Yohani

5 Føri goti Wayaudi bbá fete ddo singʉe ro, Yesu djingʉe Yerusalemu na. 2 Ro, Yerusalemu nǎ, chembø dhó dzaitso ró ngʉe cho tso le cho ná dda,* ndi ró mbʉ kʉ ná tødha na, ná fø dda le ngʉ adi nzǐ Kiebrania nǎ Betzata. 3 Fø tødha tsena i birobiro kʉ ná dhe nji ná ndrŭ ma, nzɨ nyǒ nganja ná ndrŭ ma, tsutsu ná ndrŭ ma, ddo ndí ró nja sehemu ro ddoni* ná ndrŭ ma na ngʉ adi ra yi. 4* —— 5 Ro, føga ngʉe ná ddikpa ke dhe njingʉe cho 38 b’lo. 6 Fø ke yi føga nari ndi nja ndirigoti ke dhe nji bicha b’lo nari ndi chu ro, Yesu dhungʉeri ke tso: “Ni ká jiri ni gø ngbà?” 7 Dhe ngʉ nji ná fø ke pongʉeri: “Bboke, cho tso le cho ná i dda nanga di ngbʉni ná saa na ka ndima li ma ri na ná ndrŭ ro ngaeri. Ro, ma di rine ma tsu ri na ná saa na, nja ke adi si tsu ma njí thei.” 8 Føro, Yesu pongʉeri ke dho: “Adani, adzi ni tsena ra ndirigoti abbi.” 9 Føro thei fø ke ró dhe gøngʉe, ke dzingʉe ndi tsena ra ndirigoti ke ngangʉe bbidha tso.

Ri ngʉe Sabato ddo dyina. 10 Føro Wayaudi ngangʉe ri podha tso gø ró dhe gøngʉe ná fø ke ni: “Njʉ kʉ Sabato ddo nari dho, ni dho nzá ri tso uni ni d’u ra ri.” 11 Ro, ke ngʉngʉe logoti kpa dho: “Ma ró dhe gø ná ke i pori ma ni, ‘Adzi ni tsena ra ndirigoti abbi.’” 12 Kpa dhungʉeri ke tso: “Ni dho pori, ‘Adzi ni tsena ra ndirigoti abbi’ nari ká kʉ ie?” 13 Ro, ke nzá chungʉe ri ká ngʉe ie nari ro ri, dhonalo Yesu vingʉe vi føga ngʉe ná birobiro kʉ ná ndrŭ kpari kana.

14 Føri goti Yesu ma njungʉe ke na hekalu na ro, Yesu pongʉeri ke dho: “Kpadjo ni gø b’lo ró, nzɨ ni nji chenga ki ndiro nzɨ fønga djolu kʉ che pli ná lo ni ba ró.” 15 Føro ke rangʉe rid’ra Wayaudi dho nari kʉ, ndi gøe nari kʉ Yesu. 16 Ri kʉ fønga djó ro i Wayaudi ngangʉe Yesu nzadha tso ri, dhonalo ke ngʉ adi fø lo nji Sabato ddo na. 17 Ro, ke ngʉngʉe logoti kpa dho: “Madzá Baba adi njínji kpø kpadjonga djo ndirigoti ma rá anzi dhé njí njidha na.” 18 Fø lo dho i Wayaudi ngʉ ri gʉ ne pli ndima hwi ke; ri nga ngʉe ke ngʉ Sabato dyø nzɨ nari kpali djó dhé ri, ro ke ngʉ Mungu nzǐ ndidzá Baba nganga nari djó maddi, ná føri na ke ngʉ ndi nji ddiddi kʉ Mungu na ri.

19 Føro Yesu ngʉngʉe logoti kpa dho: “Bbʉbbʉ dhé ma ripo ni dho, le Ddù nzɨ adi ddikpa lo ro ma nji ddi ndi nganga dhó ngaddidha ró ro ri. Ro, ke adi nji nari kʉ nja ke nja ledzá Baba ndi nji ro ná lo dhé. Dhonalo fø Ke nji ná lo krʉ le Ddù nganga maddi adi nji føri bbai. 20 Bbʉbbʉ dhé, Baba ji le Ddù ji ndirigoti ke adi ndi nganga nji ná ritsi krʉ dhodho le Ddù dho ndirigoti ke si i njí djolu da ná ri dho le Ddù dho ndiro ni nanga keni ke d’e. 21 Dhonalo ddiddi ledzá Baba adi che cheni ná ndrŭ gá ndirigoti ndi bbʉ shinga kpa dho nari bbai, le Ddù maddi adi shinga bbʉ ndi jiri ndi bbʉ ri dho ná ndrŭ dho. 22 Dhonalo Baba nzɨ adi lo ro d’i ddikpa le djo maddi ri, ro ke bbʉ lod’idha dhi bbonga krʉ le Ddù dhó, 23 ndiro krʉ kʉ ná ndrŭ bbʉ heshima le Ddù dho, ddiddi ndima adi heshima bbʉ Baba dho nari bbai d’e. Ddikpa ke bbʉ heshima le Ddù dho nzá ró, fø ke nzá bbʉ heshima cho chongʉe ke ná Baba dho maddi ri. 24 Bbʉbbʉ dhé ma ripo ni dho, ddikpa ke u ma d’ra ná lo ndirigoti ke u cho chongʉe ma ná ke ró, fø ke kʉ cho ró nŭnŭ di ná shinga na ndirigoti ke djo nzɨ lo ro d’ini ri, ro ke da dhe nǎ ro thei shinga nǎ.

25 Bbʉbbʉ dhé ma ripo ni dho, saa si nì, ndirigoti ri kʉ kpadjo, ná fø saa na che cheni ná ndrŭ si kʉ Mungu Ddù chu rr ndirigoti ngbà rr ri ná ndrŭ si di shi. 26 Dhonalo ddiddi Baba kʉ shinga* na ndi nǎ ndi ndiro nari bbai, ke liri le Ddù maddi é shinga na ndi nǎ ndi ndiro. 27 Ndirigoti ke bbʉ bbonga ke dho ke d’ilo dhonalo kʉ ke kʉ ndrŭ Ddù. 28 Nzɨ ni bbari ni nanga keni fø lo dho dhonalo saa si nì, ná saa na nì nga noni ná kabuli nǎ kʉ ná ndrŭ krʉ si ke chu rr, 29 ndirigoti ndrŭ si vʉvʉ, bblolo njingʉe ná ndrŭ si ga ndima ba shinga d’e, ro chelo ngʉ adi nji ná ndrŭ si ga lod’idha dho. 30 Ma nzá ka ma njí ddikpa lo ro maddi ma nganga dhó ngaddidha ró ro ri. Ma adi lod’i ma rr nari nganga bbai ndirigoti madhó lod’idha e chøø, dhonalo ma nzɨ adi rine ma njí ma ji ná lo ri, ro cho chongʉe ma ná ke ji ná lo.

31 “Njati ma di lod’ra ma djo ddiro dhé ró, ma d’ra ma djo ná føri nga kʉ bbʉbbʉlo ri. 32 Ma djo lod’ra ná d’i ke ki ma kʉ ddi, ndirigoti ma churi chu nari kʉ ke d’ra ma djo nari kʉ bbʉbbʉ kʉ ná lo. 33 Ni choe ndrŭ Yohani dhi ngana ro, ke d’rae d’ʉ kʉ ná lo bbʉbbʉlo djo. 34 Ro, madhó lo i nzɨ adi ndi d’yʉ ndrŭ d’ra ná lo ro ri, ro ma fø lo d’ra nja ni ba gødha d’e. 35 Fø ke ngʉe ddiddi rørø ndirigoti i nga í ná tala bbai, ndirigoti sese kʉ ná saa ro kana ni ngʉe tayari ni njí hwè bbo kedzá kadha nǎ. 36 Ma ji ma dhǒ dzá bbʉbbʉnga ná lo dada Yohani dhó ri djolu, føri i kʉ ma nji ná i njí dhonalo ri Baba bbʉngʉe ma njí, ndirigoti ri ma Baba chongʉe nari dhǒ. 37 Cho chongʉe ma ná madzá Baba nganga ma tilo ma djo ddi. Ro, ni nzá d’erie ke chu ro rr ri ndirigoti ni nzá d’erie ke ká di ngbǎ nari ro ma nja ddi ri. 38 Føri goti kedzá lo ro nzɨ di ni nǎ ri dhonalo ni nzá u ke cho ná ke ri.

39 “Ni ndi ndini ná lo nanga ne, ni riddi føri chulu i ni si cho ró nŭnŭ di ná shinga ba nari dho; ro, ndi ndini ná fø lo nganga i lod’ra ma djo. 40 Føro mai, ni nzá jiri ni si ma dhi ngana ndiro ni ba shinga d’e ri. 41 Ma nzɨ adi ndrŭ dhó ro si ná madha ro uri. 42 Ro, ma churi bblo nari kʉ ni nǎ nga kʉ Mungu dzá jidha ro ri. 43 Ma si madzá Baba ró dho na, ro ni nzá u ma ro ri. Ro, njati ddikpa ke sie ndi nganga ró dho na ró, fø ke i ni ka ni ue u. 44 Mungu ddiro dhó ro si ná madha ni neé nari rɨngana ni madha bbʉ ni dho ni kana ni niro, nde føro ká ni ka ni uri ngbaribbai? 45 Nzɨ ni ddiri ma ka ma bbø ni Baba dho; ni ka ni bbø ná ke kʉ thé, føri kʉ ni li nidhó ngab’odha djó ná ke, Musa. 46 Ro, njati ni ue Musa ró, ni ka ni ue ma u dhonalo kʉ, ke ndingʉe lo ndi ma djo. 47 Ro, njati ni ú ke ndi ná lo nzá ró, føro ká ni ka ni ú ma po ná lo ngbaribbai?”