Matayo

11 B’lo Yesu bbʉ lojadha ndi una 12 kʉ ná kpa dho nari goti, ke rangʉe ra føga ro, ke rangʉe longaddi ndirigoti lod’ra fø ngø nǎ vile lu.

2 Ro, Yohani rrngʉe Kristo ngʉ nji ná lo prizo nǎ ndi kʉ ná nga nǎ ro ná saa na, ke chongʉe ndi unakpa, 3 kpa rá ridhu ɨ ke tso: “Ni i ká kʉ sie si ná ke inga ri ká ngani ko b’o nja d’i ke?” 4 Yesu ngʉngʉe logoti ɨ kpa dho: “Anira ni d’ra rr ni rr ná lo ma, nja ni nja ná lo ma na Yohani dho: 5 Kpadjo nga nyǒ kʉ ná ndrŭ nyǒ nganja, tsu kó tsu ná ndrŭ bbibbi, korøkorø dhi ndrŭ gøgø, nga bɨ kʉ ná ndrŭ ngarr, che cheni ná ndrŭ gaga ndirigoti njedha dhi ndrŭ dho hwè lo-i d’rani. 6 Hwè na kʉ nari kʉ, nzá ba ndi thí ka ndi bʉ ná lo ro ma nǎ ná ke.”

7 Ra kpa ngʉ ra ná saa na, Yesu ngangʉe lotidha tso birobiro kʉ ná ndrŭ dho Yohani djo, ɨ ndi ripo ro: “Ni ká rae addu nja ngødja na? Ni ká rae vʉvʉ wɨ nanga ja nari nja?” 8 Ni ká rae addu nja nde? Ni ká rae bblo kʉ ná rù tho ná ke nja? Dhonalo kʉ, bblo kʉ ná rù tho ná ndrŭ e pikpa bba lu. 9 Nde, d’ʉ ká ni rae addu nji? Ni ká rae nabi nja? Bbʉbbʉ dhé, ma ripo ni dho, ni njae dada nabi djolu ná ke. 10 Føri kʉ ɨ djo ri ndingʉeni ná ke: ‘Anja! Ma madzá lo-i mba ná ke chó ni njí, nja ndi thɨ chu nanga ni dho ni njí d’e.’ 11 Bbʉbbʉ dhé, ma ripo ni dho, isɨle chulu gøni ná ndrŭ kana nga kʉ Yohani Mubatizaji djolu da ná ndrŭ ro ri. Ro, ra nǎ Pidhinga nǎ sese pli kʉ ná le dada ke djolu. 12 Yohani Mubatizaji singʉe ná nga djó ro kpø njʉnga djo, ndrŭ kpakpanga nji ndima tso si ra nǎ Pidhinga djo, ndirigoti nì kpakpanga nji ndima tso si ri djo ná ndrŭ ri baba. 13 Dhonalo Bbanabi ma, Sheria ma na krʉ tingʉelo kpø Yohani djo. 14 Ni uri u ma inga nzá ma ró, ke i kʉ ‘sie si ná Eliya.’ 15 Nì bɨ kʉ ná le rr fø lo rr.

16 “I gø ká ma ka ma ddi ie na? Kpa kʉ ddiddi soko rɨna di ná nzø bbai, ndima lai nzø ndima nzi, 17 ɨ ndima ripo ro: ‘Ko mɨ li ni dho ro, ni ro beni nzá; ko dzzdzz ro, ni b’ɨ ni badjo ro d’od’o dho nzá.’ 18 Føri bbai Yohani si ro, ke e nga ma nyo nzɨ, ke e jødha dhi ritsi ro ma jø nzɨ, ro føro ndrŭ pori, ‘fø ke nǎ kʉ gó.’ 19 Ro, ndrŭ Ddù si ro, ke nga ma nyonyo, ke jødha dhi ritsi ma jøjø, ro ndrŭ pori: ‘Anja! Ri kʉ bbo nganyo ná ke ndirigoti bbo wa jø ná ke, ke kʉ kitas tso nju ná ndrŭ ma, chenga dhi ndrŭ ma na dhó kau.’ Ro, nyodyu le adi nja ndidzá njí* ró.”

20 Føri goti ke ngangʉe ndidhó ddù ró binga ndi njingʉe nǎ ná vile kpari nǎ ndrŭ na ndi o nari tso dhonalo kʉ, ndrŭ nzá lengʉeni ri, ke pongʉeri: 21 “Njedha ni dho, Korazini! Njedha ni dho, Betsaida! dhonalo ni bbá njini ná ddù kpari njieni Tiro nǎ ndirigoti Sidoni nǎ ró, fø bbagʉ ndrŭ eé drrdrr ndima leni saki ndima tho ndima ro ndirigoti hu nǎ ndima di nari chulu ro. 22 Ma ripo ni dho, Lod’idha dhi ddo dyina Tiro ma, Sidoni ma na dhó lo ro sie bblo nidhó ri djolu. 23 Ndirigoti ni, Kapernaumu, ni ká riddi ni si ngbeni kpø ra na? Ni le si kʉ thʉ kpø Kabuli* na, dhonalo ni nǎ njini ná fø ddù kpari le njie Sodomu nǎ ró, fø bba eé godhé kpø njʉnga djo. 24 Ro, ma ripo ni dho, Lod’idha dhi ddo dyina Sodomu dhó lo ro sie bblo nidhó ri djolu.”

25 Fø saa na Yesu pongʉeri: “Ma madha bbʉ ni dho pʉlʉpʉlʉ, Baba, ra ma, dz’ ma na dhi Bboke, dhonalo ni ru i lo nyodyu dhi ndrŭ ma, bbo zønga ná ndrŭ ma na ró; ndirigoti ni dho fø lo rere nzø dho. 26 Kɨɨ Baba, bbʉbbʉ dhé, ni njangʉeri ri kʉ bblo ni njiri fø. 27 Madzá Baba bbʉ krʉ kʉ ná ritsi ma dhó. Bblo pli chu Ngba ná le ro nga kʉ ri njati rie nga Baba dhé ri ró, ndirigoti bblo pli chu Baba ná le ro ma nga ddi kʉ ri, rie nga Ngba dhé ndirigoti Ngba jiri ndi dhǒ Baba dho ná ke dhé ri ró. 28 Anisi ma dhi ngana, ni nje njeni ndirigoti li djó no o ná ndrŭ ndirigoti ma si le ronga chʉdha bbʉ ni dho. 29 Anid’u madzá kǒbbó* ni djo ndirigoti anibbari ma ddi longa ni dho dhonalo ma kʉ djø le djøni nari na ndirigoti nyenyenga dhi le thí na ndirigoti ni* si le ronga chʉdha ba. 30 Dhonalo madzá kǒbbó* d’udha kʉ sʉsʉ ndirigoti ma djó no o dhʉdhʉ.”