ka ndi ká nari tso bbabba, 25 dyødyø si d’røni d’rø rakpa ró ro ndirigoti rakpa ró kpakpanga kpari si jaja. 26 Føri goti ndrŭ si ndrŭ Ddù si ndundu nǎ bbò kpakpanga ma, kadha ma na na nari nja. 27 Ndirigoti ke si ndidhó malaiká cho, ndima njú vʉ vʉni ná ndrŭ tso ddingana, ngø djó tho kʉ ná nga laidjó ro, dz’ tso d’ø ná ngana ro, kpø ra tso d’ø ná ngana.

28 “Anichu i lo figi dhi tsú dhó lo nǎ ro: Fø tsú lerr dzá jadda kʉ ná ri di ngʉ dde* ndirigoti ri bɨ maddi di tøtø ró, ni adi richu cho dyi kʉ chøchø. 29 Føri bbai, njati ni di fø lo krʉ njini nari nja ró, anichuri ke kʉ chøchø dzaitso ró. 30 Bbʉbbʉ dhé ma ripo ni dho, i gø nzɨ da nzá fø lo krʉ d’e njini ro ri. 31 Ra ma, dz’ ma na si dada, ro madzá lo ro nzɨ da ngbá dyi maddi ri.

32 “Fø ddo ma, fø saa ma na ro nzá ddikpa le ma chu ddi ri, ra nǎ malaiká ma nzá ddi, le Ddù ma nzá ddi, ro Baba ddiro dhé. 33 Anidi krr, anidi kere dhonalo ni nzá chu li le li ná saa ro ri. 34 Ri kʉ ddiddi d’i ngø na jiri ndi rá ná ke bba ndidhó dza ronga b’odha ndidhó njí dhi kpa dhona nari bbai. Ke bbʉ njí kpa kana nja ke ddiro dhona ndirigoti ke jari dzaitso ronga b’o ná ke di kere. 35 Føri dho, anidi krr dhonalo kʉ ni nzá chu dza dhi bboke ká si ngbá saa na nari ro ri; ke ká si ngasdjó, ke ká si kudjai nǎ, ke ká si økpa ngoni ro* inga bbʉtso kukú nari ro ri. 36 Ndiro ke si chʉ ró, nzɨ ke si ni ro ddo ni ddo ro d’e. 37 Ro, ni dho ma po ná fø lo ma po ndrŭ krʉ dho: Anidi kere.”