Yohani

8 12 Føro, Yesu pongʉeri kpa dho: “Ma kʉ dz’ djó kadha. Ddikpa ke dyø ma ró, fø ke ro nzɨ bbi tɨtɨnga lú ri, ro ke si shinga dhi kadha ba.” 13 Føro Bbafarisayo pongʉeri ke ni: “Ni lod’ra ni djo ni niro; føri dho ni d’ra ná føri nga kʉ bbʉbbʉlo ri.” 14 Yesu ngʉngʉe logoti kpa dho: “Rie ma maro ma, ma lod’ra ma djo ri ró, ma d’ra nari kʉ bbʉbbʉlo dhé, dhonalo ma chu ma ká singʉe ngbaga ro nari chu ndirigoti ma ká ra ngbaga nari maddi. Ro, ni nzá chu ma ká singʉe ngbaga ro ndirigoti ma ká ra ngbaga nari ro maddi ri. 15 Ni lod’i ndrŭ dhó yadha ró ro, ro ma nzɨ lo ro d’i ddikpa le djo maddi ri. 16 Ro, ri uri ma d’ilo ma ró, madhó lod’idha kʉ bbʉbbʉ, dhonalo ma nga kʉ ddiro ri, ro cho chongʉe ma ná Baba kʉ ddironga ma na. 17 Føri kina, nidhó Yadha nǎ ri ndini ɨ: ‘Aro kʉ ná dimu po nari e bbʉbbʉ kʉ ná lo.’ 18 Ma lod’ra ma djo ma maro, føri kina cho chongʉe ma ná madzá Baba ma lod’ra ma djo ddi.” 19 Føro kpa dhungʉeri ke tso: “Nidzá Baba ká kʉ ngbaga?” Yesu ngʉngʉe logoti: “Ni nzá chu ma ro ri, madzá Baba ma ni chu nzá ddi. Njati ni chue ma chu ró, ni ka ni chue madzá Baba maddi.” 20 Fø lo ke pongʉe mali le ngʉ adi nzǐ ná ngana, hekalu nǎ ke ngʉ longaddi ro. Ro, ddikpa le ma nzá ddi løngʉe ke ro ri, dhonalo kedhó saa ro nzá d’engʉe ka go ri.

21 Føri goti ke pongʉeri ki: “Ma rara ma dho, ndirigoti ni si kʉ ma nene; ro ni si cheni che nidhi chenga na. Ma ra ná ngana nzá ni ro ka ni si ri.” 22 Føro Wayaudi ngangʉe ɨ ndima ripo nari tso: “I ke ká ji ndi hwi ndi hwi nzɨ? Dhonalo ke ripo: ‘Ma ra ná ngana nzá ni ro ka ni si ri.’” 23 Ke pongʉeri ki kpa dho: “Ni kʉ igʉ ndrŭ, ro ma kʉ arø ke; ni kʉ i dz’ djó ndrŭ, ro ma nga kʉ i dz’ djó ke ri. 24 Ri kʉ føri dho i ma ripo ni dho: Ni si cheni che nidhi chenga na. Dhonalo njati ni u ma ripo ma kʉ ie ma nari nzá ró, ni cheni che nidhi chenga na.” 25 Føri goti kpa ngangʉe ri dhudha tso ke tso: “Ni ká kʉ ie? Yesu ngʉngʉe logoti: “Ni na ká ma lo kpali ma ti addudho? 26 Ni djo ma ka ma po ná lo ma, ma ka ma d’i ná lo ma na kʉ bí. Bbʉbbʉ dhé cho chongʉe ma nari kʉ bbʉbbʉlo dhi Ke, ndirigoti i dz’ djó ma d’ra nari kʉ kedhó ro ma rr ná lo nganga.” 27 Ke ngʉ loti kpa dho Baba djo nari ro nzá kpa famungʉeri. 28 Føro Yesu pongʉeri kpa dho: “Ni si kʉ ndrŭ Ddù ngbe røna nari goti i ni ve si richu nari kʉ, ma kʉ ma pongʉeri ie ma ma kʉ ná ke, ndirigoti ma nzɨ adi ddikpa lo ro ma nji ddi ma chu na ri, ro ma adi ti nari kʉ madzá Baba ddi ma dho ná lo dhé. 29 Føri goti cho chongʉe ma ná ke kʉ ma na nì; ke nzá bba ma ro ddiro ri, dhonalo krʉ ddo ró ma adi ke nyǒ tho ná lo nji.” 30 Fø lo ke ngʉ ti ná saa na, bí kʉ ná ndrŭ ungʉe ke u.

31 Føro Yesu pongʉeri ki ngbà ungʉe ndi ná Wayaudi dho ɨ: “Njati ni di madzá lo nǎ ngbà ró, ni kʉ bbʉbbʉ dhé ma unakpa. 32 Ni si bbʉbbʉlo chu ndirigoti bbʉbbʉlo si kʉ ni kloklo.” 33 Kpa ngʉngʉe logoti ke dho: “Ko kʉ Abrahamu nǎ gø ndirigoti ko ro nzá d’erie ngʉ ie dhó nokpá maddi ri. Nde, addu dzá lo dho i ká ni ripo nari kʉ: ‘Ni si kloni klo’?” 34 Yesu ngʉngʉe logoti kpa dho: “Bbʉbbʉ dhé ma ripo ni dho, chenga di nji ná le e chenga dhi nokpa. 35 Føri djolu pli, nokpa nzɨ adi di adzá ndrŭ kana theinga dho ri, ro adzá kpetsi ngba i adi di theinga dho nì. 36 Føri dho, adzá kpetsi ngba klo ni ró, ni kloni bbʉbbʉ dhé. 37 Ma chu ni kʉ Abrahamu nǎ gø nari ngbà. Ro, ni rine ni hwi ma hwi dhonalo kʉ, madzá lo ro nzɨ ra anzi ni kana ri. 38 Ma ti nari kʉ madzá Baba ma na ko ngʉe ro ma njangʉe ná lo, ro ni nji nari kʉ nidhi Baba dhó ro ni rrngʉe ná lo.” 39 Kpa ngʉngʉe logoti: “Kodhi baba kʉ Abrahamu.” Yesu pongʉeri kpa ni: “Njati ni ée Abrahamu dzá nzø ró, ni ka ni njie Abrahamu njingʉe ná njí. 40 Ro, kpadjo ni rine ni hwi ma hwi, ma i d’ra Mungu dhó ro ma rr ná bbʉbbʉlo ni dho ro. Abrahamu nzá njingʉe fø di ná lo ro ri. 41 Ni nji nari kʉ nidhi baba dhó njí.” Kpa ngʉngʉe logoti: “Ko nga kʉ tekanø* le ba ná nzø ri; kodhi Baba kʉ ddikpa dhé, Mungu.”

42 Yesu ngʉngʉe logoti kpa dho: “Njati nidhi Baba ée Mungu ró, ni ka ni jie ma ji, dhonalo ma singʉe ke dhi ngana ro, ro i ma kʉ ena. Ma nzá si ma chu na ri, ro ke i chongʉe ma. 43 Ni ká ma po ná lo famu nzɨ addudho? Ri kʉ ni nga kʉ tayari madhó lo rrdha dho ri nari dho. 44 Ni si nidhi baba Diabolo dhó ro, ndirigoti ni rine ni njí nidhi baba ji ná lo. Fø ke ngʉe ndrŭ che ná ke ndi nga ritso ná nga djó ro dhé, ndirigoti ke ro nzá tøngʉeni chi bbʉbbʉlo kana ri, dhonalo bbʉbbʉlo ro nga e ke nǎ ri. Kali ke sha nari na ke adi ngbà di ná ke ma ndi nganga kʉ nari dhǒ, dhonalo ke kʉ kali dhi ke ndirigoti kali dzá baba. 45 Ro, ma bbʉbbʉlo d’ra ni dho nari dho, ni nzɨ ma ro uri. 46 Ni kana ie i ká ka ndi pori ma nji chenga? Nde, rie bbʉbbʉlo ma po ni dho ri ró, føro ká ni ma u nzɨ addudho? 47 Mungu dhi nga nǎ ro si ná ke adi Mungu tso nǎ lo rrrr. Ro, ni ri rr nzɨ dho nari kʉ, ni nzá si Mungu dhó ro ri.

48 Wayaudi dhungʉeri ke tso: “Ko pori, ‘Ni kʉ Samaria nǎ ke ndirigoti ni nǎ kʉ gó, ná føri na ká ko sha kali’?” 49 Yesu ngʉngʉe logoti: “Ma nǎ nga kʉ gó ro ri, ro ma madha bbʉ Baba dho, ro ni ma be pá. 50 Ma nzɨ kadha ne ma dho ma maro ri, ro Baba i jiri ma ba kadha ndirigoti ke i kʉ lod’i ná ke. 51 Bbʉbbʉ dhé ma ripo ni dho, njati ddikpa ke rrnga madzá lo dho ró, fø ke nzɨ dhe ro nja pá maddi ri.” 52 Wayaudi pongʉeri ke ni: “Kpadjo i ko uri gʉ u nari kʉ, ni nǎ gó kʉ nì. Abrahamu ma, bbanabi ma na krʉ cheni che, ro i ni ripo, ‘Njati ddikpa ke rrnga madzá lo dho ró, fø ke nzɨ dhe ro nja pá maddi ri.’ 53 Ni ká dada kodhi baba Abrahamu, dhe dhengʉe ná ke djolu? Bbanabi ma krʉ cheni che, ro ni ká ni d’ya ie?” 54 Yesu ngʉngʉe logoti: “Njati rie ma maro ma kadha bbʉ ma dho ri ró, fø kadha na mana ro nga kʉ ri. Ro, ma dho kadha bbʉ nari kʉ madzá Baba, nidhi Mungu ni nzǐ ná ke. 55 Ro, ni nzá chu fø ke ro ri, ro ma i chu ke chu. Ndirigoti njati ma di ripo ma chu fø ke nzá ró, føro ma kʉ kali dhi ke, ni bbai. Ro, ma chu ke chu ndirigoti ma adi ngarr rr kedzá lo dho. 56 Nidhi Baba Abrahamu njingʉe hwè bbo madzá ddo ndi si nja ná fø ngab’odha na ndi kʉ nari dho. Ndirigoti ke njangʉe ri nja nari goti ke bangʉe hwè bbo. 57 Wayaudi pongʉeri ke ni: “Nidhó cho ro d’e si 50 kpali ma nzá, ro i ni njangʉe Abrahamu nja?” 58 Yesu ngʉngʉe logoti kpa dho: “Bbʉbbʉ dhé ma ripo ni dho, Abrahamu gøni nari njí, ma ngʉe nì dhé.” 59 Føro kpa søngʉe dju ndima bú na ke d’e; ro Yesu rungʉeni ru ndirigoti ke rangʉe ra hekalu nǎ ro.