Roma
10 Le-djoi, ma thí nǎ ma ji ná lo ma, ma thí nǎ ro krʉ ma nzǐ Mungu tsó ná lo ma na kʉ, madzá bbu nǎ ndrŭ nganga ba gødha. 2 Kpa kʉ bbò ù na Mungu dzá njí dho nari dzá bbʉbbʉnga ma ka ma dhodho, ro kpa nzá famu Mungu ji ná lo ro d’ʉ ri. 3 Chø kʉ ná lo Mungu adi nja ná lo ro nzá kpa churi nari dzá lo dho, kpa ndima dhó yadha dyø; ná føri liri kpa nzɨ nga ro rr Mungu dhó chølo dhi yadha dho ri. 4 Dhonalo Kristo d’øngʉe Yadha tso d’ø. Kpadjo ddikpa ke dhǒ udha Kristo nǎ ró, fø ke adi zøni chølo dhi ke.
5 Musa ndingʉeri ɨ Yadha chulu le ba ná chølo djo: “Ddikpa ke di ngarr ri dho ró, ke si di shi ri chulu.” 6 Ro, udha le dho nari nǎ ro si ná chølo djo Mungu dzá lo pori ɨ: “Nzɨ di ripo ni thí nǎ ɨ, ‘Ra na ká ie ka ndi dji?’ føri kʉ ndiro ndi thʉ Kristo ki dz’ djo d’e, 7 inga ‘Abiso na ká ie ka ndi thʉ?’ føri kʉ, ndiro ndi gá Kristo che cheni ná ndrŭ kana ro d’e.” 8 Nde, ndi ndini ná lo ká pori ngbǎ? Lo kʉ ni kuso chøchø, ni nganga tso nǎ ndirigoti ni nganga thí nǎ.” Føri kʉ udha dhi “lo,” ko adi ndi d’ra ro. 9 Dhonalo njati ni pori ndrŭ krʉ nyǒ njí ni tso nǎ ro nari kʉ Yesu kʉ Bboke, ndirigoti ni uri u ni thí nǎ ro krʉ nari kʉ Mungu gangʉe ke che cheni ná ndrŭ kana ro ró, ni si gødha ba. 10 Ri kʉ fø dhonalo kʉ, ri kʉ le thí na i le adi udha dhǒ ndiro le é chølo dhi ke d’e ri. Ro, ri kʉ le tso na i le adi lo po ndrŭ krʉ nyǒ njí gødha badha dho ri.
11 Dhonalo ndi ndini ná lo pori: “Ke djo kʉ udha na ná ddikpa le thí ro ma nzɨ ddi bʉni ri.” 12 Muyaudi ma kana nga kʉ njonjonga ro Mugiriki na ri. Ko krʉ dhó Bboke kʉ ddikpa dhé. Ndirigoti ke adi ndi ró dho nzǐ ná ndrŭ krʉ tsotso kó ngadhi d’ya ro. 13 Dhonalo “Yova* ró dho nzǐ ná ndrŭ krʉ si gødha ba.” 14 Nde, føro mai, kpa ká ka ndima nzi ke ró dho ngbaribbai, kpa é udha na ke djo nga ró? Ndirigoti kpa ká ka ndima é udha na ke djo ngbaribbai, rie nzá kpa d’erie lo ro rr ke djo ri ró? Nde, kpa ká ka ndima rr lo ke djo ngbaribbai, nzá ddikpa ke d’ralo d’ra kpa dho ró? 15 Ndirigoti kpa ká ka ndima d’ralo ngbaribbai, rie nzá le chó ndima cho ró? Ri kʉ ddiddi ndi ndini ná lo pori ná i ri bbai: “Hwè lo-i d’ra bblolo djo ná ndrŭ kó kʉ bbo ndi d’ani ro!”
16 Ri nga kʉ kpa krʉ i rrngʉe nga hwè lo-i dho ri. Dhonalo Isaya pori: “Yova,* ko dhó ro ndima rr ná lo ká ie ma u?” 17 Føri dho, udha adi si rr le rr ná lo nǎ ro ndirigoti rr le rr nari kʉ Kristo djo kʉ ná lo. 18 Ro, ma ka ma dhuri ɨ Israeli djo, kpa ká bangʉe lo ndima rr ná chu ro ngbà? Ngbao. Bbʉbbʉ dhé, ndi ndini ná lo pori: “Kpa chu singʉe dz’ djolu gble ndirigoti kpa d’ra ná lo dz’ djó dada pli kʉ ná ngalu kʉ ná ndrŭ ma krʉ rrngʉe rr.” 19 Ma dhuri ki, nde, Israeli ká famungʉe fø lo nzá? Ya kwanza Musa ngʉ logoti ɨ: “Ma si rili ni njí dda nga kʉ ndrŭ tsɨ ná ndrŭ na; ndirigoti ma si rili ni njí thø rr kʉ ná ndrŭ tsɨ ro.” 20 Føri goti Isaya pori nga nǎ do ro ɨ: “Nzɨ ngʉ ma ro nene maddi ná ndrŭ i bangʉe ma; ndirigoti nzɨ ngʉ ma ro dhúdhu maddi ná ndrŭ i chungʉe ma.” 21 Ro, ke pongʉeri Israeli djo ɨ: “Dyina blii ma ma thó dda nzɨ ngarr ndirigoti kpakpa djǒ d’yu ná ndrŭ tsɨ dhi ngana.”