Luka

14 Ddikpa cha Sabato dyina Yesu rangʉe nganyo Bbafarisayo djó bbobbonga kana ddikpa ke bba ndirigoti kpa ngʉ ke nja chøø. 2 Ndirigoti anja! Føga ngʉe dda lini le ndí na dho ná dhe* ngʉe ró ná ke. 3 Føro Yesu dhungʉeri bbo chu yadha ná kpa ma, Bbafarisayo ma na tso: “Ri tso ká uni u inga nzá le gø ndrŭ Sabato ddo dyina?” 4 Ro, kpa gongʉe ddi. Føro ke løngʉe fø ke ronga ndirigoti ke gøngʉe ke gø nari goti ke bbangʉeri ke rara. 5 Føri goti ke pongʉeri kpa dho: “Ni kana ddikpa ke dzá ngba inga kedhó tsí d’e bbù na ró, ke ká ka ndi tu ri bbù nǎ ro Sabato dyina thei nzá?” 6 Kpa dho nzá fø logoti ro ngʉngʉeni ri.

7 Nyo dho le nzingʉe ná kpa ngʉ anziro kʉ ná didha dhi nga ne nari ndi nja ro, ke pongʉeri kpa dho ɨ: 8 “Njati ddikpa ke nzi ni ndoa dhi fete dho ró, nzɨ ra di bblo pli kʉ ná ngana, dhonalo njaro ke nzie ni djolu da ná ke ro maddi. 9 Føro ni aro nzie ná ke si ripo: ‘Abba ni di ná nga i ke dho.’ Føro ni si ngʉ aluti kʉ ná ngana b’lo do pa ni djó ro. 10 Ro, njati le nzi ni fete dho ró, aradi aluti kʉ ná ngana, føro ni nzie ná ke si ró, ke si ripo: “Madzá kau, adani ni ra di bblo pli kʉ ná ngana.” Føro ni si heshima ba nzi le nzie ná ndrŭ krʉ nyǒ njí. 11 Dhonalo ngbe ndi ngbé ná ke le si thʉthʉ ndirigoti thʉ ndi thʉ ná ke le si ngbengbe.”

12 Føri goti ke pongʉeri ndi nzingʉe ná ke dho ɨ: “Rie dyinanga dhi nyo inga ngasdjó nga dhi nyo dho ni ndrŭ nzǐ ri ró, nzɨ nzi nidhó bbakau ma, ni djoi ma, nidhó familia nǎ ndrŭ ma, ni di ná ngana kʉ ná mbø dhi ndrŭ ma na. Njati ni njiri fø ró, kpa ka ndima si ni ro nzinzi luti, ná føri sie ni kobe kpa bbʉ ri. 13 Ro, rie fete dho ni ndrŭ nzǐ ró, anzi njedha dhi ndrŭ ma, tsú ronga ro tsu ná ndrŭ ma, tsú kó tsu ná ndrŭ ma, nga nyǒ kʉ ná ndrŭ ma na; 14 føro ni sie hwè na, dhonalo fø kpa bbʉ ni dho ná ritsi ro nga kʉ ri, ndirigoti ni si ni kobe ba chølo dhi ndrŭ dhó gadha dhi saa na.

15 Fø lo ndi rr ro, nga ngʉ nyo ná ndrŭ kana ddikpa ke pongʉeri: “Hwè na kʉ nari kʉ Mungu dhó Pidhinga nǎ nganyo* ná ke.”

16 Yesu pongʉeri ke dho: “Ddikpa ke ringʉe nyo* bbo ndirigoti ke nzingʉe ndrŭ bí ri dho. 17 Nyo dhi saa na ke chongʉe ndidhó njí dhi ke ndi rá ripo nzi ndi nzingʉe ná ndrŭ dho: “Anisi dhonalo krʉ ritsi kʉ tayari ró.” 18 Ro, kpa krʉ ngangʉe ddiddi kʉ ná zø kodha tso. Ya kwanza ke pongʉeri: “Ma dzie ddikpa nza nari ringani ma rá njanja ró, kirikiri anji ma zø nji.” 19 Ndirigoti nja ke pongʉeri: “Ma dzie tsí kumi, ná føri na ma ra njí mbu kpadjo ró, kirikiri anji ma zø nji.” 20 Godhé, nja ke pongʉeri: “Ma kø dhɨ wø nari dho, ma ro nzá ka ma si følu ri.” 21 Føro njí dhi ke rangʉe fø lo d’ra krʉ ndidzá bboke dho, ná fø lo ke rr ro, ke nanga kangʉeni bbo, ndirigoti ke pongʉeri ndidhó njí dhi ke dho: “Ara tse vile nǎ bbobbo chu ma, nini chu ma na lu ndirigoti anzi njedha dhi ndrŭ ma, tsú ronga tsu ná ndrŭ ma, nga nyǒ kʉ ná ndrŭ ma, tsú kó tsu ná ndrŭ ma na iga.” 22 Njí dhi fø ke ngʉ ná saa na ke pongʉeri: “Bboke, ni poe ná fø lo ma nji b’lo, ro nga ma godhé.” 23 Føro fø bboke pongʉeri ndidhó njí dhi ke dho: “Ara bbobbo chu ma, nini chu ma na lu ndirigoti anzi ndrŭ kpakpanga na ndrŭ si ndiro madzá dza nanga lɨlɨ d’e. 24 Dhonalo ma ripo ni dho, fete dho ma nzie ná ndrŭ kana ddikpa le ma nzɨ ddi mbu madhó nyo dzi ro ri.

25 Føri goti birobiro kʉ ná ndrŭ ngʉ ra ke ulu ná saa na, ke lengʉe ndi thika ndrŭ dhi ngana ndirigoti ke pongʉeri ɨ: 26 “Njati ddikpa ke si ma dhi ngana ro, ke ndro* ndidzá baba ma, ndidzá mama ma, ndibbá le ma, ndidzá nzø ma, ndi djoi ma, ndi vei ma, ndirigoti bbʉbbʉ dhé ndi nganga dhó shinga* maddi nzá ró, fø ke nzá ka ndi é ma unake ri. 27 Njati ddikpa ke d’u ndidhó nzadha dhi tsú* nzá ndirigoti ke si ma ulu nzá ró, fø ke nzá ka ndi é ma unake ri. 28 Loroji na, njati ni kana ddikpa ke ji ndi chi ddikpa bbo ngbeni ná dza ró, ká ke adi di gʉna vi nzɨ ndiro ndi nja ri ká ka ndi kó mbø thɨ ndirigoti ndi nja ndidhó ká kʉ mbø nì ma ritso d’ya ná ngatsi nari d’e? 29 Ke njiri fø nzá ró, ke ka ndi li ri dherr i ngbà, ro ke nzá ka ndi d’ya ri tso ri, føro ri nja ná ndrŭ krʉ ka ndima nga ke gbodha tso, 30 ɨ ndima ripo ro: ‘I ke ngae dza chidha tso i nga, ro ri tso d’yadha i gʉ ke tso ri gʉ.’ 31 Inga njati ddikpa pi jiri ndi rá lɨ nji nja pi tso ro ró, ke ma ká ka ndima di gʉna vi nzá ndi dho adi shauri bbʉ ná kpa ma na, ndiro ndi nja ndi ká ka ndi rá hwini ngbà ndidhó 10 000 kʉ ná bbasødda na, 20 000 kʉ ná bbasødda na si ndi tso ro ná ke na nari d’e? 32 Bbʉbbʉ dhé, ke njari ri ka nzɨ ró, godhé ke tso ro si ná pi kʉ da ro, ke adi lo-i mba ná kpa chó ndiro ndima njí ngoi d’e. 33 Føri bbai, ddikpa ke bbá ndidhó ritsi krʉ nzá ró, fø ke nzá ka ma unanga dho ri.

34 “Bbʉbbʉ dhé, kʉ e bblo pli. Ro, njati ri vi ndidzá wáwánga vi ró, ridzá wáwánga ki ká ka ndi ngʉ ngbaribbai? 35 Føro nga ri ki ro kʉ faida dz’ dho inga mboleo dho ri; føri dho ndrŭ adi ri d’rød’rø. Nì bɨ kʉ ngarrdha dho ná le rr fø lo rr.”